“O Mataua o le Faatuatua,” Uo, Mati 2024, itulau 30–31.
O Matāua o le Faatuatua
Sa i ai se faafitauli o Iakopo—sa matua fiamoe lava o ia i taimi uma!
O lenei tala na tupu i Pasila.
“Iakopo, e te iloa le tali?” Na fesili ai Mrs. Lelis.
Sa pupula mata o Iakopo ma ea ane lona ulu mai le kesi. Sa tilotilo uma atu tagata o lana vasega ia te ia. Sa faataupupula atu foi lona faiaoga ia te ia. Sa ia lagonaina le mafanafana o ona alafau. Ua toe moe foi o ia i le vasega!
“Ou te faamalie atu, Mrs. Lelis!” o lana tala lea. “E mafai ona e toe fai maia le fesili?”
“Ua lelei. Ae faamolemole tuu le moe i le vasega.”
Sa ia punou ifo i lona nofoa. “Ioe, lau susuga.”
Na sau Iakopo i lana aoga fou i ni nai vaiaso talu ai. Sa fiafia o ia e aoao, ma sa lelei ana uo i le vasega. Ae sa i ai se faafitauli se tasi—sa matua fiamoe lava o ia i taimi uma! Sa mamao tele lana aoga fou, o lea e tatau ai ona ala vave i luga ina ia i ai iina i le taimi sa’o.
I le taimi muamua, sa faigofie ona taulai atu i le vasega. Ae sa iu ina sili atu ona faigata ma faigata atili. O nisi taimi sa matua lelava lava Iakopo ma moe ai.
O le aso na sosoo ai, na talosagaina ai e le puleaoga ia Iakopo ma ona matua latou te feiloai. Sa ataata o ia ma faafeiloai i laua i totonu o lona ofisa.
“Ua ou fiafia ua lua i ai iinei,” o lana tala lea. “O Iakopo o se tamaitiiti aoga maoae. Ae fai mai lona faiaoga e le fiafia o ia i ana vasega. O nisi taimi e le taulai atu i ai o ia, ma e foliga mai e lelava tele o ia. O OK o ia?”
Sa lue le ulu o lona tina. “Sa galue malosi Iakopo ina ia mafai ona alu i le aoga iinei, ae e mamao tele mai lo matou fale. E manaomia ona ala vave o ia i aso uma. O lea e fiamoe ai i ana vasega i le taeao.”
“Oi, pe na o lena lava?” na fai atu ai le puleaoga. “E tatau ona e faataitaia ni mataua o le kofe! Tuu ni nai mataua o le kofe malosi i le vaiinu a Iakopo i taeao taitasi. O le a ala o ia i lena mea.”
Sa faanono Iakopo. “Ae e le inuina e lo matou aiga le kofe, lau susuga.”
Sa foliga le mautonu le puleaoga. “O le a faigata ia te oe ona aoao pe afai e te moe pea. E tatau ona e mafaufau i ai.”
Ina ua latou tuua le ofisa o le puleaoga, sa le mautonu manatu o Iakopo. Sa manao o ia ia lelei atili i le aoga, ae sa manao foi o ia e mulimuli i poloaiga.
I lena po, sa faitau ai lona aiga e uiga i le Upu o le Poto i tusitusiga paia.
Ina ua oo i le taimi o Iakopo, sa ia faitauina, “Ma o le au paia uma o e manatua e tausi ma faia nei upu … o le a maua le poto ma oa silisili o le malamalama. Ma o le a taufetuli ae lē vaivai, ma o le a savavali ae lē matapogia.”*
Ona oso a’e lea o sona manatu!
Sa tu a’e o ia mai lona nofoa. “Nai lo mataua o le kofe, o le a ou faaaogaina mataua o le faatuatua!”
“O le a le uiga o lau tala?” o le fesili atu lea a lona tama.
Sa ataata Iakopo. “O taeao uma lava a o lei faia le taumafataga o le taeao, e mafai ona tatou faia se tatalo ma ole atu i le Tama Faalelagi e faamanuia au ina ia ou le lagonaina ai le fiamoe. O a tatou tatalo o le a pei o mataua o le faatuatua!”
Na ataata Tina ma Tama. “E foliga mai o se manatu lelei tele.” Na fai atu ai Tama.
O le taeao na sosoo ai, sa tootutuli ai lo latou aiga ma fai se tatalo ina ia maua e Iakopo le malosi e ala ai. Sa latou faia le mea lava lea e tasi i le aso na sosoo ai. Ma le isi aso na sosoo ma lena. O po taitasi, e taumafai ai Iakopo e vave moe. Ma o taeao taitasi sa iai le faatuatua i le aiga o Iakopo o le a fesoasoani le Tama Faalelagi ia te ia.
I le aluga o taimi, sa aoga ai a latou mataua o le faatuatua. Na mafai ona taulai atu Iakopo mo le aso atoa! Ua tali mai le Atua i a latou tatalo. Ma sa iloa e Iakopo sa mitamita o Ia ia te ia ona o le mulimuli i le Upu o le Poto.
“Sauni mo le vasega, Iakopo?” Sa fesili atu ai Mrs. Lelis i se tasi taeao a o savali atu o ia i totonu o le potuaoga.
Sa lue atu le ulu o Iakopo ma se ataata lapoa i ona foliga. Sa inu ana mataua o le faatuatua a o lei amataina le aoga. Ua saunia o ia mo soo se mea!
Ata na tusia e Raquel Martín