O Loo Soifua Iesu Keriso

Saunia e Peresitene Henry B. Eyring

Fesoasoani Lua i le Au Peresitene Sili

Sii mai le “O Lona Agaga e Faatasi ma Oe,” Liahona, Me 2018, 86–89; ma le “Ua Toetu o Ia,” Liahona, Ape. 2013, 4–5.

E fesoasoani lenei taimi o le tausaga ia i tatou ia manatua ai le taulaga a le Faaola ma Lona toetu mai le tuugamau o se tagata toetu.

Sa ou tu i se tasi taimi faatasi ma lo’u toalua i fafo o le tuugamau i Ierusalema. Sa ma vaaia se nofoa ma’a e pipii i le puipui.

Ae na oo mai se isi ata i lo’u mafaufau. Sa ou mafaufau ia Maria i le tuugamau avanoa. Sa tagi o ia ona ua maliu le Faaola. Na te lei iloa po o fea o i ai Lona tino.

Ona “faliu lea o ia i tua, ua iloa atu Iesu ua tu mai, ae lei iloa e ia o Iesu lava lea” (Ioane 20:14). Sa manatu Maria o le tamaloa faitogalaau.

Ae “Ua fetalai atu Iesu ia te ia, Maria e” (Ioane 20:16). O lenei ua iloa o Ia e Maria. Sa ia iloa ua toetu mai o Ia.

Ona sa faatoilalo e Iesu Keriso le oti, o le a toetutu uma fanau a le Tama Faalelagi i se tino o le a le oti lava.

Ou te faafetai i le Atua mo le meaalofa o Lona Alo Pele. Ou te faafetai i le iloaina na Ia totogiina a tatou agasala ma toetu mai i le Toetu. Ou te molimau atu o Iesu o le Keriso toetu, o lo tatou Faaola, ma o lo tatou faataitai atoatoa.

Uili o le Tala o le Eseta

Oti ese li’o ma tuu le li’o muamua i luga o le isi. Fai se pu i le ogatotonu ma taofi i luga i se pine po o se pine uamea faamau pepa. Ona liliu lea o le li’o pito i luga e faamatala ai le tala o le Eseta.

O Le Tala o le Eseta

Na afio mai Iesu i Ierusalema i le Aso Sa o le Laupama (tagai Mareko 11:7–11).
Na tuuina atu e Iesu i Ona soo le faamanatuga (tagai Mataio 26:26–28).
Sa tatalo Iesu i le Faatoaga o Ketesemane (tagai Mareko 14:32–36).
Na maliu Iesu mo i tatou i luga o le satauro (tagai Luka 23:46).
Sa taoto Lona tino i se tuugamau mo aso e tolu (tagai Mataio 27:59–64).
Na toe soifua mai Iesu. Ma o loo soifua o ia i le asō. (Tagai Mataio 28:6–9.)