Usa ka Pakig-chat uban kang Will mahitungod sa Pagtabang sa mga Bakwit

Si Will taga-Pennsylvania, USA. Gipangutana namo siya og pipila ka pangutana kabahin sa usa ka proyekto nga iyang nabuhat sa pagtabang sa uban.

Sultihi kami bahin sa imong kaugalingon.

Ako 11 anyos ang panuigon. Ganahan kong magdula og soccer ug lacrosse, magluto og mga biskwit, maglangoy, mag-ski, ug mag-roller-skate. Magduyog usab ko og piyano ug sa biyolin. Ang akong paborito nga kolor asul, ug ang akong paborito nga pagkaon itlog (binatil, pinirito, nilung-ag—ganahan ko sa tanan!). Kon modako na ko, gusto ko nga mahimong usa ka doktor sama sa akong papa.

Unsay nakahatag nimo sa ideya sa pagtabang?

Nakadungog ko nga daghang pamilya gikan sa laing nasod ang nanglangyaw alang sa ilang kaseguroan. Pipila kanila namalhin sa dapit nga duol lang. Dihadiha dayon naghunahuna ko, “Sa unsang paagi ako makatabang kanila?”

Nag-ampo ko aron masayod kon unsaon nako sa pagtabang. Dayon ang akong mama nakadawat og email gikan sa Relief Society sa stake. Naghangyo sila sa mga tawo nga makadonar og mga butang aron ihatag sa mga pamilya nga namakwit. Nasayod ko nga ang akong pag-ampo natubag!

Giunsa nimo sa pagtabang?

Ganahan kong magluto (hanas ko sa mga biskwit) mao nga nakahukom ko sa pagbaligya og mga biskwit aron makakwarta alang niini nga mga pamilya. Naghimo ko og mga flier ug nag-roller skate libot sa kasilinganan aron ipanghatod kini. Ang akong iro, si Coco, miuban usab.

Daghan sa akong mga silingan naghinamhinam sa pagpalit sa akong mga biskwit. Sa kwarta nga akong nakita, namalit ko og mga kalderen ug mga kaha aron idonar.

Unsay imong gibati?

Maayo ang akong gibati nga nahibalo nga kini nga mga pamilya makaluto gamit ang mga kalderen ug mga kaha. Makahunahuna lang ko kon unsa ka makalipay ang lami sa usa ka linuto sa balay nga pagkaon kon anaa ka sa usa ka bag-ong nasod.

Akong nakat-onan sa Primary nga “kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Gibati nako ang gugma sa Langitnong Amahan alang kanako ug alang sa mga tawo nga namalhin sa akong dapit.

Unsa nga tambag ang imong ihatag sa usa ka tawo nga gustong motabang?

Pangita og mga paagi nga makaserbisyo sa imong ward o stake. Mahimo usab kang makatabang og lokal nga kasilongan sa imong dapit. Adunay mga paagi sa pagtabang sa tanang palibot!

Mga paghulagway pinaagi ni Dave Williams