“Loļo̧k Būbū im Jim̧m̧a,” Jera, Juļae 2024, 30–31.
Loļo̧k Būbū im Jim̧m̧a
Ernesto ekar kōņaan kwaļo̧k ta eo ekar katak ilo Būraimere
Bwebwenato in ekar bōk jikin ilo Indonesia.
Ernesto ej bar door juon jōōt ilo pāāk eo an. E ekar reito reitak ipeļaakin ruum̧ eo. Bar ta ekar aikuj in bōke? E ekar lo Bok in Mormon eo an ioon tebōļ eo. E ekar jab maron̄ meļo̧kļo̧k men jab eo!
Ekar iien kakkūje ilo jōm̧ar. Baam̧le eo an Ernesto ekar itōn loļo̧k Jibūn im Jim̧m̧an. E ekar kanooj in lo̧udin̄idin̄ n̄an lo ro jibūn im jim̧m̧an.
Ke Ernesto im baam̧le eo an raar jikrōkļo̧k, Jim̧m̧an ekar leļo̧k n̄an e juon atbakwoj kileplep. “Ij lukkuun m̧ōņōņō bwe kwoj pād ijin!”
“Kōm kar on̄ kōn kwe!” Būbū ekar ettōn̄ dikdik im atbakwoj Ernesto barāinwōt.
“Ikar kōttar im kōttar n̄an rainin. Kōmij kōņaan lotok,” Ernesto ekar ba.
“Jen deļo̧n̄,” Jim̧m̧an ekar ba. “Jibūm̧ enaaj kōm̧m̧an aolep m̧ōn̄ā ko renno tata ippam̧.”
Ernesto ekar deļo̧n̄ļo̧k lowaan m̧weo ippān Jibūn im Jim̧m̧an. Ekar kanooj lo̧udin̄din̄ n̄an joļo̧k iien ippāer.
Jibbon̄ōn eo tok juon, Ernesto ekar jerkak n̄an nemake raij eo kōmat. Ekar lo an Jinen im Jibūn poub ilo jikin kōmat eo. E ekar mejānmaik jepeer erro jim̧or. Innām ekar ettōr nam̧ōj ļo̧k n̄an meļan m̧weo.
Jemān im Jim̧m̧an raar jijet im kōnono nam̧ōj, idaak jān kab ko.
“Iakwe in jibbon̄” Kwoj ke kōņaan jidik tii?” Jim̧m̧a ekar leļo̧k kab eo n̄iin n̄an Ernesto.
Ernesto ekar kalimjōk kab in tii eo innām Jim̧m̧an. Ekar kōņaan kwaļo̧k ta eo ekar katak ilo Būraimere. “Jaab, kom̧m̧ool, Jim̧m̧a,” e ekar ba. “Ikar katak ilo m̧ōn jar eo aō bwe, tii, kope, im jikka rejjab em̧m̧an n̄an ānbwin ko ad. Ikōņaan ļoor ta eo Jisōs ej kōņaan bwe in kōm̧m̧ane.”
Jemān ekar ettōn̄dikdik. “Baam̧le eo am ej pokake Naan in Mālōtlōt, bōtaab Jim̧m̧a eoktak an tōmak, im ej EM̧M̧AN.”
“Kom̧m̧ool kōn am̧ kwaļo̧k ta eo kwoj tōmak kake,” Jim̧m̧an ekar ba n̄an Ernesto. “Kwoj juon ļaddik em̧m̧an. Kwoj maron̄ bōk jidik dān bwil āinwōt jemam̧.” Jim̧m̧a ekar tein̄ kab in dān eo nimen Ernesto jān nien dān eo (kettle).
Ernesto ekar idak jidik. Ekar en̄jake m̧ōņōņō itulowa kōn kāālet jim̧we eo.
Ilo m̧ōņā in raelep eo, Ernesto ekar m̧ōn̄ā m̧ōn̄ā ko renno tata ippān. Jim̧m̧an ekar kōm̧m̧an nasi goreng, juon m̧ōn̄ā kōn rice, lep ko, jālele, im pijetebōļ. Ekar kanooj in enno. Im Ernesto ekar kōņaan kōnono n̄an Būbū im Jim̧m̧a ke raar m̧ōn̄ā.
Ilo ālkin raelep eo, baam̧le eo ekar ikkure em̧ooj ippān doon. Jekdo̧o̧n Jim̧m̧am im Būbū erro kar ikkure!
“Ij lo eok tulikin wōjke ņe, Ernesto!” Baba ekar ba, iaekwōj n̄an ippān. Ernesto ekar ettōn̄ ke ekar kajjieon̄ ko. Ikkure ippān baam̧le eo an ekar kalimomo.
Bon̄ōn eo, aolep rej jijet im jepoole Jim̧m̧a ke kwaļo̧k jet bwebwento ko. Ke Jim̧m̧an ekar m̧ōj, Ernesto ekar keememej bwe rejjan̄in kar riiti jeje ko rekwojarjar.
Ernesto ekar kelōn̄ ļo̧k. “Inaaj bar ro̧o̧l tok.”
E ekar ettōrļo̧k im bōk Bok in Mormon eo. Ke e ekar bar jepļaaktok, e ekar kajjitōk, “Jemaron̄ ke riit?”
“Ij m̧ōņōņō bwe kwoj keememej.” M̧am̧a ekar bōk bok eo jān Ernesto im kar elōkļo̧k n̄an eoon eo em̧m̧an tata ippān. Liin ekar kōļap an riit. Innām raar aolep bukwelōlō.
“Kwoj ke kōņan jar ippām?” Ernesto ekar kajitūkin jibūn im jim̧m̧an.
“Aaet, enaaj em̧m̧an,” Jim̧m̧a ekar ba. Liin ekar bukwelōlō turin Jim̧m̧a.
Baba ekar jar. Ekar kam̧m̧oolol Jemedwōj Ilan̄ bwe raar jolok iien ippān doon āinwōt juon baam̧le.
Ālkin jar eo, Jim̧m̧an ekar leļo̧k n̄an Ernesto juon atbakwōj eļap. “Em̧m̧an bwe baam̧le eo am̧ ej ja,r” e ekar ba. “Ij m̧ōņōņō bwe kwoj kōņaan in epakeļo̧k Anij. Enaaj jipan̄ baam̧le eo am̧ kajoor wōt.”
Ernesto ekar en̄jake okmeņeņ im aenōm̧m̧an itulowa. Ekar m̧ōņōņō in kwalo̧k tōmak ko an—juon men eo ekar kōņan—ippān Jibūn in Jim̧m̧an—armej ro ekar iakwe er.
Kōm̧eļeļe ko jān Melissa Manwill Kashiwagi