“Kāālet An Jabōt,” Jera, Juļae 2024, 4–5.
Kāālet An Jabōt
“Ta in kwojkwoj?” Anita ekar kajjitōk.
Bwebwenato in ekar waļo̧k ilo Iceland.
“Utiejļo̧k!” Evolett ekar ba n̄an eo m̧ōttan Anita. Raar lo ewi jon̄an utiej eo rej maron̄ kelōn̄ļo̧k iioon trampoline (kein kappin̄) an Evolett.
Innām, Anita ekar lukkuun utiej an kappin̄. Ke neen ekar bar jok, ekar kōm̧m̧an an Evolett kāllōn̄ļo̧k! Leddik ro jim̧or raar okjak laļļo̧k ioon trampoline (kein kappin̄ eo). Raar ettōn̄.
“Menin ekam̧ōņōņō,” Anita ekar ba. “Jemaron̄ ke bar ikkure ilju?”
Evolett ekar okjak likļo̧k kōn ālkin. “Aaet! Ij kōņaan.”
“Jemaron̄ ikkure ilo m̧ōn būbū.” Jibwin Anita ekar jokwe jejjo em̧ jān m̧ōn Evolett.
Innām Evolett ekar keememej raan eo tok juon ekar Jabōt. Liin ekar kōņaan etal n̄an Būraimere. Enaaj kar kam̧ōņōņō n̄an ikkure ippān Anita, bōtaab liin ekar kōņaan kōm̧m̧ane juon kāālet em̧m̧an.
“Ij kab keememej ke ijjab maron̄,” Evolett ekar ba. “Joļo̧k aō bōd. Ij etal n̄an jar ippān baam̧le eo aō ilju”
Anita ekar jutak im bar kappin̄. “Etke?”
Evolett ekar jino bar ekkāke. “Ekwe, Ij kōņaan ļoor Jisōs Kraist. Baam̧le eo aō rej etal n̄an jar aolep Jabōt n̄an katak kōn E im bōk kwojkwoj eo.”
“Ta in kwojkwoj?” Anita ekar kajjitōk.
“Ej n̄e kōmij m̧ōn̄ā juon m̧ōttan pilawe edik im idaake juon kab in aibōj edik n̄an keememej Jisōs Kraist,” Evolett ekar ba. “Innām armej ro rej kōnono kōn ekōjkan an Jisōs jipan̄ er. Im ālkin men eo, ewōr juon kūlaaj aorōk n̄an ajri ro!”
“Āinwōt ekam̧ōņōņō!” Anita ekar ba. “Imaron̄ ke iwōj?”
“Aeet!” Evolett ekar ettōn̄ dikdik.
Anita ekar ettōrļo̧k n̄an m̧weo n̄an kajjitōk ippān jibūn eļan̄n̄e emaron̄ kar etal n̄an jar ippān Evolett. Jibbon̄ōn eo tok juon, Evolett im baam̧le eo an raar ektake Anita ilo iaļ eo aer ļo̧k.
Ke raar tōparļo̧k m̧ōn jar eo, Evolett ekar kwaļo̧k n̄an Anita jikin eo. Liin ekar kwaļo̧k ruum̧ in Būraimere eo an, gym eo, im jikin jar eo.
Ejjab to ekar iien kweilo̧k in kwojkwoj eo. Evolett im Anita raar jijet ippān doon. Evolett ekar kajjieon̄ in ļōmņak kōn Jisōs Kraist ilo iien kwojkwoj eo. Innām raar ron̄jake kōnono ko.
Āliktata ekar iien n̄an Būraimere! Evolett ekar kwaļo̧k kadkad in Anita n̄an jet iaan ro m̧ōttan.
“En̄in ej eo m̧ōtta Anita,” Evolett ekar ba.
“Kōmij kanooj in m̧ōņōņō bwe kwar itok rainin. N̄a ij Sister Magnusson,” rūkaki in Būraimere eo ekar ba.
Ke Evolett im Anita raar ron̄jake katak eo kōn Jisōs Kraist, Evolett ekar en̄jake m̧ōņōņō itulowa. Liin ekar kōņaan pād ilo m̧ōnjar ippān Anita. Liin ekar oktakļo̧k im ettōn̄ dikdik n̄an Anita. Eo m̧ōttan ekar bar ettōn̄ dikdik ļo̧k.
“Kom̧m̧ool kōn am̧ karuwaineneik eō,” Anita ekar ba ilo iaļ eo n̄an m̧weo.
Evolett ekar m̧ōņōņō liin emaron̄ kar ļoor Jisōs Kraist. Im liin ekar m̧ōņōņō bwe Anita ekar kōņaan katak kōn E barāinwōt.
Ekar kam̧ōņōņō n̄an ekkāke iioon juon trampoline (kein kappin̄) im jepeļā imejatoto, bōtaab juon en̄jake okmāņāņ Evolett ekar en̄jake itulowa ekar em̧ool em̧m̧anļo̧k.
Kōmeļeļe ko jān Fiona Powers