“Te Bwaoki ae Kanoana Namakin n Raraoma” Te Rao, Tebetembwa 2024, 36–37.
Te Bwaoki ae Kanoana Namakin n Raraoma
E tabe Olivia ni katuua ana iango n raraoma.
E riki te karaki aei i USA.
E kawaekoa Olivia n otinako man ana kiraatiruum i mwaain bwaran te reirei. E kataia n aki kan taraa matan temanna ma temanna.
Ai bon tibwa ana moan bong Olivia n tutuo ibukin te aoraki n te bong aei. E kabwarabwara tinana bwa e na kaitibo ma te taokita are e kona ni buokia n aorakina ae te raraoma. E namakina te rararaoma ae bati Olivia. N tabetai e namakina te raraoma ngkai e bon kangaanga rereken matuuna ke ungana ma raoraona.
E rin inanon te kaa Olivia ma Tinana ao n tekateka n ana kaintekateka n akea ana iango.
“Ko raoiroi?” E titiraki Tinana.
E aki te roko ni kaeka Olivia n te tai anne. “Bukin tera ngkai N na nakon te taokita?”
E a kabuta te kaa Tinana. “Tamara are i Karawa e anganiira taian taokita bwa a na buokiira. N aron are E anganiira tabeua bwaai bwa e na buokiira, n aroia raoraora ao booki aika tabu. Ko uringa te tiein ni warekan booki aika tabu ake ti karaoi?”
E katoutoua atuuna Olivia. E buokia Tinana ni kakaei kiibu are e na kona ni buokiia ibukin raraomana. Ni kiibu n tatabeua nako, e koroboki Tinana ni kaota te tabo are a na kona ni manga kakaea te kibu are i mwiina. Ngkana e raraoma Olivia n te tairiki, e na bae n tataro ao ni kakaea teuana te kibu man booki aika tabu. Ngkanne e na bae ni wareki kiibu tabeua inanon te tiein ni karokoa are e a reke matuuna.
Ngke a rinnako Olivia ma Tinana n ana aobiti te taokita, Dr. Posy e kabwarabwara. E titirakina Olivia ibukin ana namakin. E kaota teutana aron ana namakin n raraoma Olivia.
“A mwaiti aomata ae e reke irouia te aekaki ni bwai ae raraoman te iango,” Dr. Posy e taku. “A rangi n rararaoma n aron ae e riki naba nakoim. Ma iai te bwai ae ko kona ni karaoia bwa e na buokiko bwa ko aonga n aki bati n raraoma. Ko kona ni kataa teuana mai iai ma ngai?”
E tarai ana kau Olivia ao e katoutoua atuuna.
Dr. Posy e angan Olivia te bwaoki ae uarereke. “Aei te bwaoki n raraoma. E kawakin raraomara ni kamanoi, bwa ti aonga n aki kona n iangoi.”
Olivia e raira te bwaoki nako aon baina. E taraa n ae tiaki te bwai ae onoti.
“N are i mwiina ngkana ko namakina te maaku, korea te bwai ae ko raraoma iai i aon te mwakoro ni beeba ao karinna inanon te bwaoki,” Dr. Posy e taku. “Ngkanne kakaea te tai are ko na kauka iai te bwaoki ni katoa bong n te tai n raraoma. Ngkana iai te bwai ae ko raraoma iai i mwaain te tai n raraoma, kangai, I aki manga kan iangoa te bwai aei ngkai.’”
“E Tamaroa” e taku Olivia. Dr. Posy e buokia ni korei baike e rangi ni korakora rararaomana iai, ao Olivia e karini inanon te bwaoki.
I mwiin te bong anne, e a manga tebenako naba teuana te raraoma mai atuun Olivia. E mena inanon te bwaoki n raraoma, e bon taetae nakoina. I kona n raraoma ibukin anne i mwiina. E kataia bwa e na aki manga iangoia. Irarikin anne e a takakaro ma mwaanena.
Ngke e nang boo te tai ni matu, e a nako nanon Olivia. Te tairiki bon ana tai riki n roko korakoran raraomana. E a katokaa ana bwaoki n raraoma ma ana boki aika tabu irarikin ana kainiwene ao e a wetea Tinana.
“Ngkana arona bwa e aki mwakuri aei?” e titiraki.
E inga nakoina Tinana. “Ngkanne ti na nanomatoa ni kataia. E na buokiko Tamara are i Karawa ni kunei riki kawai are a na rangi n ibuobuoki.”
E katoutoua atuuna Olivia. “Tao N na bon riai ni korea anne bwa kanoan au bwaoki n raraoma.”
“Te iango ae tamaroa,” e taku Tinau. E a tataro ma Olivia. Anne e buoka Olivia n namakina riki ae tamaroa.
Teutana te tai i mwiin tiringan te taura iroun Tinana, e a manga roko naba te raraoma i atuun Olivia. E kaura ana taura. E korei baike e raraoma iai ao ni karinna inanon te bwaoki bwa e na raraomakinna mwiina riki. E a manga tataro riki nakon Tamara are i Karawa ibukin karauan nanona.
Ngkana e a kauka ana boki ao e a kakaea te kibu ae e a tia ni kanikinaeaki man ana tiein ibukin booki aika tabu. Te moan are e kunea bon Itaia 41:10. E taku, “Tai maku, bwa I mena i roum.”
Irarikin te kibu, Tinau e korea “Reirei ao Berita 6:36.” E kakaea te kibu anne Olivia ao e warekia ni kabaibati. “Tanimai nakoiu n ami iango n taai nako; tai nanououa, tai maaku.”
E namakina te rau Olivia. E ataia bwa e na boni bae n iango naba n raraoma. Ma e a tia Tamara are i Karawa n anganna bwaai aika a mwaiti bwa e na buokia bwa e aonga n namakina te marurung. E a tia ni kaeka ana tataro. Ao anne bon te ibuobuoki ae rangi ni korakora!
Kamataatan te tamnei iroun Jennifer Naalchigar