“Tieta kōn Jeje Ko Rekwojarjar,” Jera, Juļae 2024, 14–15.
Tieta kōn Jeje Ko Rekwojarjar
“Ta eo eļan̄n̄e jej diwōjļo̧k jān bo̧o̧k in kein ikkure ko n̄an raan in Jabōt?” Jonny ekar kajjitōk.
Bwebwenato in ekar bōk jikin ilo USA.
“Ijelimo.” Jonny ej babu ioon būļo̧o̧r eo an ettōņaak eo,
Leddik eo jein Jenna ekar kalimjōk nam̧ōj jān wintō eo. “Ejjeļo̧k men jemaron̄ kōm̧m̧ane,” liin ekar ba.
Jonny eaar reilōn̄ļo̧k n̄an jiļiin̄ eo. Etke Jabōt ko rekar jab āinwōt kam̧ōņōņō?
Innām ļeo ekar ļōmņak kōn juon men. “Ta eo eļan̄n̄e jej diwōjļo̧k jān bo̧o̧k in kein ikkure ko n̄an raan in Jabōt?” Jonny ekar kajjitōk. Bo̧o̧k in kein ikkure n̄an raan in Jabōt ekar juon bo̧o̧k aorōk eobrak kōn kein ikkure ko n̄an ikkure ilo Jabōt.
Turin mejān Jenna ekar em̧ōņōņō im medikdik. “Ekar āinwōt kam̧ōņōņō.”
Jonny im Jenna raar ekairirļo̧k n̄an ruum̧ eo an M̧am̧a. Erro kar iperļo̧k bo̧o̧k kileplep eo n̄an etōņaak eo.
“Ta eo jej aikuji kōm̧m̧an m̧okta ?” Jonny ekar kajjitōk. Ekar kōpeļļo̧k bo̧o̧k eo im kadiwōj jet iaan bok pija ko im juon kaat in ikkure.
“Jen ikkure kōn ikkure in kōmāājāj eo kōn ro rebun̄bun̄ ilo jeje ko rekwojarjar,” Jenna ekar ba.
Ikkure eo ewōr kaat ko ippān pija in rikanaan ro an Bok in Mormon. Jenna ekar kapedoik kaat ko ioon būļoor eo. Erro kar take doon kotak kaat ko im kajjieon̄ in pukōt ko rej reier wōt juon.
Jonny ekar kotak ruo kaat ko rooktak jān doon epād ie Kiaptin Moronai. “Ikar lo juon eo ejejjet!” e ekar ba.
“Bar n̄a!” Jenna ekar kotak ruo kaat ko rej kwaļo̧k Sariah.
Jonny im Jenna raar ikkure jejjo kōttan. Ekar kalimomo n̄an ļōmņak kōn bwebwenato ko aer rem̧m̧an tata jān Bok in Mormon.
Ālkin jidik iien, Jenna ekar ba, “Jen bar kōm̧m̧ane juon men.”
“EM̧M̧AN. Jen kōm̧m̧an āinwōt juon iaan bwebwenato ko ilo jeje ko rekwojarjar em̧m̧an tata ippād. Jenaaj kōm̧m̧an juon tieta kōn jeje ko rekwojarjar!” Jonny ekar jino kotak kaat ko.
“Aaet!” Jenna ekar jipan̄ ain kein ikkure eo im kakuņi.
Jonny ekar edede bo̧o̧k eo m̧ae iien eo ekar lo jet inaan nuknuk ko (costume). Ekar bōk to m̧ōņakņak epiran̄ran̄ im kōņake. “N̄a Samuel riLeman eo!” Ekar kelōn̄ļo̧k ioon juon jea im kar kōm̧m̧an āinwōt Samuel, katakin ilo depdep eo an jikin kweilo̧k eo.
Jenna ekar kōpeļļo̧k Bok in Mormon bok pija eo. Liin ekar etale peij ko m̧ae iien eo ekar tōpar Samuel Rikanaan eo. Liin ekar kōļap ainikien an riit ke Jonny ekar kōm̧m̧an āinwōt bwebwenato eo.
Ajri ro raar kōmālmele bwebwenato eo jejjo katten. Jonny ekar en̄jake okmāņāņ im m̧ōņōņō itulowa. Ekar en̄jake em̧m̧an n̄an keememej rikanaan ro me raar katakin kōn Jisōs Kraist.
Ke erro kar en̄jake ke repoojak, Jonny ekar ettōrļo̧k im bōk jinen, jemān, im leddik eo jatier edik Makenna. “Itok im lale am ikkure!”
Jenna ekar jutak ilo ioļapļap in ruum̧ eo kōn an pā ko pein erļo̧k leplep. “Ruwainene n̄an tieta in jeje ko rekwojarjar am. Rainin jenaaj kwaļo̧k bwebwenato eo kōn … Samuel riLeman eo!”
Innām liin ekar jino bwebwenato eo. “Juon iien etto, juon rikanaan kar etan Samuel ekar itok n̄an katakin riNipai ro …”
Ke ekar iien m̧ōttan eo an Jonny, ekar jutak kankan ioon jea eo. Ekar kōnono ilo juon ainikien ekoļap. “N̄a Samuel, im Jemedwōj Ilan̄ ej kōņaan bwe kom̧win kōm̧m̧ani kāālet ko rem̧m̧an. Bōjrak kōm̧m̧ani men ko renana. Kōnke ilo ļalem iiō ko Jisōs Kraist enaaj ļotak.”
“Kajoor eo an Anij ekar pād ippān Samuel,” Jenna ekar ba. Liin ekar kadedeļo̧k an ba aolepān bwebwenato eo. Ke ekar dedeļo̧k, M̧am̧a, Baba, im Makenna rekar kabokbok.
“Ekar baj em̧m̧an!” M̧am̧a ekar ba.
Jonny im Jenna raar badikdik. Ekar ļap aer ettōn̄.
“Jen bar kōm̧m̧ane juon tieta,” Jonny ekar ba.
“Kōm m̧ōņōņō in lale bar juon,” M̧am̧a ekar ba. Makenna ekar kabokbok im ettōn̄.
Jenna im Jonny raar iaekwōjļo̧k n̄an bo̧o̧k in kein ikkure ko ilo Jabōt n̄an ebbōk bar nuknuk in tieta.
“Jabōt ekalimomo! Ij kōņaan katak kōn jeje ko rekwojarjar,” Jenna ekar ba.
“Im Jisōs.” Jonny ekar ettōn̄ ke ekar lo bar juon nuknuk in tieta. Jabōt ekar lukkuun in juon raan ejenolo̧k!
Kōmeļeļe ko jān Shawna J. C. Tenney