“Ang Sinaw nga Pulang-lagumon [Purple] nga Bato,” Higala, Marso 2024, 10–11.
Ang Sinaw nga Pulang-lagumon [Purple] nga Bato
Kon mosulti siya sa tinuod, masuko kaha siya niya?
Kini nga istorya nahitabo sa Netherlands.
Si Marie miabli sa iyang kahon sa mga alahas aron motan-aw sa iyang nindot nga mga bato. Usa-usa, iya kining gigunitan. Ang usa nga pula, dayon ang usa nga berde, dayon ang usa nga tin-aw nga puti.
Nanuktok sa pultahan sa kuwarto si Lola. “Andam na nga molakaw?”
“Oo!” Mainampingon nga gibalik ni Marie ang mga bato sa iyang kahon.
Dad-on ni Lola si Marie ngadto sa librarya. Apan dili lang aron motan-aw sa mga libro. Dinhay usa ka espesyal nga bato nga gi-display didto! Naghinamhinam si Marie.
Sa dihang ang ilang bus naabot na sa librarya, si Marie ug si Lola milakaw pasulod. Nakakita sila og daghang lamesa nga dunay nindot nga mga bato. Ang pipila sinaw ug hamis. Ang uban lahi og mga porma.
“Tan-awa kining usa!” Gitudlo ni Lola ang usa ka dako nga kristal. Kini adunay asul nga mga uhay [spikes] nga makita libot niini.
Laing lamesa adunay daghang gagmay, lingin nga mga bato. Gitan-aw ni Marie ang tanang kolor. Sa pinaka-kataposan mao ang usa ka pulang-lagumon [purple] nga bato, gamay ug sinaw ug hamis.
Wala pa koy pulang-lagumon nga bato, naghunahuna si Marie. Kini eksakto kaayo alang sa iyang koleksiyon.
Mitan-aw si Marie sa palibot. Si Lola atoa sa laing lamesa. Walay anaa sa duol. Ug walay usa nga mangita niini nga gamayng bato, dili ba?
Gipunit ni Marie ang bato ug gisulod kini sa iyang bulsa.
Nianang gabhiona, ang pulang-lagumon nga bato anaa na sa iyang kahon sa mga alahas, si Marie mihigda na.
“Andam na ba alang sa panahon sa istorya?” Milingkod si Papa sa higdaanan ug miabli sa Higala nga magasin.
Si Marie mibukot sa iyang habol ug naminaw. Ang istorya mahitungod sa usa ka batang lalaki nga naghinulsol human mihimo og sayop nga pagpili.
Samtang gabasa si Papa, mibati si Marie nga daw ang iyang tiyan nagbalikos sa mga hikot. Miligid siya ngadto sa iyang kilid, dayon mibali sa iyang unlan. Apan wala siya mobati og maayo. Ug dili siya makahunong og hunahuna mahitungod sa pulang-lagumon nga bato.
Gihuman ni Papa ang istorya. “OK ra ka?”
Si Marie wala masayod unsa ang buhaton. Kon iyang sultihan si Papa, masuko unya siya.
Apan basin makahibalo siya unsaon sa pagtabang.
Sa hinayhinay, mikamang si Marie sa iyang higdaanan ug gikuha ang pulang-lagumon nga bato sa iyang kahon. “Ako kining gikuha gikan sa librarya karong adlawa.” Mitulo ang mga luha sa mga mata ni Marie. “Pasayloa ko.”
Si Papa migakos niya. “OK ra gyod nga sultihan ko nimo sa tinuod. Mapasigarbohon ko nimo sa imong kaisog nga magmatinud-anon.”
Miarang-arang ang pamati ni Marie sa iyang tiyan. Wala masuko si Papa!
“Ug tungod ni Jesus, kita makahinulsol. Sama sa istorya,” miingon siya. “Ato kaha ning iuli ang bato sa librarya?”
Gipiyong ni Marie ang iyang mga mata. “Dili! Masuko sila.”
Giagbayan siya ni Papa. “Tingali masuko sila og gamay. Apan hunahuna nako malipay sila nga imo kining ibalik. Ug aron maayo na imong bation usab.”
Miginhawa og lawom si Marie ug mitando. “OK.”
Nagkuha si Marie og usa ka piraso sa papel ug nagsugod sa pagsulat. “Pasayloa ko nga ako kining gikuha,” siya misulat. “Wala unta kini nako buhata. Gusto nakong buhaton ang matarong.”
Iyang gipasok ang sulat sa sobre. Dayon iyang gisukip usab ang pulang-lagumon nga bato sa sulod.
“Ato kining iuli ugma,” miingon si Papa. “Kumusta imong pamati karon?”
“Arang-arang,” miingon si Marie. “Aduna pay usa ka butang nga kinahanglan nakong buhaton.”
Miluhod si Marie kilid sa iyang higdaanan ug nag-ampo. “Pasayloa ko nga akong gikuha ang bato,” miingon siya. “Dili na gayod ko mangawat pag-usab. Salamat Kanimo sa pagtabang kanako nga magmaisugon ug magmatinud-anon.”
Sa iyang pagbalik sa higdaanan, gibati ni Marie ang kalinaw. Ugma iyang buhaton ang mga butang nga matarong. Ug siya nasayod nga ang Langitnong Amahan ug si Jesus motabang niya. Tungod Kanila, OK ra ang tanan.
Mga paghulagway pinaagi ni Katie Rewse