Gikan sa Unang Kapangulohan

Si Jesukristo Buhi

Ni Presidente Henry B. Eyring

Ikaduhang Magtatambag sa Unang Kapangulohan

Henry B. Eyring

Gikuha gikan sa “Ang Iyang Espiritu Magauban Kaninyo,” Liahona, Mayo 2018, 86–89; ug “Siya Nabanhaw,” Liahona, Abr. 2013, 4–5.

alt text

Kini nga panahon sa tuig makatabang kanato sa paghinumdom sa sakripisyo sa Manluluwas ug sa Iyang pagbangon gikan sa lubnganan.

Kausa nagbarog ko uban sa akong asawa sa gawas sa usa ka lubnganan sa Jerusalem. Sa sulod, nakakita mi og bato nga lingkoranan tupad sa bungbong.

Apan misulod sa akong hunahuna ang lain nga hulagway. Naghunahuna ko ni Maria didto sa walay sulod nga lubnganan. Naghilak siya tungod kay ang Manluluwas namatay. Wala siya masayod kon diin gibutang ang Iyang lawas.

Dayon “siya miliso, ug nakita niya si Jesus nga nagtindog, apan wala siya mahibalo nga kadto mao si Jesus” (Juan 20:14). Si Maria nagtuo nga Siya mao ang hardinero.

“Si Jesus miingon kaniya, Maria” (Juan 20:16). Karon si Maria nakaila Kaniya. Nasayod siya nga Siya nabanhaw.

Tungod kay gibuntog ni Jesukristo ang kamatayon, ang tanang anak sa Langitnong Amahan mabanhaw sa lawas nga dili na gayod mamatay.

Nagpasalamat ako sa atong Langitnong Amahan alang sa gasa nga Iyang Pinalanggang Anak. Mapasalamaton ko nga masayod nga gitubos Niya ang atong mga sala ug mibangon diha sa Pagkabanhaw. Mopamatuod ko nga si Jesus mao ang nabanhaw nga Kristo, atong Manluluwas, ug atong hingpit nga ehemplo.

Roleta sa Istorya sa Pasko sa Pagkabanhaw

Guntinga ang mga lingin ug ibutang ang unang lingin nga gipatongan sa uban. Busloti ang tunga ug pugngi kini gamit ang ipit o metal nga fastener. Dayon patuyoka ang ibabaw nga lingin aron masugilon ang Istorya sa Pasko sa Pagkabanhaw.

Ang Istorya sa Pasko sa Pagkabanhaw

1. Si Jesus miadto sa Jerusalem sa Dominggo sa Lukay (tan-awa sa Marcos 11:7–11).

2. Si Jesus mihatag sa Iyang mga disipulo sa sakramento (tan-awa sa Mateo 26:26–28).

3. Si Jesus nag-ampo sa Tanaman sa Getsemani (tan-awa sa Marcos 14:32–36).

4. Si Jesus namatay alang kanato didto sa krus (tan-awa sa Lucas 23:46).

5. Ang Iyang lawas gibutang sa lubnganan sulod sa tulo ka adlaw ( tan-awa sa Mateo 27:59–64).

6. Si Jesus nabuhi pag-usab. Ug Siya buhi karon. (Tan-awa sa Mateo 28:6–9.)

Istorya nga naa sa PDF

Mga paghulagway pinaagi ni Alyssa Tallent