“O Le Matuamoa ma Le Tamai Toloai,” Uo, Mati 2024, 4–5.
O Le Matuamoa ma Le Tamai Toloai
“Sa talanoa Iesu Keriso e uiga i lenei mea i tusitusiga paia,” o le tala lea a Tama.
O lenei tala sa tupu i le ISA.
E lima ni tamai moa fulufulua sasama na sioa atu i luga ia Clara. Pip, pip, pip!
O tautotogo taitasi e faatau ai e le aiga o Clara ni tamai moa e tausia. O le asō sa ia fesoasoani ai ia Tama e ave i latou i le fale e nonofo ma isi a latou moa.
O le auala sa latou tietie ai sa patupatu. Ae sa uu mau e Clara le atigipusa o le toloai i luga o ona vae. Sa ia milimili lemu se tasi o i latou i le tumutumu o lona tamailimatusi. Sa matua mu’amu’a lava!
Ina ua taunuu atu Clara ma Tama i le fale, sa la savavali atu i le fale o matuamoa i tuafale. O le fale o matuamoa o se tamai fale laitiiti lea sa nonofo uma ai matuamoa ma o latou faamoega.
“O ai le matuamoa e tatau ona tatou tuuina i ai le toloai?” O le fesili lea a Tamā.
Sa tilotilo solo Clara. O le tasi matuamoa o loo la’uina vaomago i se faupuʻega. O le a faia e le vaomago se faamoega mafanafana mo ni toloai fou. Atonu o le a avea o ia ma se matuamoa lelei.
“O le lea,” o le tala lea a Clara, ma faasino atu i le matuamoa.
Sa sii lemu e Tama se tamaimoa i fafo o le pusa ma tuu i tafatafa o le matuamoa. Sa tilotilo atu le matuamoa i le tamai moa. Sa ia sii i luga lona apaau, ma na faafuasei lava ona mou atu le tamai moa!
“O fea ua alu i ai o ia? O seki le tamai moa?” O le fesili lea a Clara.
Na luelue le ulu o tamā. “Vaai”
Sa autilo mai le tamaimoa mai lalo o fulu o le matuamoa.
“Aisea na faia ai e le matuamoa lena mea?” O le fesili lea a Clara.
“Ina ia puipuia le tama’i moa,” o le tala lea a Tama. “O le a ia tausia o ia ia saogalemu ma mafanafana i lalo o ona apaau.”
Sa fesoasoani Clara ia Tama e tuu isi toloai i lo latou matuamoa fou. Sa sii i luga e le matuamoa ona apaau e faapotopoto faatasi uma atu i latou.
“E te iloa, na talanoa Iesu Keriso e uiga i lenei mea i tusitusiga paia,” o le tala lea a Tama.
“E mo’i?” O le fesili lea a Clara. “O le a Lana tala?”
“O le a ou faaali atu ia te oe.”
Sa o atu Clara ma Tama i totonu o le fale. Sa aumai i fafo e Tama ana tusitusiga paia. Ona amata lea ona ia faitau.
“Ua faafia ea ona ou manao e faapotopoto mai outou e pei ona ofaofatai mai e se matuamoa lana toloai i lalo o ona apaau, pe afai tou te salamo ma foi mai ia te au ma le faamoemoe atoa o le loto.”*
Sa mafaufau Clara i toloai taitasi i lalo o fulu o le matuamoa. “O le a faapotopoto la i tatou e Iesu e pei o le matuamoa e aumai le toloai i lalo o ona apaau?” O le fesili lea a Clara.
“Sa’o lelei,” na fai mai ai Tama. “Na te tausia i tatou ia saogalemu, e pei lava ona tausia e le matuamoa le saogalemu o lana toloai. Ae Na te puipuia i tatou mai le sili atu nai lo le malulu. Na te silafia pe a tatou tiga pe mama’i pe faanoanoa. Na te tuuina mai ia i tatou le filemu ma le mafanafana. Na te tausia i tatou.”
O le taeao na sosoo ai, na fafaga ai e Clara le matuamoa ma lana toloai fou. Na mafua ai ona ia mafaufau i le mau na faitauina e Tama. Sa ataata o ia a o ia mafaufau e uiga ia Iesu. Sa ia iloa e alofa o Ia ia te ia ma tausia o ia, e pei o le matuamoa sa tausia le toloai.
Ata na tusia e Assia Ieradi