“Elmen aō maron̄ bōjrak jān aō kajjitōk kōn aorōk eo aō?” N̄an Kōkajoorļo̧k Jodikdik ro, Juļae 2021, 30–31.
Kajjitōk ko im Uwaak ko
“Elmen aō maron̄ bōjrak jān aō kajjitōk kōn aorōk eo aō?”
Kōn Mej ko mejān Jemedwōj Ilan̄
“Aolep raan, Ij jar n̄an Jemedwōj Ilan̄ im kajjitōk Ippān n̄an jipan̄ eō lo eō make ilo wāween eo Ej lo eō. Innām ij lukkuun ron̄jake ilo an Jetōb letok ennaan ko rem̧m̧an jān Anij kōn aorōk eo aō im piktokū, im ij ba naan kein n̄an eō make ilo kūlaaj eo. Makūtkūt in epidodo ej juon wāween jemaron̄ ekkeijel ippān lan̄ im jeļā bwe Jemedwōj Ilan̄ im Jisōs Kraist rej iakwe kōj im tōmak ilo kōj.
Madeleine M., 14, New York, USA
Iakwe Oktak ko Ad
“Iien otemjej ij kōm̧m̧ane ijo em̧m̧antata ippa n̄an keememej bwe ij juon nejin Anij ejitenbōro. Ij kajjieon̄ in jab keidi n̄a make n̄an ro jet, kōnke ekōm̧m̧an bwe en penļo̧k aō tōmak aorōk eo aō. Anij ekar kōm̧anm̧an im kaiboojoj kōj aolep ilo wāween eo ad make, im oktak ko rej jet men rem̧m̧an.”
Brooke D., 14, Alberta, Canada
Kōjeraam̧m̧an ej Kōjeraam̧m̧an
“Ekkā ad ļōmņak kōn m̧ōjņo̧ ak bōd ko rekōm̧m̧an ad jab aorōk. Ilo m̧ool, jaar jeraam̧m̧an bwe jen maron̄ anjo̧ jeni im erom̧ em̧m̧anļo̧k ilo kōj make kōn ettā im em̧m̧anļo̧k eo an juon make. N̄e jej jerbali men ko me reppen n̄an kōj, Irooj enaaj loe im nōbar kijejeto ko ad. Ej kōn wōt kajjieon̄ im jab ebweer.”
Ricardo R., 17, Chihuahua, Mexico
Mour Kwojarjar eo Ad
“Ejjeļo̧k men kwomaron̄ keidi n̄an jeļā bwe āinwōt ro nejin Anij eo emour, jemaron̄ erom̧ āinwōt E. Ekar ukot aolep men! N̄e jej būki ļōmņak ko renana me ekōm̧m̧an ad kajjitōkin aorōk eo ad, keememej bwe ļōmņak ko rej itok jān Setan, ejjab Anij. Ewōr ippād aorōk ejjeļo̧k jem̧ļo̧kin im juon mour kwojarjar, āinwōt Jemedwōj Ilan̄. Ej lōke im iakwe kōj kajjojo.”
Alexandre S., 16, Minas Gerais, Brazil
Eddo eo Eļap
“Ilo aō kajjieon̄ in ekkatak im kōļmenļo̧kjeņ kōn jeje ko rekwojarjar im naan ko an rikanaan ro remour, imaron̄ kam̧ool kōn Jetōb Kwojarjar eo ippa, eo ej kakeememej eō ke ij juon leddik eo ejitenbōro nejin jined im jemed ilan̄ im bwe Anij ewōr an karōk eļap n̄an eō. Būreejtōn Nelson ej aolep iien kwaļo̧k n̄an kōj eddo eo eļap ilo raan kein āliktata im bwe Anij ej lōke kōj im ejeļā ta eo ekkar n̄an e.”
Mirian P., 16, Paraná, Brazil
Kōm̧m̧ani Men ko Rem̧m̧an Ippam̧
“Ilo ad jino kajjitōkin aorōk eo ad make, jemaron̄ aolep iien pukot jipan̄ jān armej ro jet. Ak m̧oktata, jemaron̄ jino etale paoktokid make. Jemaron̄ kejjemourur, iiaio̧ ippān ro m̧ōttad im baam̧le ilo wāween ko repolemen, ak kōm̧m̧ani m̧akūtkūt ko me jej m̧ōņōņōiki. Menin ejipan̄ kōj kile bwe jej ro nejin Anij, eo ej letok aorōk n̄an kōj im taļōn.”
Carlos V., Mexico
Jeļā Kwe Make
“Iaar lo ke epidodo n̄an iakwe eō make kōnke iaar bōk iien n̄an pukote wōn n̄a. Jim̧m̧aō eaar jiron̄ eō juon iien, “Kwoj aikuj mour kōn kwe make n̄an mour indeeo, bwe kwon maron̄ in juon eo kwoj kōņaan iiaio̧ ippāer.” Iaar ļoor kapilōk eo im iaar kajjieon̄ in erom̧ armej eo em̧m̧antata ilo n̄a make. Kiiō ij en̄jake lōke bwe ijeļā ta eo ikōņaan, ta eo ijeļā, im ta eo ij jutak kake. Ij en̄jake m̧ōņōņō n̄e ij kajjieon̄ in erom̧ armej eo Jemedwōj Ilan̄ ekōņaan bwe in āinwōt.
Sarah Keenan, Utah, USA
Keememej Wōn Kwe
“Ij ļōmņak kōn al eo an būraimere “N̄a Nejin Anij.” Ej kakeememej eō ke em̧ōj letok n̄an eō menin letok ko im taļōn ko n̄an jipan̄ laļ in kōppopo n̄an Itok eo Kein Karuo an Irooj. Kajjojo m̧ōttan rekkar im aorōk, im jej aolep menin kabwilōn̄lōn̄ ilo kajjojo mour an ro jet em̧ool Kwoj juon menin kabwilōn̄lōn̄ ilo mour in n̄an kajjojo ro ipeļakūm̧. N̄e kwomeļo̧kļo̧k, ļōmņak kōn aolep men ko Jisōs ekar kōm̧m̧ani ioon laļin im kajjieon̄ in ļoor waanjon̄ak eo An. Jekdo̧o̧n kwoj būrom̧ōj ak jaorōk, pukot juon eo ej en̄jake ejja rot in.
Brigham M., Mexico
Naan eo Ekwojarjar
“N̄e ij ron̄jake Anij, E ej jipan̄ eō bōjrak jān kajjitōkin aorōk eo aō make. Armej ro jet rejjab lukkuun meļeļe aorōk eo aō, ak Anij wōt, im ij lōke E. N̄e ij kōtļo̧k an armej ro peek aorōk eo aō, aolep men ij kōm̧m̧ane ej dāpdep wōt ilo naan ko aer im ļōmņak ko rej bōklaļ eō make. Ak n̄e ij jab ron̄jake naan ko aer renana, ijjab bar kajjitōkin aorōk eo aō. Ijeļā bwe ijjab aikuji bar naan ko aer. Kōj kajjojo ewōr make ad aorōk āinwōt ro nejin Jemedwōj Ilan̄. Jej aikuj in kakeememej kōj make, eļaptata n̄e ejjeļo̧k juon ej kōm̧m̧ane.”
Anna G., 23, France
Peran kōn Gospel in
“Ilo social media, Ij lo elōn̄ kain armej ro reweppān, ak bōlen rem̧m̧anļo̧k jān eō. Mour kake gospel in ejipan̄ eō kōļapļo̧k juon m̧wiļ kōn kam̧m̧oolol kōn wōn n̄a. N̄e ij mour kake gospel in āinwōt tōmak, ukweļo̧k, im kōļmenļo̧kjeņ kōn jeje ko rekwojarjar, ijenoļo̧k. Ijjab aikuj in keidi n̄a make n̄an ro jet, im āliktata, eļap peran ippa.
Alexandra R., Mexico
Jeorļo̧k Am̧ Make Bōd
“Jejjab aolep iien ļōmņak jeaikuj jeo̧rļo̧k bōd, kōnke jejeļā kōn bōd eo jaar kōm̧m̧ane. Ak kōj armej—jej kōm̧m̧an bōd im jenaaj kōm̧m̧ani wōt. Jej aikuj in jeo̧rļo̧k ad make bōd, kōnke aolep rej bar aikuji juon alen. Jej aikuj in lale kōj make kōn mej ko mejen armej ro rej iakwe kōj. Jenaaj lo armej eo ekkar im kabwilōn̄lōn̄ me ej letok iakwe eo ejjeļo̧k jem̧ļo̧kin jekdo̧o̧n ta.
Valerie J., Mexico