Si Janeelyn Mihunong sa Pagsige og Scroll sa Selpon

Ni Charlotte Larcabal Speakman

(Gibase sa usa ka tinuod nga istorya)

Gusto gyod siyang makakita sa sunod nga bidyo. Ug sa sunod. Ug sa sunod.

Kini nga istorya nahitabo sa Malaysia.

Gi-swipe ni Janeelyn ang iyang kumagko latas sa screen sa celfon. Ang mga bidyo nga paspas rang milabay. Mihunong siya aron tan-awon ang usa, dayon mo-scroll pag-usab. Dayon mihunong siya sa laing bidyo. Kini adunay dili maayong pinulongan, apan kataw-anan, mao nga sige siya og tan-aw. Ug dayon mipadayon sa pag-scroll.

“Janeelyn! Gusto kang mag-drowing?” Ang iyang manghod nga babaye nga si Jojo miwarawara og usa ka piraso sa papel.

Mipasiplat si Janeelyn. “Dili karon.”

“OK.” Nagkusmod si Jojo ug gibutang ang papel.

Scroll. Scroll. Scroll. Mga bidyo sa nindot nga mga hayop. Mga bidyo sa inila nga mga tawo. Mga bidyo sa nagsayaw nga mga bata. Ug pipila ka bidyo nga si Janeelyn nasayod nga dili maayo nga tan-awon. OK, tingali dyotay na lang. Misugod sa pagbati si Janeelyn nga mohunong na siya og tan-aw niini.

Apan ang mga tawo mo-post og daghang nindot nga butang, naghunahuna siya. Nakat-on man gani siya og bag-ong mga paagi sa pag-drowing gikan sa pipila ka bidyo.

“Janeelyn,” mitawag si Mama.

“Hmm?” Wala gani motan-aw si Janeelyn niining higayona.

“Kita adunay seafood diha sa sinangag nga kan-on karong gabii,” miingon si Mama. “Mahimo bang tabangan ko nimo sa pagluto niini?”

Si Janeelyn ganahan kaayo og seafood nga sinangag nga kan-on. Apan dili siya gusto nga mobarog karon.

“Pwede ba kong moandam lang sa lamesa?” nangutana siya. “Makatabang usab ako sa pagpanghugas sa mga plato inig ka human.”

“Okay ra pod,” miingon si Mama. “Apan kinahanglan nimong buhaton kon moingon ko nimo. Ug dayon panahon na aron ibalik ang phone. Nagkasabot na ta?”

“Nagkasabot na,” miingon si Janeelyn.

Nagpadayon og tan-aw sa mga bidyo si Janeelyn. Usab, mibati siya nga dili na gyod siya motan-aw niini pag-usab. Apan ganahan gyod siya kaayong motan-aw sa sunod nga bidyo. Ug sa sunod. Ug sa sunod. Scroll. Scroll. Lisod ang paghunong!

Sa kataposan gibutang ni Janeelyn ang phone. Ay, basin makatiwas na lang siya sa kataposan nga bidyo … .

Dili, giingnan gayod ni Janeelyn ang iyang kaugalingon. Ang Espiritu Santo miaghat kaniya, ug siya gusto nga maminaw. Ang iyang kamot padayon nga naghikap duol sa phone. Makatintal kaayo kadto! Gihugtan sa pagpiyong ni Janeelyn ang iyang mga mata.

Minahal nga Langitnong Amahan, hilom siyang nag-ampo. Naningkamot ko og maayo sa pagpaminaw sa Espiritu Santo, apan nagkinahanglan ko og tabang. Gusto kong mohunong og tan-aw niini nga mga bidyo, apan dili ko sigurado unsaon. Sa ngalan ni Jesukristo, amen.

Pagkahuman, nanawag si Mama kaniya aron sa pag-andam sa lamesa. Si Janeelyn milukso ug mipahiyom. Usa kadto ka paagi aron sa pagtabang kaniya nga buhian ang phone.

Si Janeelyn miandam sa mga plato sa lamesa. “Ma, nakakita ko og pipila ka dili maayo sa phone, kalit siyang miingon.

Si Mama mihangad gikan sa iyang pagluto. “Unsa nga mga matang sa mga butang?”

“Sama sa, dili maayong mga pulong ug dili maayong mga bidyo.” Mikibo si Janeelyn. “Apan dili ang tanan daotan.”

“Unsay imong gibuhat sa dihang nakita nimo ang daotang mga butang?” Nangutana si Mama.

Nahilom og kadiyot si Janeelyn. Gibutang niya ang usa ka tasa sa matag lugar.

“Nagsige kog tan-aw,” miingon siya. “Wala ko masayod ngano. Apan ang Espiritu Santo miingon kanako sa paghunong, mao nga nag-ampo ko alang sa tabang.”

Gipahimutang ni Mama ang usa ka init kaayo nga sud-an nga seafood sa sinangag diha sa lamesa. “Usahay lisod gyod kaayo ang paghunong sa pagbuhat og mga butang bisan og nasayod kita nga kini daotan,” miingon siya. “Ug kon kana mahitabo man, ang labing maayo nga atong buhaton mao ang pag-ampo.”

Mingisi si Janeelyn. “Sa ato pa gibuhat nako ang husto.”

“Gibuhat gyod nimo.” Gitunol ni Mama ang mga kutsara ngadto ni Janeelyn aron ibutang sa lamesa. “Ug ang internet dili ra gyod diay daotan. Makatabang kini kanato nga makonektar sa mga higala ug mopakigbahin og mga ideya. Apan lisod usab nga makalikay gikan sa tanang daotan nga butang. Sugod karon, kon motan-aw ka og mga bidyo, magdungan lang ta og tan-aw niini. Niana nga paagi si Papa ug ako makatabang kon ikaw makatan-aw og daotan.”

Mitando si Janeelyn. Sa sunod motan-aw siya og mga bidyo kauban ni Mama ug Papa. Apan sa dili pa kana mahitabo, adunay daghang makalingaw nga butang nga iyang mahimo nga wala ang phone.

“Mahimo bang tawagon na nimo sila alang sa panihapon?” Nangutana si Mama.

“Oo! Ug human sa panihapon, magdrowing mi ni Jojo!”

Mga paghulagway pinaagi ni Mitch Miller