Usa ka Maayo nga Ehemplo

Ni Elder Mathias Held

Sa Seventy

Gikan sa usa ka interbyo uban ni Haley Yancey.

Dili ko miyembro sa Simbahan sa bata pa ko. Dili hangtod nahimo kong hingkod ug usa ka negosyante dihang nabunyagan ko.

Ang akong amahan usa ka negosyante usab. Nabalaka kaayo siya sa dihang mipasakop ko sa Simbahan. Miingon siya, “Dili na ka moinom. Lisod kana panahon sa mga miting diin ang tanan mag-inom.”

Apan wala ako mabalaka. Nakahukom ako nga kon dunay modalit nako og inom, moingon ko nga, “Dili, salamat.” Dayon mo-order ko og lain.

Milabay ang katuigan, ug nabuhat nako kini sa makadaghan. Sa wala madugay, nakabantay ang akong mga kauban sa trabaho. Kon tanyagan ko og ilimnon, moingon sila, “Si Mathias dili moinom. Dad-i siya og lain.” Nagkadaghan na kanila ang mihunong og order og ilimnon usab. “Dili pod ko gusto,” miingon sila.

Kausa, pipila ka mga bisita mitambong sa usa ka miting. Sila ra ang nanginom og alkohol.

Nangutana sila nako, “Nganong walay usa nga nag-inom og alkohol? Sila bang tanan miyembro sa inyong simbahan?”

“Dili,” miingon ko.

Wala ako magsangyaw sa akong mga kauban sa trabaho mahitungod sa Pulong sa Kaalam. Nagmalig-on lang ako sa akong mga tinuohan, ug sila nakabantay sa akong ehemplo.

Kamo usab mahimong usa ka maayo nga ehemplo. Ang uban makabantay kon ikaw mopili sa matarong. Matabangan nimo sila sa yanong paagi sa pagsunod sa ebanghelyo.