“7 Men ko Reļam Waan n̄an juon Mour Elem̧ōņōņō,” N̄an Kōkajoorļo̧k Jodikdik ro, Juļae 2021, 8–11.
7 Men ko Reļam Waan n̄an juon Mour Elem̧ōņōņō
Bun̄ten ne ko repidodo kwomaron̄ kōm̧m̧ani kajjojo raan n̄an kobaiki n̄an juon mour em̧ōņōņō.
Kōmeļeļe ko jān Katy Dockrill
“Lale! Iaar kōm̧m̧ane n̄an kwe!” ļaddik eo nejū ekar ba ke ekar jim̧we an jibwe pija eo im̧aan meja. Peba eo ekar itaak botu im ekar tab kōļarin. Ekar pen aō lo aolep men.
Ke ij bōke pija eo, tab in kōļar ko ekar kōm̧m̧an bwe in lali.
“Ta eo kwoj loe?” eaar kajjitōk.
Ļaddik eo nejū eaar jerbal elōn̄ awa ko n̄an pijaik ta eo ekar ļōmņake ekar juon pija em̧ool kōn kom̧ro—ijoke kolōn bōra ejjab ialo̧.
“Ejabwe m̧ōņakņak ippa,” eaar likūti. “Ak ialo̧ ej juon kōļar elem̧ōņōņō.”
Ke ij lukkuun kalimjōk būrojāāk eo an, ewi jon̄an em̧m̧an in an ļaddik eo nejū jin̄aik pija in. Ijjab maron̄ in bwine oraņ men ko reļam waan. Ekanooj lōn̄. Im em̧ool, iaar m̧ōņōņō—
Ļōmņak kōn juon jin̄a em̧ōj am kar loe. Kwoj loe ejjeļo̧k juon men eļam waan me ekōm̧m̧an bween aiboojoj. Ilo m̧ool, n̄e kwoj kalimjōk kajjo iaan men ko reļam waan kaki make, ejjab ke em̧m̧an. Ijoke, n̄e kwoj kobaik er aolep, kwoj jino jin̄a.1
Pukot lem̧ōņōņō ilo mour in ej āinwōt jin̄a. Ewōr ko reddik, jibadbad in men ko reļam waan, ak kajjojo m̧akūtkūt ko, jemaron̄ kōm̧m̧ane bween juon mour elem̧ōņōņō. Bōke juon ilo̧k juon make iaer, men kein reban kabwilōn̄ļōn̄ jekjekier. Ak n̄e kwoj kobaik er kajjojo ippān doon im kijejeto ko ilo wiik kajjojo, remaron̄ kwaļo̧k juon mour elem̧ōņōņō.
Errein jiljilimjuon men ko reļam waan ak m̧akūtkūt ko kwomaron̄ kōm̧m̧an bween lem̧ōņōņō ļo̧k mour eo am̧.
Men eo Eļam Waan 1: Jepooļ eo make ippān armej ro rem̧m̧an.
Lem̧ōņōņō eļapļo̧k an waļo̧k ippān armej eo kwoj iiaio̧ ippāer. Ejjab meļeļe kwon jab m̧ōttāik armej ro me rejjab lem̧ōņōņō jet iien. Ilo m̧ool, kōj aolep jej ioon jab m̧ōņōņō jān iien n̄an iien.
Ak lukkuun lale bwe kwon joļo̧k jidik iien ippān armej ro rem̧m̧an im rej im̧we eok. Ro jeram̧ rem̧m̧an ro rej jipan̄ eō mour kake jon̄ak ko an Irooj remaron̄ kōm̧m̧an juon oktak eļap n̄an m̧ōņōņō eo am̧. Im kajjieon̄ in m̧ōttāik ro rem̧m̧an jet. Kwomaron̄ in bar kōm̧m̧an juon oktak eļap ilo mour ko an jet.
Men eo Eļam Waan 2: Kōjerbal al n̄an kam̧ōņōņōik ļo̧k mour eo am.
Al ewōr kilaan ekajoor ilo kōļmenļo̧kjeņ eo am̧. Emaron̄ in lukkuun ukōt ļōmņak eo ilo bōram̧. Al ko rem̧m̧an remaron̄ jipan̄ eok en̄jake em̧m̧an, m̧ōņōņō, im emouruur. Kōm̧m̧ane juon laajrak in al in kam̧ōņōņō, rōjan̄, im al ko n̄an lōn̄aj tōmak ilo am̧ emakijkij ron̄jaki.
Men eo Eļam Waan 3: Diwōjļo̧k.
Mōņōņōik menin kōm̧anm̧an ko an Anij ej lukkuun kōmour jetōb im ānbwiinid. Eaorōk n̄an lem̧ōņōņō eo am̧ n̄an bōk jidik iien jān tipi ko, kamputōr ko, im taļeboon ko im diwōjnam̧ōjļo̧k im m̧ōņōņōik meram in aļ, mennin eddōk ko, im mennin mour ko ipeļakum̧. Etetal ippān baam̧le ak ro m̧ōttam̧, ikkure ikkure ko iņam̧ōj, riit im ekkatak inam̧ōj. Konaaj bwilōn̄ elmen am̧ kōm̧m̧ane.
Men eo Eļam Waan 4: Bwe iien kiki.
Irooj eaar ba bwe kiki eļap an aorōk n̄an ājmour eo an kōmālij im ānbwinum̧ (lale Katak im Bujen Ko 88:124). Āinwōt juon petere in taļboon eo eaikuj in jaaj, bōram̧ aikuj in kiki bwe en em̧m̧an an jerbal. Āinwōt am̧ karōk juon awa in am̧ jerkak ilo jibbon̄, kwon bar lale n̄an karōk awa in am!).
Men eo Eļam Waan 5: Bwebwenato.
Kōjerbal texting im social media n̄an kōm̧m̧ao ippān ro m̧ōttam̧ im baam̧le emaron̄ em̧m̧an. Bwe bwebwenato ekōm̧m̧an jet men bwe ļōmņak im jetōb eo am̧ eban kōnono. Lale bwe kwon iaio̧ ippān baam̧le eo am̧ ak ro m̧ōttam̧. Bōk iien n̄an keron̄jake im kōnono ippān ro ipeļakūm̧.
Men eo Eļam Waan 6: Kōmourur im kajjieon̄ m̧ōn̄ā m̧ōn̄ā ko rōōne.
Kōmālij eo am̧ emaron̄ in wōt jerbal kōn ta eo kwoj kanne. Mōn̄ā ko me ejjab bwe ōōn ie im ļap jukwa (jet iien jej ba riab in m̧ōn̄ā) remaron̄ in enno ak ekkā aer kōm̧m̧an bwe ļōmņak im ānbwiinum̧ ren en̄jake m̧ōjņo̧. Nuuj eo em̧m̧an ej bwe ilo am̧ m̧ōn̄ā leen wōjke ko, pijitabōļ, grain ko, kadikļo̧k m̧ōn̄ā eo rejjab ōōne. Irooj eaar letok n̄an kōj juon wōt ānbwin, bwe jen kōjparoke!
Men eo Eļam Waan 7: Jar im Kejokļo̧kjeņ.
Irooj im rikanaan ro An im rijilōk ro emakijkij aer kapilōk kōj n̄an bōk iien n̄an jar ilo lūr. Jar im ļōmņak em̧m̧an rejelet eria ko ilo kōmālij eo me kwoj en̄jake lem̧ōņōņō. N̄e emakijkij am̧ bōk iien n̄an kōļmenļo̧kjeņ im jar, lem̧ōņōņō eo am̧ enaaj ļapļo̧k ilo kajjojo iien. Ilo jidik iien, konaaj kile juon oktak eļap kōn aenōm̧m̧an im lōke eo kwoj en̄jake.
Pukot Elōn̄ Ļōmņak ko?
Jiljilimjuon men ko reļam waan rej jejjo̧ wōt bun̄ten nee jemaron̄ aolep būki n̄an kobrak āinbwiniid im jetōb kōn lem̧ōņōņō. N̄an eļapļo̧k ļōmņak ko, lale N̄an Kōkajoorļo̧k Jodikdik ro bok eo n̄an kalikkar pedped in katak ko me kwaar kōm̧m̧ani ak m̧ōņōņō ko jet m̧oktaļo̧k. Ta eo kwoj en̄jake n̄an kōm̧m̧an n̄an kobaik men ko rejejjet ļo̧k n̄an mour eo am kajjojo raan?
Aolep iien keememej bwe unjen lem̧ōņōņō ej ad Rilo̧mo̧o̧r, Jisōs Kraist. Jekdo̧o̧n jekjek rōt ko am̧, E epojak in kōjeraam̧m̧an eok im jipan̄ eok dipuk apan̄ ko am̧. E enaaj jipan̄ eok lo lem̧ōņōņō eo kwoj kōtmene.