“Te Mwakuri ni Karikirake ibukin te Tiaeanti” Te Rao, Tebetembwa 2024, 18–19.
Te Mwakuri ni Karikirake i aon te Tiaeanti
“E tangiria Tamara are i Karawa bwa ti na teimatoa ni kekeiaki.”
E riki te karaki aei i USA.
E kanooa riki ana bwaketi Bradley n teuana te mwangko n tano. Taraan ae e kainnanoa riki ae e mwaiti!
Ae e nang boo ana kaotibwai te reirei ibukin waaki ni karikirake ma kakatai ni bwain te tiaeanti. Iai te bwai ni kakairi ae karaoia Bradley ni kaotia bwa e kanga aron mwakurin te tsunami. E reiakinaki bwa te tsunami bon te nao ae rangi ni bubura are e riki man te maeiei inanon marawa. E tangiria bwa e na rangi n nakoraoi ana bwai are e karaoia. Tao e na kona ni karekea te kaniwanga!
Ngke e a onrake ana bwaketi, e rikorikoi tabeua taian kai Bradley. Ngkanne e a kunea te bwaketi te rabwa ao tabeua auti aika bwaai n takakaro n ruun te auti mai inano.
E kabwaroa te tano Bradley inanon te bwaketi bwa e na karika te aba. E karaua raoi ni nnei taian auti ma taian aroka. I mwiina ao e a kaoti te mwakoro ae moan te kakukurei—te ran! Ngke e kabwaroa inanona, e kooka te mwakoro ni kaatibooti rinanon te ran bwa e na karaoa te nao.
Ma ngkanne e a karaoa te kairua ae bubura. E a rangi ni mwaiti te ran ae kabwaroa! A bane ni ieka taian auti—ao e bon tuai naba tei ana nao. Te ran ane e mwaimwai e a nimnim, ma ni kabokaboka.
E wetea tinana Bradley inanon te umwanikuuka. “Tera ae N na riai ni karaoia ngkai? E rangi ni mwaiti te ran ae I kabwaroa.”
“E tamaroa anne. Ko kona ni manga moanna mai i moana,” e taku Tinau. “Ti a kaai ni karaoia ao ni baireia raoi teutana imwiin teutana.”
“E TAMAROA.” E baraaki ma te nanokawaki Bradley ao e otinako nako tinaniku bwa e na anaa riki te tano.
N te tai aei a karaua raoi ni bairea mwaitin te ran ao ni kabwaroa nako nanona. E kamwainga te katibooti Bradley ao ni matakuakina te nao ngke e kauntaba ma te tano. E mwakuri!
I mwiina ao e a mwakuri Bradley ma tinana i aon ana boutita. E a moanna ni korei tabeua koaua aika a kaunga n taekan te tsunami. Ma e aki tau ana koroboki i aon te iteraniba.
“I aki tangiria bwa N na manga moan koreia riki!” E taku Bradley. E a moanna ni maraki atuuna.
“Ti aki tangiria bwa e na manga moan koreaki riki,” e taku Tinau. “Ti kona n tii kauarerekea taekana e aonga n tau i aon beebana.”
E bwangurengure Bradley. E aki roko raoi taraan ana boutita n aron are e tangiria. “I aki tangiria ni kan karaoa anne. E na bon tarabuaka ngkana e aki bane raoi taekana i aona.”
“Aron te reirei e kona ni kangaanga.” E rabwataki iroun Tinana. “N tabetai ti karaoi kairua. Ma te bwai ae rangi ni kakawaki bwa ti na kabwarai nanora. E tangiria Tamara are i Karawa bwa ti na teimatoa ni kekeiaki. Ngaia are ti na karekea ara tai ni motirawa ao ni katiaa n te moaningabong.”
N te bong are i mwiina, ao e a tia aia boutita. E aki rangi ni kororaoi taraakina, ma e namakinna Bradley bwa iai te tamaroa teutana.
N tokin te tai ao e a ria bongin te kaotibwai ibukin te tiaeanti. E nikiraki Bradley n te reirei iroun Tinana. “Uringnga,” e taku, “ko a tia ni mwakuri korakora i aon am karikirake ao n reiakina ae mwaiti. Ao anne te bwai ae kakawaki.”
E uota ana bwai are e karaoia Bradley nakon te gym ae bubura. E bon onrake ni bwaai ni karikirake ao n taian boutita. Kaain te kaaua ni koraki a tekateka ao a tataninga aia tai ni kaotibwai.
N te tai ae aki maan ao e a roko n ana tai Bradley. E bukibuki manawana ngke e rianna nako mooa. Ai tera ngkana arona bwa aki nakoraoi bwaai ni kabane?
E kooka te kaatibooti Bradley rinanon te ran ao ni kaotia nakoia taan taubwii bwa e kanga aron te nao ngkana e kauntaba ma te aba.
“Tera ae karikii naao aika a bubura akanne inanon marawa?” e titiraki temanna te tia taubwii.
“A riki taian nao man …” Akea bwa e a bua kanoan ana iango Bradley. “I aki kona n uringnga. Ma I kona n tuangkami tabeua koaua ibukin te tsunami.” E wareki nakoia taian koaua ake a mwakoro i aon ana boutita.
I mwiin te reirei e toka i aon te kaa Bradley ma ana bwai.
“Ao e uara?” E titiraki Tinana.
“E aki roko raoi n te anga are I tangiria.” E moangare Bradley. “Ma I karaoa au kabanea n tamaroa ao ni keiaki ni kataia.”
Kamataatan te tamnei iroun Adam Koford