“Juon Karōk eo Ekwojarjar n̄an Erom̧ Em̧m̧anļo̧k,” N̄an Kōkajoorļo̧k Jodikdik ro, Juļae 2021, 2–5.
Juon Karōk eo Ekwojarjar n̄an Erom̧ Em̧m̧anļo̧k
N̄e jej lo mour wabanban ilo mour in, jej lo ke ejjeļo̧k kajjitōk “n̄an pād ie ak jab pād ie?” ak ijoke “n̄an erom̧ em̧m̧anļo̧k ak n̄an jab erom̧ em̧m̧anļo̧k?”
Ikar jeraam̧m̧an ilo aō kar pād ippān kōrā eo ippa ilo iien an kōmouri kajjojo ajri ro nejimro im bar pād ilo iien mej eo an jinō im jema. Ikar bwilōn̄ kōn en̄jake eo iaar en̄jake ilo iien ļotak im ilo iien mej. Iaar en̄jake ke juon men ekwojarjar ekar bōk jikin. Iien ko ad ilo mour in ej juon m̧ōttan eo eaorōk ilo ad pād im mour ilo laļ in. Lan̄ ej kōkkaļļeiki jinoin im jem̧ļo̧kin kajjojo mour ilo mour in.
Ta eo jej aikuj in kōm̧m̧ane ilo ad pād ioon laļ in emaron̄ itok wōt ilo ad jeļā ta eo ekar waļo̧k m̧okta jān lo̧tak im ta eo enaaj waļo̧k ālkin mej. N̄e mour eo ad ioon laļ ewōr tokjān, jemaron̄ aolep “m̧ōn̄ā, idaak, im lan̄lōn̄” (2 Nipai 28:7) ilo ejjeļo̧k uwōta kōn ro jet. N̄e jej lo mour wabanban ilo mour in, jej lo ke ejjeļo̧k kajjitōk “n̄an pād ie ak jab pād ie?” ak ijoke “n̄an erom̧ em̧m̧anļo̧k ak n̄an jab erom̧ em̧m̧anļo̧k?”1
Meļeļe karōk in lo̧mo̧o̧r eo—mour eo ad m̧okta jān mej, jibadbad in mour eo ad ioon laļ in, ad mour ālkin mej—im jerbal eo eaorōk me ad Rilo̧mo̧o̧r, Jisōs Kraist, eaar kōm̧m̧ane ilo karōk eo me ej kwaļo̧k n̄an kōj bwe E enaaj jipan̄ kōj ilo mour in. Ilo ad kōm̧m̧ani bujen ko Ippān, jej likūt kōj ilo iaļen bujen in—im jej erom̧ eļapļo̧k āinwōt E im Jemedwōj Ilan̄, jidik kōn jidik.
Mour eo Ad Mokta jān Mour In
Revelesōn ko rej katakin kōj bwe jaar ajri in jetōb ro nejin Anij im bwe jaar mour Ippān etto m̧okta jān ad kar itok n̄an laļ in. Jemedwōj Ilan̄ eaar kōpooj juon iaļ bwe jen erom̧ āinwōt E. Ro raar kālet karōk in lo̧mo̧o̧r eo an Jemedwōj Ilan̄ ak karōk in lem̧ōņōņō eo ilo mour eo m̧okta—ej kōj aolep—kar kālet n̄an “erom̧ em̧m̧anļo̧k.”
Elder Christofferson ippān kōrā eo ippān im ajri ro.
Mour eo Ad ioon Laļ in
Jaar itok n̄an juon laļ me kar kōm̧anm̧an jen Anij im Nejin, Jisōs Kraist. Jaar bōk juon ānbwin kanniōk. Bōk juon ānbwin eaorōk n̄an bōk aiboojoj eo me Anij ej m̧ōņōņōiki. N̄e jej kwaļo̧k bwe jenaaj pokake kien ko an Anij, jenaaj “bōk aiboojoj kobaikļo̧k [ioon] bōrad indeeo im indeeo” (Ebream 3:26). Meļeļein jenaaj erom̧ āinwōt jined im jemed ilan̄ im mour ippāer indeeo. Jaar lam̧ōj kōn lan̄lōn̄ ilo aiboojoj kein.
Kwe im n̄a ekar to ad kōttar, ak kiiō jej pād ijin ioon laļ in. Jej reim̧aanļo̧k n̄an tōreen n̄e jenaaj jerkakpeje kōn juon ānbwin ewāppen, jab wanbanban n̄an deļo̧n̄e laļ eo an celestial n̄an m̧ōņōņōik mour indeeo—juon men eo eaiboojoj jejjab maron̄ kōtmene. Ilo tōrein, jej ekkatak im kajjieon̄ n̄an “kōm̧m̧ani aolep men ko jabdewōt [ad] Irooj Anij enaaj jiron̄ [kōj]” (Ebream 3:25). Kōnke jejeļā karōk eo an Anij, jejeļā bwe kien kein kar litok rejjab kipel anemkwoj in kālet ak m̧ōņōņō eo ad—baj oktakin. Kien ko rej kein tōl n̄an anemkwoj im lan̄lōn̄ ilōn̄tata.
E ekar Letok juon Rilo̧mo̧o̧r
Aaet, mour in epen. Jej aolep kōm̧m̧an bōd ilo ad ekkatak n̄an mour kake tōmak. Ak Anij eaar kallim̧uri kōj m̧okta jen kōm̧anm̧an eo an laļ in ke E enaaj letok juon Rilo̧mo̧o̧r n̄an lo̧mo̧o̧ren kōj jān jerawiwi im mej. Kōn en̄taan im mej eo An make—Pinmuur eo An—Jisōs Kraist eaar kōļļāik wōņāān jerawiwi ko ad im letok n̄an kōj menin letok eo an ukweļo̧k. Kōn menin, n̄e jej ukweļo̧k, E ej jeo̧rļo̧k jerawiwi ko ad im karreoik kōj jān jekjek ko aer. Im jen jerkakpeje eo An, Rilo̧mo̧o̧r eaar letok n̄an kōj menin letok in jerkakpeje eo ad make im mour jab wabanban.
Every Knee Shall Bow,] jān J. Kirk Richards
Etetal ilo Iaļen Bujen
Ilo iien eo wōt jej ļotaktok n̄an mour in, jej aikuj in bar ļotak ilo jetōb n̄an aelōn̄ in lan̄. Jej kōm̧m̧ane menin ilo ad kōjerbal tōmak ilo Kraist, ukweļo̧k, peptaij, im bōk menin letok eo an Jetōb Kwojarjar. En̄in ej juon ijjino in oktak an jetōb ilo aolepān mour in ad ioon laļ in. Jet iien jej ņaetan “niknik n̄an jem̧ļo̧kin” eo ej meļeļein bwe jej kajjieon̄ in kōjparok bujen peptaij eo ad n̄an pokake ilo mour ko ad, ukweļo̧k n̄e ekkar im wōnm̧aanļo̧k wōt. “Aaet, im jon̄an an emakijkij in wōt an armej ro aō ukeļo̧k Inaaj jeorļo̧k aer bōd im bōd ko aer ņae Eō” (Mosaia 26:30).
Kwomaron̄ Kōjatdikdik kōn Jipan̄ an Anij
Ilo mour eo am̧ m̧okta jān ļotak, kwaar kālet Anij, kwaar kālet Kraist, kwaar kālet n̄an “em̧m̧anļo̧k” kōn jipan̄ eo Aer. Im kwomaron̄ kōjatdikdik kōn jipan̄ eo Aer. Ro rej uwaan doulul in Anij rej itok limo in rikōjparok mour ko ad. Rej iakwe kōj eļap im rej kōjerbal kajoor ko aer n̄an jipan̄ kōj, n̄e jenaaj kōtļo̧ki. Rej aolep iien rie anemkwoj eo ad, ak Rej kijerjer in kōjeraam̧m̧an kōj. Jisōs eaar jiron̄ kōj, “Ijamin meļo̧kļo̧k eok, O m̧weo im̧ōn im̧ōn Israel” “Lo, Iaar jeje etam̧ ioon lo̧piden pā ko peiū” (1 Nipai 21:15–16).
Erom Em̧m̧anļo̧k Jidik kōn Jidik
Jet rej ļōmņak bwe laļ eo an celestial ej kōjatdikdik eo em̧ool n̄an ro jet ak jet ejjab n̄an er. Mool eo in, bwe ejjeļo̧k en ekkar n̄e ejjab jouj eo an Jisōs Kraist. Kam̧m̧oolol, kwomaron̄ bōk jouj eo An. Jisōs eaar jiron̄ kōj bwe E eaar anjo̧ jān laļ in. Kōn peptaij eo am̧ im bujen ko jet, kwoj leļo̧k kwe make n̄an E bwe kōn E, kwon barāinwōt anjo̧ jān laļ in.
Kwojjab aikuj in bōk weppān ijin ioon laļ in. Rikanaan Josep Smith ekar keidi n̄an tallōn̄e juon jikin uwe: kwoj jino ilo laļtata im tallōn̄ lōn̄tak jidik kōn jidik ilo ekkatak im mour kake pedped in katak ko. Im bwe ekkatak, eo ekar kwaļo̧ke, ej wōnm̧aanļo̧k wōt ilo mour in—“ejjab aolep naaj keidi ilo laļ in.”2
Jekdo̧o̧n m̧ōjņo̧ ko, apan̄ ko, ak en̄taan ko jej jelm̧aiki ioon laļ in, Anij ej kallim̧uri ro Nejin retiljek bwe ejjeļo̧k kōjeraam̧m̧an naaj bōjrak n̄e jej pād ilo iaļen bujen in (ak m̧ōkaj in ro̧o̧ltok). Innām aolep men renaaj em̧m̧an. En̄in ej juon karōk ekwojarjar n̄an erom̧ em̧m̧anļo̧k!