“Ang Himongaan ug ang mga Gagmayng Pisô,” Higala, Marso 2024, 4–5.
Ang Himongaan ug ang mga Gagmayng Pisô
“Si Jesukristo misulti bahin niini diha sa mga kasulatan,” miingon si Papa.
Kini nga istorya nahitabo sa USA.
Ang lima ka balhiboon nga piso nga dalag mitutok ni Clara. Peep, peep, peep!
Matag tingpamulak ang pamilya ni Clara magdala og gagmayng piso aron alimahan. Karon mitabang siya ni Papa sa pagdala niini sa balay aron iipon sa uban nilang mga manok.
Ang dalan nga ilang giagian libaongon. Apan si Clara migunit og maayo sa kahon nga gisudlan sa mga piso diha sa iyang paa. Hinay niyang gihikap ang usa niini sa tumoy sa iyang tudlo. Humok kaayo kini!
Sa dihang nauli na si Clara ug si Papa, naglakaw sila padulong sa balay-balay sa himongaan didto sa likod. Ang balay-balay sa himongaan maypagka-landong diin ang tanang himongaan nagpuyo ug naghimo sa ilang pugaran.
“Asa niini nga himongaan nato ibutang ang mga piso?” Nangutana si Papa.
Mitan-aw si Clara sa palibot. Usa ka himongaan nagpundok og dagami para lumlomanan. Ang dagami nindot lumloman para sa bag-ong mga piso. Tingali maayo ni siya nga inahang himongaan.
“Kini siya,” miingon si Clara, nagtudlo sa himongaan.
Gikuha ni Papa og hinay ang usa ka piso pagawas sa kahon ug gibutang kini tapad sa himongaan. Gitan-aw sa himongaan ang piso. Iyang gibuka ang iyang pako, ug sa kalit ang piso nawala!
“Diin kini miadto? OK ra ba ang piso?” Nangutana si Clara.
Mitando si Papa. “Tan-awa.”
Migimaw ang ulo sa piso ilawom sa mga pako sa himongaan.
“Nganong gibuhat man kadto sa himongaan?” Nangutana si Clara.
“Aron protektahan ang piso,” miingon si Papa. “Aron luwas kini ug mainitan ilawom sa iyang mga pako.”
Si Clara mitabang ni Papa sa pagbutang sa ubang mga piso tapad sa ilang bag-ong inahan nga himongaan. Ang himongaan mibuka sa iyang mga pako aron pundokon silang tanan sa duol.
“Kahibalo ka, si Jesukristo misulti bahin niini diha sa mga kasulatan,” miingon si Papa.
“Tinuod?” Nangutana si Clara. “Unsay Iyang gisulti?”
“Akong ipakita nimo.”
Misulod si Clara ug si Papa sa balay. Gipagawas ni Papa ang iyang mga kasulatan. Dayon misugod siya sa pagbasa.
“Kapila ba Ako magtigom kaninyo ingon sa usa ka himongaan nga magtigom sa iyang mga pisô sa ilawom sa iyang mga pako, kon kamo maghinulsol ug mobalik ngari kanako uban ang hingpit nga katuyoan sa kasingkasing.”*
Naghunahuna si Clara bahin sa matag piso ilawom sa mga pako sa himongaan. “Sa ato pa si Jesus mopundok kanato sama sa himongaan nga mopundok sa mga piso ilawom sa iyang mga pako?” Nangutana si Clara.
“Husto kana,” miingon si Papa. “Iya kitang bantayan, sama sa himongaan nga mobantay sa iyang mga piso. Apan Siya labaw pang manalipod kanato gikan sa katugnaw. Nasayod Siya kon kita masakitan o masakit o maguol. Naghatag Siya kanato og kalinaw ug kahupayan. Siya nagpakabana kanato.”
Pagkasunod buntag, si Clara mipakaon sa himongaan ug sa iyang bag-ong mga piso. Nakapahunahuna kini kaniya sa kasulatan nga gibasa ni Papa. Mipahiyom siya samtang naghunahuna siya mahitungod ni Jesus. Nasayod siya nga Siya nahigugma kaniya ug nagpangga Kaniya, sama sa himongaan nga nagpangga sa mga piso.
Paghulagway pinaagi ni Assia leradi