“Usa ka Pasko sa Pagkabanhaw nga Hinumdoman,” Higala, Marso 2024, 14–15.
Usa ka Pasko sa Pagkabanhaw nga Hinumdoman
Gibati ni Jonas ang gugma ni Jesus samtang nagkanta siya.
Kini nga istorya nahitabo sa Finland.
Si Jonas nagkatawa samtang nakiglumba sa iyang mga igsoong lalaki ngadto sa sala aron mag-home evening. Matimahoan pa gihapon niya ang lamian nga inasal nga karnero gikan sa panihapon sa Pasko sa Pagkabanhaw. Ug matagamtaman pa gihapon niya ang tam-is nga pasha, ang ilang tradisyonal nga dessert.
Human nga ang pamilya hilom nga nanglingkod, ang maguwang nga lalaki ni Jonas nga si Tristan mibarog.
“Malipayong Pasko sa Pagkabanhaw!” Miingon si Tristan. Gisugdan niya ang ilang home evening sa kanta ug pag-ampo. Dayon oras na alang sa ilang espesyal nga programa sa musika. Ang tanan nag-andam og kanta mahitungod ni Jesukristo aron ipakigbahin.
Si Tristan mipatukar sa gitara, mainampingon nga mikaskas sa matag kuwerdas. Dayon ang iyang igsoong lalaki nga si Einar mipatukar sa piyano. Ang iyang mga tudlo milihok latas sa mga tekla [keys]. Si Mama, Papa, ug ang ubang igsoong lalaki ni Jonas nagpatukar usab og mga kanta. Ganahan si Jonas nga maminaw sa musika sa iyang pamilya.
Sa kataposan kahigayonan na ni Jonas. Miginhawa siya og lawom ug misugod sa pagkanta.
“Kon tentalon ko nga sayop pilion, apan naminaw ko sa Espiritung naghunghong, Higugmaon ta ang usag usa.’”*
Samtang nagkanta si Jonas, ang iyang kasingkasing napuno sa gugma. Ang iyang mga mata napuno sa malipayon nga mga luha. Mabati nga mora og ang Espiritu Santo nagsulti ni Jonas nga ang Langitnong Amahan ug si Jesus nahigugma kaniya.
“Salamat ninyong tanan sa pagpaambit sa inyong mga talento, miingon si Papa. Iyang giisa pataas ang usa ka litrato. Nagpakita kini kang Jesukristo nga nagluhod ug nag-ampo tupad sa usa ka kahoy. “Kinsa ang nakahibalo kon unsa ang nahitabo niini nga litrato?”
Si Jonas miisa sa iyang kamot. “Si Jesus kana nga nag-ampo sa Getsemani.”
Mitando si Papa. “Oo. Gibati Niya diha ang tanan natong mga kasakit ug kaguol.”
“Miadto Siya sa Tanaman sa Getsemani sa wala pa Siya mamatay,” miingon si Mama. “Human Siya mamatay, Siya nabuhi pag-usab. Kining tanan usa ka bahin sa Iyang Pag-ula. Si Jesus mibuhat niining tanan tungod kay Siya nahigugma kanato.”
Si Mama mipasalida sa bidyo mahitungod sa una nga Pasko sa Pagkabanhaw. Sa dihang nahuman ang bidyo, ang tanan nahilom og kadiyot. Gibati na usab ni Jonas ang gugma sa Langitnong Amahan ug ni Jesukristo.
“Karon oras na ba alang sa atong kalihokan?” Nangutana si Jonas.
Mitindog si Mama gikan sa sopa ug miadto sa kabinet. “Oo! Jonas, mahimo ba ko nimong tabangan?”
Si Jonas ug Mama nagkuha og mga glue, gunting, ug pundok sa mga magasin sa Simbahan. Gikatag nila kini sa salog. Dayon si Mama nanghatag sa tanan sa ilang espesyal nga mga journal sa Pasko sa Pagkabanhaw. “Maghimo kita og art nga litrato ni Jesukristo sa atong mga journal alang sa Pasko sa Pagkabanhaw.”
Milingkod si Jonas sa salog ug giablihan ang iyang notebook.
Si Papa mipunit og ballpen aron magsulat sa iyang journal. “Tupad sa inyong mga litrato, mahimo ninyong isulat kon unsa ang inyong buhaton aron makasunod sa Langitnong Amahan ug ni Jesus aron kamo mahimong mas mahisama Kanila.”
Gipakli ni Jonas ang mga pahina sa usa sa mga magasin. Nakakita siya og litrato ni Jesukristo nga nagpahiyom.
Gigunting ni Jonas ang litrato og gipapilit kini sa tunga sa iyang pahina sa journal. Gihunahuna niya ang tanan nga gugma nga iyang nabati gikan sa Manluluwas nianang adlawa. Dayon siya misulat, “Sundon nako ang Langitnong Amahan ug si Jesus pinaagi sa pagpaminaw ni Papa ug Mama ug pagtabang sa mga buluhaton. Mas higugmaon nako ang akong mga igsoong lalaki.” Giisa niya kini aron ipakita ni Mama. Gibasa niya kon unsa ang iyang gisulat ug mipahiyom.
Mahinumdoman ni Jonas kini nga Pasko sa Pagkabanhaw sa taas nga panahon. Gibati niya ang gugma ni Jesukristo sa dihang siya mikanta ug nagkat-on mahitungod Kaniya. Ug iyang gibati ang gugma ni Jesus sa dihang naningkamot siya nga mahisama Kaniya.
Ang Langitnong Amahan ug si Jesukristo nahigugma gayod ni Jonas. Ug si Jonas nahigugma usab Kanila.
Mga paghulagway pinaagi ni Steliyana Doneva