“O Le Maa Viole Iila,” Uo, Mati 2024, 10–11.
O Le Maa Viole Iila
Afai na te ta’u atu le mea moni, mata o le a ita o ia ia te ia?
O lenei tala sa tupu i le Netherlands.
Sa tatala e Marie lana pusa o maataua e tilotilo ai i ana maa aulelei. Sa taitasi ona ia uuina i lona lima. O le lanu mumu, sosoo ai ma le lanumeamata, sosoo ai ma le paepae kilia.
Sa tu’itu’i mai Tinamatua i le faitotoa o le potumoe. “Ua e sauni!”
“Ioe!” Sa toe tuu ma le faaeteete e Marie ia maa i totonu o lana pusa.
Sa ave e Tinamatua ia Marie i le faletusi. Ae le na o le tilotilo i tusi. Sa i ai se faaaliga maa faapitoa na faia iina! Sa fiafia lava Marie.
Ina ua taunuu le la pasi i le faletusi, sa savavali atu i totonu Marie ma Tinamatua. Sa laua vaaia lea laulau ma lea laulau o maa matagofie. O nisi sa iila ma lamolemole. O isi o ni siepi mataina.
“Vaai foi i lea!” Sa tusi atu Tinamatua i se tioata(crystal) lapoa. Sa i ai ni nai tioata maamaai lanumoana laitiiti na lala mai ai i luga.
O le isi laulau sa i ai le tele o maa lapotopoto ninii. Sa tilotilo atu Marie i lanu uma. I le faaiuga, sa i ai se maa viole, laitiiti ma iila ma lamolemole.
E le’i iai sa’u maa viole o iai, sa mafaufau ai Marie. O le a fetaui lelei mo lana faaputuga.
Sa tilotilo solo Marie. Sa i ai Tinamatua i se isi laulau. E leai ma se tasi na latalata ane. Ma e leai se tasi o le a misia lenei tamai maa, a ea?
Sa pikiina e Marie le maa ma tuu i totonu o lana taga.
I lena po, faatasi ai ma le iai saogalemu o le maa viole i lana pusa o maataua, sa moe ai Marie.
“Sauni mo le taimi o le tala?” Sa saofai Tama i luga o le moega ma tatala le mekasini o le Uo .
Sa faapupuu Marie i totonu o lona palanikeke ma faalogo. O le tala sa faatatau i se tamaitiiti na salamo ina ua uma ona ia faia se filifiliga sese.
A o faitau Tama, sa lagona e Marie e pei ua felavasai lona manava i ni nonoa. Sa ia taavale atu i lona autafa, ona taoto atu lea i lona aluga. Ae, sa lei lelei ona lagona. Ma sa le mafai ona taofi lona mafaufau e uiga i le maa viole.
Sa faamaea e Tama le tala. “O seki oe?”
Sa le iloa e Marie po o le a le mea a fai. Afai na te ta’u atu ia Tama, atonu o le a ita o ia.
Ae atonu o le a ia iloa le auala e fesoasoani atu ai.
Sa tolotolo lemu atu Marie mai le moega ma aveese le maa viole mai lana pusa. “Sa ou aveeseina mai lenei mea mai le faletusi i le asō.” Sa maligi loimata mai mata o Marie. “Ou te matua faamalie atu.”
Sa tuu atu e Tamā ia te ia se opo lapo’a. “E le afaina i taimi uma le ta’u mai ia te a’u o le mea moni. Ou te mitamita ia te oe i le mauaina o le lototele e faamaoni ai.”
Sa amata ona lelei le faalogo a Marie i lona manava. Sa le ita Tama!
“Ma ona o Iesu, ua mafai ai ona tatou salamo. E pei lava i le tala,” o lana tala lea. “Aisea ta te le toe aveina ai le maa i le faletusi?”
Sa moeiini mata o Marie. “Leai! O le a latou feita.”
Sa tuu atu e Tama lona lima i luga o lona tauau. “Atonu latou te feita teisi. Ae ou te manatu o le a latou fiafia ona o le a e toe tuuina atu. Ma o le a sili atu ai foi ona lelei ou lagona.”
Sa manava loloa Marie ma luelue lona ulu. “Ua lelei.”
Na avane e Marie se fasipepa ma amata ona tusia se tusi. “Ou te faamalie atu i le aveeseina o lenei mea,” na ia tusi atu ai. “Maimau pe ana ou le faia. Ou te manaoe faasa’oa.”
Sa ia tuuina le tusi i totonu o se teutusi. Ona ia tuuina foi lea o le tamai maa viole i totonu.
“O le a ta toe faafoi lenei mea taeao,” o le tala lea a Tama. “O a ni ou lagona i le taimi nei?”
“Lelei atu,” o le tala lea a Marie. “E toe tasi lava le mea e tatau ona ou faia.”
Sa tootuli Marie i tafatafa o lona moega ma tatalo. “Ou te faamalie atu sa ou aveina le maa,” o lana tala lea. “O le a ou le toe gaoi lava. Faafetai ia te Oe mo le fesoasoani mai ia te au ia ou lototele ma faamaoni.”
A o toe foi atu o ia i le moega, sa lagona e Marie le filemu. O taeao o le a ia faasa’oina ai mea uma. Ma sa ia iloa o le a fesoasoani le Tama Faalelagi ma Iesu ia te ia. Ona o i Laua, o le a lelei mea uma.
Ata na tusia e Katie Rewse