“Jorrāān eo ilo Jikin Ikkure eo,” Jera, O̧kwōj 2023, 46–47.
Jorrāān eo ilo Jikin Ikkure eo
Hunter ekar bōk kūtwōn. “Ijjab ba naan ko.”
Bwebwenato in ekar bōk jikin ilo USA.
Hunter ekar ettōr kijoon jikin ikkure eo ippān ro m̧ōttan. Ekar ūjō ke ekar en̄jake kōto an ettōr eļļāļo̧k jān e. Ekar en̄jake an m̧ōkaj im mera!
Kyle ekar jibwe oror eo m̧oktata. “Iwiin!” ekar lam̧ōj.
Hunter ekar an̄ur oror eo jidik iien tok ālik. “Ejjab jetjet! Kwar ijjino m̧oktata.”
“Innā,” Miguel ekar ba. “Ij iaikooj ippam̧ n̄an wōjke eo!”
Hunter ekar jino bar ettōr. Iien in, ekar jibwe wōjke eo m̧oktata. Bōtaab Miguel ekar pād tulikin.
“Iwiin!” Miguel ekar ba.
“Jaab, Hunter eo ewiin,” Piper ekar ba.
“Innā,” Kyle ekar ba.
Miguel ekar nukuj pein. Innām ba juon naan nana.
Ajri ro jet raar ettōn̄. Miguel ekar bar ba naan eo, im raar bar ettōn̄ jidik.
Hunter ekar en̄jake būruōm̧ōj itulowa. Hunter ekar jeļā naan eo ekar jab em̧m̧an n̄an ba. Bōtaab ekar jab kōņaan bwe ren kōm̧m̧an kōjak kake e. Ekar jab ba jabdewōt.
Piper ekar bar bar juon naan nana. Innām Kyle ekar bar ba juon.
“Kiiō kwe ba juon, Hunter,” Kyle ekar ba.
“In̄n̄ā, kwoj ita,” Miguel ekar ba. Ba juon naan in kanejnej.”
Hunter ekar bōk kūtwōn. “Ijjab ba naan ko.”
“Ba juon naan eban kōmetak eok,” Kyle ekar ba.
“Ijjab kōņaan,” Hunter ekar ba.
“Kolukkuun mijak ke?” Miguel ekar ettōn̄.
Hunter ekar en̄jake bwil turin mejān. “Ij tōn etal in ikkure bar juon jikin.”
Aolepān ajri ro raar ettōn̄ im ba naan ko renana. Hunter ekar kōņaan etal ettoļo̧k. Jikin ikkure eo ejako an kam̧ōņōņō kiiō. “Lo kom̧ tok ālik,” ekar alin̄urn̄ur.
Hunter ekar likūt pein ilo bōjo̧ ko an im jidik wōt an etal eļļaļo̧k jān ajri ro jet. Ekar jab en̄jake an m̧o̧kaj ak mera ļo̧k n̄an jidik. Ekar en̄jake an edodo.
Ekar lo jinen im jemen rej jiet ioon juon jea aļaļ. Jemen ekar door laļļo̧k bok eo an. “Em̧m̧an ke am̧ mour?”
Hunter ekar lelōn̄ļo̧k aeran. “Raar jino ba naan ko renana. Ikar jab kōņaan kōm̧m̧ane men eo, kōn menin ikar em̧m̧akūt.”
M̧am̧a ekar ettōn̄ dikdik. “Kwar peran.”
“Eļap an utiej būruōm kōn eok,” Baba ekar ba. “Epen n̄an kōm̧m̧ani kāālet ko rem̧m̧an n̄e armej ro ipeļakid rejjab.”
Hunter ekar bōk kūtuwōn. Ekar m̧ōņōņō ekar kōm̧m̧ane kāālet eo ejim̧we, bōtaab ekab de jan̄in em̧m̧an an en̄jake.
“Kwoj ke kōņaan ro̧o̧l n̄an m̧weo?” Jinō eaar kajjitōk.
Hunter ekar ļōmņak kake. “Ejjan̄n de,” ekar ba. Ekar reilo̧k n̄an bar juon kumi in ajri ro rej ikkure ilo zip ļain ko. “Ij tōn etal n̄an ijuweeo.”
Ke Hunter ekar etetalļo̧k, juon iaan ļaddik ro ekar jeaaļe. “Iakwe, n̄a David.”
“N̄a Hunter. “Imaron̄ ke ekkāke ippam̧?”
“Aeet!”
Hunter ekar an iien n̄an iuweļo̧k ioon zip ļain eo im kar en̄jake kōto rej kaiim̧ļo̧k. Ke ekar ikkure ippān David im ro jet, ekar en̄jake an m̧ōkaj im mera bar juon alen. Ekar kōm̧m̧ane ta eo ekar jim̧we, jekdo̧o̧n n̄e ekar pen. Ekar m̧ōņōņō ekar kōm̧m̧ane juon kāālet ejim̧we.
Kōmeļeļe ko jān Shawna J. C. Tenney