“O Se Eseta e Manatua,” Uo, Mati 2024, 14–15.
O Se Eseta e Manatua
Sa lagona e Iona le alofa o Iesu a o pese o ia.
O lenei tala na tupu i Finelani.
Sa ata Iona a o ia mili ma ona uso i le potu malolo mo le afiafi faaleaiga. Sa ia sosogia pea le mamoe tao mai le taumafataga o le afiafi o le Eseta. Ma sa tumau pea ia te ia le tofo o le pasha suamalie, o la latou meaai suamalie masani o le Eseta.
Ina ua nonofo filemu le aiga, sa tu i luga le uso matua o Iona o Tristan.
“Manuia le Eseta!” Na fai mai ai Tristan. Sa ia amataina le latou afiafi faaleaiga i se pese ma se tatalo. Ona oo lea i le taimi mo le latou polokalama faapitoa o musika. Sa saunia e tagata uma se pese e uiga ia Iesu Keriso e faasoa atu.
Sa taina e Tristan le kitara, ma salu ma le faaeteete uaua taitasi. Ona ta lea e lona uso o Einar le piano. Sa fesiitai ona tamailima i ki. Sa taina foi e Tina, Tama, ma isi uso o Iona ni pese. Sa fiafia Iona e faalogologo i musika a lona aiga.
Mulimuli ane ua oo i le taimi o Iona. Sa ia matua mānava loloa ma amata loa ona pese.
“A faaoso au e fai mea sese, ou te usitai i le leo lemu e fai mai, ‘Ia fealofani e pei o Iesu.’”*
A o pese Iona, sa faatumulia lona loto i le alofa. Sa tumu ona mata i loimata o le fiafia. Sa pei na tau atu e le Agaga Paia ia Iona e alofa le Tama Faalelagi ma Iesu ia te ia.
“Faafetai lava mo le faasoaina atu o a outou taleni,” o le tala lea a Tama. Sa ia uuina i luga se ata. Sa faaalia ai Iesu Keriso o tootuli ma tatalo i tafatafa o se laau. “O ai e iloa le mea o loo tupu i lenei ata?”
Na sii le lima o Iona. “Iesu lena o loo tatalo i Ketesemane”
Na luelue le ulu o Tamā. “Ioe. O iina na Ia lagonaina ai o tatou tiga ma puapuaga uma lava.”
“Sa alu o ia i le Faatoaga o Ketesemane a o lei maliu o Ia,” o le tala lea a Tina. “Ina ua mavae Lona maliu, sa toe soifua mai o Ia. O vaega uma nei o Lana Togiola. Na faia e Iesu nei mea uma ona e alofa o Ia ia i tatou.”
Sa ki e Tina se vitio e uiga i le Uluai Eseta. Ina ua uma le vitio, sa filemu tagata uma mo se minute. Sa toe lagonaina e Iona le alofa o le Tama Faalelagi ma Iesu Keriso.
“Ua oo i le taimi mo la tatou gaoioiga?” Sa fesili atu ai Iona.
Sa tu i luga tina mai le nofoa ma alu i le kapeneta. “Ioe! Iona, e mafai ona e fesoasoani mai ia te a’u?”
Na aumai i fafo e Iona ma Tina le kelu, seleulu, ma se faaputuga o mekasini a le Ekalesia. Sa la’ua faasalalauina i latou i luga o le fola. Ona tuuina atu lea e Tina i tagata uma a latou api talaaga faapitoa o le Eseta. “Sei o tatou faia se ata o Iesu Keriso i a tatou api talaaga mo le Eseta.”
Sa saofai Iona i luga o le fola ma tatala lana api.
Sa piki i luga e Tama se peni e tusi ai i lana api talaaga. “I tafatafa o au ata, e mafai ona e tusia ai se mea o le a e faia e mulimuli ai i le Tama Faalelagi ma Iesu ina ia mafai ai ona e avea atili e faapei o i Laua.”
Sa susue e Iona ia itulau o se tasi o mekasini. Sa ia maua se ata o Iesu Keriso o ataata.
Sa oti ese e Iona le ata ma faapipii i le ogatotonu o lana itulau o le api talaaga. Sa ia mafaufau e uiga i le alofa atoa sa ia lagonaina mai le Faaola i lena aso. Ona ia tusia lea, “O le a ou mulimuli i le Tama Faalelagi ma Iesu e ala i le faalogo ia Tama ma Tina ma fesoasoani i feau. O le a ou alofa atili i o’u uso.” Sa ia uuina i luga e faaali atu ia Tina. Sa ia faitau i mea sa ia tusia ma ataata.
O le a manatua e Iona lenei Eseta mo se taimi umi. Sa ia lagonaina le alofa o Iesu Keriso ina ua ia pese ma aoao e uiga ia te Ia. Ma sa ia lagonaina le alofa o Iesu ina ua ia taumafai e avea e faapei o Ia.
E alolofa le Tama Faalelagi ma Iesu Keriso ia Iona. Ma sa alofa foi Iona ia i Laua.
Ata na tusia e Steliyana Doneva