“Eddōbokļo̧k ko Reļļap im Kōļar ko Remeram,” Jera Juļae 2024, 10–11.
Eddōbokļo̧k ko Reļļap Kōļar ko Remeram
“Etke Jemādwōj Ilan̄ ejjab kōm̧m̧an bwe ainikien ko reļlap ren jako?” Charlotte ekar kajjitōk.
Bwebwenato in ekar kōm̧m̧an ilo USA.
Charlotte ekar dike ainikien ko reļlap! Liin ekar jab kōņaan wāween eo ainikin ko raar jan̄ ilo lo̧jilin̄in ak kar epan̄ijn̄ij ilo bōran. Jekdo̧o̧n n̄e ekar jeļā ekar ejjeļo̧k jorrāān n̄ane, liin ekar en̄jake kankan n̄e waan ettōr ko rej kōjan̄ neer, jarlepju ko rej ekkelo̧k, ak tūram̧ ko rej bokkoļo̧k.
Im Charlotte ekar lukkuun jab kōņaan bojuļae ko!
Baam̧le eo an raar kajjieon̄ elōn̄ men ko n̄an kaenōm̧m̧an e ke ekar wōr ainikien ko reļaaj. Jemān ekar wiaik kein pinej lo̧jilin̄i ko rein juon n̄an jipan̄ pinej ainikien eo. Ke ekar wōr jourur, Jinen ekōn atbakwojļo̧k n̄an ippān ium̧win ko̧o̧j ko. Charlotte ekar barāinwōt jar kōn jipan̄ n̄an jab mijak.
Aolepān men kein raar jipan̄. Bōtaab ainikien ko reļļap rekab de kōm̧m̧an an en̄jake leļn̄o̧n̄.
“Kōmij etal n̄an juon iien kaloojoj bojuļae ilo baak eo bun̄niin,” Jinen ekar jiron̄ Charlotte. “Kwoj kōņaan ke itok?”
Charlotte ekar kōmmen̄. “Bōtaab bojuļae ko rekanooj in peran.”
“Kiiō ke kwo rūttoļo̧k, bojuļae ko remaron̄ in ļapļo̧k aer kalimomo n̄an alooji,” Jinen ekar ba. “Aolep ro m̧ōttam̧ renaaj pād ijōņ. Kōmij maron̄ bōktok kein pinej lo̧jilin̄i ko rein juon am̧. Kwoj ļōmņak kwomaron̄ ke kajjieon̄?”
Charlotte ekar bōk kūtuōn. “EM̧M̧AN. Ij ļōmņak inaaj kajjieon̄.”
Iien kaloojoj bojuļae ko ilo baak eo ekar em̧m̧an jinoin. Charlotte im ro m̧ōttan raar ettōr ion ujoj eo, kōjjebari kapije ko im ikkure ikkure ko. Ejjab to mejatoto eo ekar jino marok. Charlotte ekar jijet laļļo̧k im kōņak pinjen lo̧jilin̄ ko an ke ekar lale ilo ikūm̧kūm mejatoto eo.
BOOM! BOOM! CRACK!
Menono eo an Charlotte em̧ōkajļo̧k an emenono, im ubōn ekar en̄jake an kankan. Liin ekar kelōn̄ļo̧k im kar kajjieon̄ ko jān ainikein eļaaj eo ilo aolepān peļaakin.
Jinen ekar etal ļo̧kan Charlotte im kar kotak lōn̄ļo̧k e. Erro kar jijet laļļo̧k, im jinen ekar atbakwōj e. Dān in kōmjaaļaļ ekar wōtlo̧k jān turin mejān Charlotte.
“Joļo̧k aō bōd bwe ekar kamijak eok,” Jinen ekar ba. “N̄a e kiiō ijin. Jen kalimjōk kōļar ko bwe kwon jab kile ainikien eo ekanooj ļap. Ta eo kwoj loe kōn māj ko mejam̧?”
Charlotte ekar kōm̧m̧ane juon bōk kūtuwōn eļap. “Ij lo gold, im būrōrō, im maroro.”
“Kiiō kōjerbal bo̧tūm̧,” Jinen ekar ba. “Ta eo kwoj āt bwin?”
“Imaron̄ āt bwin baat im ujoj,” Charlotte ekar ba. “Im popcorn!”
“Bar ta men ko (sense) jet kwoj maron̄ kōjerbali kiiō?”
Charlotte ekar kiil māj ko mejān. “Ij maron̄ en̄jake er. Ke bojuļae ko raar bokkoļo̧k, ij maron̄ en̄jake an udiddid ilo ubō.”
“Kwoj maron̄ ke nemak jabdewōt?” M̧am̧a eaar kajjitōk.
Charlotte āktuweļo̧k loon. “lj jab maron̄ nemak bujuļae ko.” Liin ekar ettōn̄.
Aolepān men kein raar kōm̧m̧an an Charlotte kajnōt. Ekōjkan an armej ro kōm̧m̧ani kōļar ko rooktak jān doon? liin ekar ļōmņak. Etke bojuļae ko rej bokkoļo̧k? Ekōjkan aer kōm̧m̧ani jekjek ko rooktak jān doon? Bojuļae ko rejjab kanooj kamijak kiiō.
“M̧am̧a, bojuļae ko rekabwilōn̄lōn̄!” Charlotte ekar ba.
Ke jinen ekar kōko̧joojoj Charlotte ilo jikin an kiki bon̄ōn eo, Charlotte ekar kajjitōk, “Etke Jemādwōj Ilan̄ ejjab uwaaki jar ko aō n̄e ij kajjitōk Ippān n̄an kōm̧m̧an bwe ainikien ko reļļap ren jako?”
Jinen ekar ļōmņak ilo jidik iien. “Jemādwōj Ilan̄ ejjab aolep iien bōkļo̧k men rekamijak,” ekar ba. “Bōtaab jet iien E ej jipan̄ kōj kalimjōk men ko ilo juon wāween eoktak ak ej letok n̄an kōj armej ro me rej jipan̄ kaenōm̧m̧an kōj. ”
“Āinwōt An kar jipan̄ eō bon̄niin!” Charlotte ekar ba.
“Ejim̧we!” M̧am̧a ekar ettōn̄ dikdik. “Kwar etal n̄an iien kaloojoj bojuļae eo jekdo̧o̧n n̄e kwar leļn̄o̧n̄. Innām Jemānwōj Ilan̄ ekar jipan̄ eok kalur mijak ko am̧. E ekar barāinwōt jipan̄ eok lo aiboojoj eo an bojuļae ko kōn kōjerbal men ko (senses) ko jet am̧.”
Charlotte ekar ļōmņak kōn meram in kōļar ko ilo mejatoto eo im kar ettōn̄ dikdik. Liin ekar de jab kōņaan ainikien ko reļļap. Rej kamijake liin. Bōtaab liin ekar jeļā Jemādwōj Ilan̄ emaron̄ aolep iien jipan̄ e n̄an peran.
Kōmeļeļe jān Adam Howling