“Raina Ej Bar Kajjieon̄,” Jera, Juļae 2024, 36–37.
Raina Ej Bar Kajjieon̄
“Ej iien eo āliktata inaaj bar kajjieon̄ jabdewōt men kāāl,” Raina ekar ba.
Bwebwenato in ekar waļo̧k ilo USA.
Raina ej riiti naan ko iioon juon peba jidikdik eo ilo jikuuļ eo an bar juon alen. Jiāe Essay: Wini juon tūreep ejjeļo̧k wōn̄āān n̄an New York City!
Ekar juon jiāe n̄an rijikuuļ ro ilo elōn̄ jikuuļ ko ilo eria eo. Raina ekar ļōmņak kōn e make ilo New York City, kōn skyscraper ko raittok ipeļaakin im Ekjab eo an Liberty eo epaak. Liin ekar kōņaan etal!
“Kwoj aikuj deļo̧n̄e,” Sydney ekar ba. “Kwoj rijeje eo em̧ōkade tata ilo grade eo ad!”
Naan ko an Sydney rekar kōm̧m̧an menin an em̧m̧an en̄jake eo an Raina. Liin ekar jab jeļā eļap kōn jeje essay ko. Bōtaab liin ekar kōņaan kajjieon̄.
Ālkin jikuuļ, Raina ekar jijet ilo tebōļ eo an. Den̄ōt, den̄ōt, den̄ōt. Liin ekar den̄ōtn̄ōt pinjeļ eo an ioon peba eo ke ekar ļōmņak kōn aitia ko an. Āliktata, liin ekar jino jeje.
Ekar bōk juon wiik likio n̄an an Raina kadedeļo̧k. Bōtaab kōn jet jipan̄ jān jinen, āliktata liin ekar en̄jake an pojak n̄an kōro̧o̧lļo̧k essay eo an.
Jejjo wiik ko raar eļļāļo̧k. Raina ekar lo̧udin̄din̄ n̄an lo wōn eo ekar bōk tūb eo. Bōlen ejjab to liin enaaj kar jibadōkļo̧k New York!
“Elōn̄ ļo̧k jān jibuki rijikuuļ ro raar deļo̧n̄,” Mr. Wright ekar ba jān im̧aan kūlaajruum̧ eo. “Kam̧m̧oolol n̄an kom̧woj aolep ro raar je juon essay.”
Menono eo an Raina kar im̧we kōn lem̧ōņōņō.
“Men̄e ejjeļo̧k juon iaan rijikuuļ ro am ekar wini jiāe in, Raina ekar juon ro ļalem ilōn̄ in aolep ro raar deļo̧n̄. Jeraam̧m̧an, Raina,” Mr. Wright ekar ba.
Raina ekar ettōn̄ dikdik ke rijikuuļ ro m̧ōttan raar kabbokbok. Bōtaab itulowaan liin ekar būrom̧ōj jiddik. Pād ippān ro ļalem ilōn̄ ekar jab em̧m̧an in wōt bōk tūb eo. Ettōņak eo an kōn lo New York ekar jako.
Ke Raina ekar tōparļo̧k m̧weo, liin ekar jijetļo̧k ilo juon jea ilo jikin kōmat eo turin ro jinen im jemāņ. “Ijab bōk tūb eo ilo jiāe eo,” liin ekar ba. “Ej iien eo āliktata inaaj bar kajjieon̄ jabdewōt men kāāl n̄an jidik. Inaaj kōm̧m̧ane men eo wōt ijeļā im̧ōkade ie.” Liin ekar pinej bōran kōn pā ko pein.
“Joļo̧k aō bōd bwe kwar jab bōk tūb eo. Jinōm̧ im n̄a kōmij jim̧or lukkuun utiej būruōm̧ro kōn am̧ kajjieon̄,” Jemān ekar ba. Jemān ekar jijetļo̧k turin Raina. “Kwoj keememej ke ke ikar jab jerbal ruo iiō ko remootļo̧k?”
Raina ekar em̧ajidjid.
“Ikar kanne n̄an elōn̄ jerbal ko im kar jab tōprak ilo aolepāer,” Jemān ekar ba. “Ekar bwe aō en̄jake ebbweer.”
Raina ekar ļōn̄aj bōran. “M̧ool ke?”
Baba eaar em̧ajidjid. “Bōtaab ikar jab bōjrak. Ālkin juon iien aitok, ikar lo juon jerbal eo me ekar jetjet. Bōtaab eban kar waļo̧k eļan̄n̄e ikar bōjrak jān aō kajjieon̄.”
Jinen ekar likūt pein kaenōm̧m̧an ilo ālkin Raina. “Kwojeļā ke ewōr jete bwebwenato ko ikar jilkinļo̧k n̄an māākjin ko rooktak jān doon?” liin ekar kajjitōk. “Im ewi lōn̄ in ko kar jab būki? Bōtaab ijjab maron̄ bōjrak eļan̄n̄e ij kōņaan lo jerbal ko aō aer jeje (publish). Jeje ej aorōk n̄an n̄a, kōn menin Ij kanooj kajjieon̄.”
Raina ekar aolep iien ļōmņak kōn ro jinen im jemān raar em̧m̧an ilo aolep men ko raar kōm̧m̧an. Liin ejjan̄in kar jeļā bwe raar bar jab bōk er barāinwōt.
Liin ekar būrom̧ōj wōt, bōtaab ekar jab āinwōt jajeļo̧kjeņ n̄an jab bar kajjieon̄e jabdewōt men kāāļ. Ekar jab ta eo Jemādwōj Ilan̄ ekar kōņaan n̄an liin. Raina ekar pepe bwe e enjab bōjrak. Liin emaron̄ kajjieon̄ elōn̄ļo̧k men ko, em̧ool men ko liin ekar jab em̧m̧an an kōm̧m̧ani.
“Ij ļōmņak inaaj delo̧n̄e bar jiāe eo iiō ne tok juon,” Raina ekar ba. Jab bōk tūb eo ilo jiāe eo ejjab kar aikuj in jem̧ļo̧k eo in an ettōņak ko an.
Raina ekar etal n̄an tebōļ eo an im kar kotak pinjeļ eo an. Jeje ekar bwe an kalimomo. Den̄ōt, den̄ōt, den̄ōt. Kōn menin ta men eo ekāāl liin emaron̄ kar jeje ālkintok?
Kōmeļeļe ko jān Vivian Mineker