“Ana Bong Patrik Ae Rangi ni Kabotu,” Te Rao, Tebetembwa 2024, 10–11.
Ana Bong Patrik Ae Rangi ni Kabotu
Tarin Patrik ake a ikawai a bon tatabetabe naba n taainako ao akea aia tai mangaia.
E riki te karaki aei i USA.
E tararake n taraa te tiiring Patrik ngke e wene ni karaababaa i aon ana kainiwene. E a rangi ni botu. E a tia ni wareware n ana booki i aon taekaia maan, e kibakiba i aon te trampoline, ao ni bwabwatika inanon te kaawa. Tera ae e na kona ni karaoia n te tai aei?
E teirake Patrik ao e nakon ana ruu tarina ae ikawai ae arana Daniel. “Ko aki kan takakaro ma ngai?” E titiraki Patrik.
“Kabwara te bure, I aki konaa. I riai ni kamatebwai,” e taku Daniel. E aki te roko n tararake man ana boki are warekia.
E a moanna n rawawata nanon Patrik. Daniel ai bon te kakamatebwai naba irouna n taainako. E a bon aki naba kona ni motirawa teutana?
O e tamaroa. E rangi n tatabetabe Daniel, ma e kona Patrik ni butiia tarina are temanna, ae Simion. “I a botu. Ko aki kan takakaro ma ngai?” E titiraki Patrik.
“I aki, tiaki n te bong aei. Iai nakonakou ma raoraou.” E karina bwaina ni kamariri Simon ao e otinako n te mataroa are mai i moa.
E a bon rangi n un Patrik! E bukibuki mwanawana. Tarina ake a ikawai a tatabetabe naba n taainako ao akea aia tai mangaia. E biri nakon ana ruu ni matu ao e a karebwetauaa te mataroa.
E bon aki riai te aro aei! E iango Patrik.
A kabukibukii rangana ao ni kiba nako aon ana kainiwene. Kanga e namakina ae e komakii bwaabwaana. E a bon rangi ni botu! Ma e bon rangi n un ngkai e na iangoa te bwai riki teuana ae e na kona ni karaoia.
Ngkanne iai te bwai ae e uringnga are e reiakinna man te reirei. A reireinaki iroun aia tia reirei bwa ngkana a ikerake ao e na buokiia n namakina te rau.
“E boni kangaanga ae ko na kanakoraoa te bwai teuana ngkana ko a bon rangi n un,” e taku. Ngke tao e kona n riki bwa te tia karekea te rau, e na kona riki Patrik ni kakaea te anga are e na kona ni karaoia are e na toki iai botuna.
Akea bwa e a kabanea ikerakena Patirik. E a manga ikerake riki. I mwiin ikerakena tabeua riki te tai, e a namakina te rau i bwaabwaana. Ma e aki ataa te bwai ae e na karaoia.
E tekateka ao e a taraa tamnein Iesu Kristo are e teke i aon te oo. Tera ae E tangiria bwa e na karaoia Patrik?
E katorobubua Patrik i aon bubuanwaena. “Tamara are i Karawa, taiaoka buoka Daniel ngkai e kamatebwai,” e taku. “Buoka Simion bwa e aonga ni kukurei ma raoraona. Ao buokai bwa N na aki namakina te botu.”
Ngke e a tia n tataro, e a reke ana iango Patrik. E biri nakon ana ruu Daniel.
“Daniel, ngkana ko a bon tia raoi, ti kona ni uaia n takakaro?”
E tararake Daniel mai i aon ana boki n taraa te tai are i aon te oo. “I kona ni motirawa teutana inanon 30 te miniti. Ngkanne ti kona n otinako nako tinaniku. “Ko tangiria ni karaoa anne?”
“Eng!” E moangare Patrik ao e biri n okira ana ruu. E kunea te boki ae rongorongon te man ae te taika are e kan mamataku n tamneia. I mwiin warewarena teutana te tai, e a manga anai taian kai aika bwaai n takakaro n takakaro iai. N te tai ae aki maan ao e a boo te tai, ao ngaia ma Daniel a rianna nako te tabo ae buakoako ae kaan ma aia auti.
“Ko tangiria ni kan takakaro n aroia taani buaka itinanikun karawa ke taan kakae n te buakonikai?” E titiraki Daniel.
“I aki tabe bwa tera. I tii rangi ni kukurei bwa ti kona ni kabanea ara tai ngaira ni kauoman. E a tamaroa riki nakon ae ai te titiku ni botu,” e taku Patrik.
E wiingare Daniel. “Eng, I rangi n unga riki n takakaro ma ngkoe nakon au kamatebwai ibukin te ukeuke.”
E namakina te kukurei Patrik ngkai ngaia ma Daniel a kawakawa ribuakon te uteute. Te tataninga n rau bwa aonga n nakoraoi bwaai e buoka te iango n te aro ae mataata riki bwa e aonga ni kona ni katoka ana kangaanga. Ao e a tia Tamara are i Karawa ni buokia bwa e aonga n riki n aron Iesu Kristo. E bitaki nakon te bong ae bon te kabanea n tamaroa.
Kamataata n te korotamnei iroun Linh My Nyguyen