Koreaki Iroum

Taian Uee ibukin Kaain Rarikiu

Iroun Peter E., 10 ana ririki, Utah, USA

Tabeua te ririki n nako, e mate buun te aine ae kaain rarikiu. E rangi n nanokawaki neiei.

I ataia bwa aekakira aron te namakin ngkana e bua maiun temanna ae ko tangiria. Ngke teniua au ririki, e mate tinau. I mwiin matena, ataei ake kaain rarikiu a korea aia taeka n rainanoanga nakoiu ma tariu ao a katamaroaa tinanikun ara auti n taian bwai n takakaro. I tangiria ni karaoa ae bon tau tamaroana ibukin kaain rarikiu aei.

I tataro ni kan ataia bwa tera ae I kona ni buokia ni karaoia. E a reke au iango bwa N na anga taian uee nakon te aine anne n Tain te Valentine. Ma e ngae n anne, e riai n iai au mwane bwa N na kabooi taian uee. I a karaoa nanon te kouru man Aia Bokinikairi Ataei bwa e aonga n reke au mwane.

E a reke au mwane man karaoan mwakuri aika a kakaokoro ibukiia tabeman. E kabooai tibu te unaine bwa N na kaitiaka ana onaroka ao maangen tinanikun ana auti. Ni mweengau ao e reke au karekemwane man kaitiakan te buakoako ae mena itinanikun ara auti ni bwai. Tao bon iraua namwakaina ae bane n te beku korakora ae ngaia ae e a reke te mwane ae tau.

N tokin te tai e a tau au mwane ni bobwai n te titoa ni kabooi taian uee. Ngke e a ria Bongin te Valentine, ao I angan kaain rarikiu taian uee ma taekana ae mwakoro i aona. E bon rangi ni kukurei. I namakina te rau ao ni kukurei naba. I karabwa Tamau are i Karawa ngke e buokai ni karaoa te bwai are E tangirai bwa N na karaoia.

Tamnei ni kamataata iroun Dave Klüg