“Ikar Ke Aorōk?” N̄an Kōkajoorļo̧k Jodikdik ro, Juļae 2021, 22–23.
Ikar Ke Aorōk?
Iaar lanwōtwōt kōn kōmetak eto me imaron̄ keememeje. Jelet ke wāween an Irooj kalimjōk eō?
Kōmeļeļe ko jān Trent Gudmundsen
Ilo m̧ool, mour eo aō ke ikar ajri wōt eaar lukkuun em̧m̧an.
Kōm kar etal n̄an m̧ōnjar eo im pād ilo aolep kweilo̧k ko an Kabun̄ in im m̧akūtkūt ko. Ikar etal im jikuuļ im kar ikkure ippān ro m̧ōtta. Āinwōt juon jodikdik, iaar kōm̧m̧ane aolep men ko me ekkā an jodikdik ro kōm̧m̧ani. Iaar iaio̧ ippān ro m̧ōtta im kar kobaļo̧k ilo kumi in al im kuļab in ikkure ko. Ikar etal n̄an prom ko. Ak ekar wōr jidik men ettiņo ilo mour eo aō me jejjo̧ wōt armej rejeļā.
Ilo tōre eo ikar bōlen ruo iiō detta, ikar jorrāān jen kōmetak an m̧ōm̧ an kanniōk jān brother ro ruo aō rerūtto. Raar bar kōmetak leddik ro jatū. Kōm kar lukkuun dik n̄an meļeļe ta eo ekar waļo̧k, ak ke ij rūtto tak, iaar jino meļeļe jidik. Iaar en̄jake marok im ettoon n̄e ij pād im̧aan mejen brother ro aō.
Pok eo Aō eaar Ļapļo̧k
Ālkin pād ilo juon kūlaaj an Doulul eo an Jiron̄ ro ijo rekar kwaļo̧k kōn m̧wiļ erreeo, ikar meļeļe meļeļein wānōk im erreeo. Iaar ron̄jake an ritōl ro aō akweļap n̄an eō im ro jet ilo kūlaaj eo n̄an mour erreeo.
Iaar ļōmņak, “Elmen aō maron̄ in erreeo?” N̄e ij ememej likļo̧k, ikar jorāān in kōmetak kōn m̧ōm̧ an kanniōk. Ijjab maron̄ jipan̄ ak bwilōn̄ kōn ta an Irooj ļōmņak kōn eō. Ikar ke juon jiron̄ eo ewānōk? Ikar ke erreeo n̄an jeraiki juon likao eo erreeo ilo ward eo ak jikuuļ eo aō? Kōmetak eo ekar ke kōm̧m̧an bwe in en̄taan im jab erreeo n̄an m̧are ilo tampeļ?
Aolep iien ij ļōmņak kake. Ejjab alikkar n̄an eō ke imaron̄ ļōmņak ijjab wānōk kōn ta eo ekar waļo̧k n̄an n̄a me ejjab aō kar kālet. Etke ijjab maron̄ in en̄jake wānōk? Ijjab ke erreeo n̄an iakwe eo an Irooj? Ij aikuj ke ukweļo̧k?
Iaar Kajjieon̄ in Meļo̧kļo̧k
Ij m̧ool ikar jab jeļā. Iaar en̄jake bwe in jab ņa ruweer, ak ilo ejja iien eo wōt, iaar en̄jake ettoon im jaorōk im lukkuun āliklik. Iaar jab maron̄ bōk peran n̄an ba n̄an ro jinō im jema ak ro jet. Iaar kajjieon̄ elōn̄ alen, ak iaar en̄jake āliklik im iaar jab jeļā elmen kwaļo̧ki naan ko. Iaar kajjieon̄ in meļo̧kļo̧k ta eo ekar waļo̧k.
Ke ekar 15 aō iiō, sister ro aō raar lo peran ilo n̄a. Raar kōnono n̄an juon rikakipilōklōk ilo jikuuļ. Ālkin jidik iien, juon iaan brother ro aō ekar kalbuuj im kar leļo̧k jilu iiō ilo kalbuuj. Ak ej pād wōt, elōn̄ iiō ko remootļo̧k, iaar en̄taan kōn ejja mijak me ikar jab wānōk im erreo kake.
Iaar Lo Peran n̄an Bōk Jipan̄
Aaet, juon raan iaar bōk peran n̄an loļo̧k bisop eo aō. Eaar kōmeļeļeiki bwe Irooj ejjab ņaruwō ļo̧k wōt n̄an jidik kōn m̧akūtkūt ko an m̧ōm̧ an kanniōk me rekar kipeļ eō ke iaar juon ajri im juon jiron̄. Eaar ba n̄an eō ke ejjab aō bōd. Iaar jutak ilo ejjeļo̧k lipijinjin im̧aan Irooj. Iaar wānōk wōt!
Kōn jet kapilōk jān ro retijem̧ļo̧k im jipan̄ jān bisop eo aō, iaar maron̄ in dood kōmetak eo—im eddodo eo im en̄taan eo ekar waļo̧k—itulik. Kiiō ij lukkuun m̧ōņōņō im mour juon mour epolemen. Ikar m̧are ilo tampeļ n̄an juon em̧m̧aan eo ewānōk, im kōmro eaar kōkaajririik baam̧le eo am̧ ilo m̧ōņōņō.
Jet iien men ko an m̧okta rej itok n̄an ļōmņak eo aō, ijoke, iaar maron̄ in keememej en̄taan eo iaar dipuki ilo aō kar kōļmenļo̧kjeņ kōn erreeo eo aō.
Iaar ļōmņak elmen an armej ro jet ijeņ ilo ejjab jekjek eo ikar pād ie, en̄jake jook im āliklik, ļōmņak kōn erreeo eo aer im ia eo rekkar ie ilo karōk eo an Anij.
N̄an armej rein ikōņaan ba, Irooj ej iakwe eok.
E ej kwi kōn eok.
E ejeļā bwe kwon jab ņaruōm̧.
E ejeļā bwe kwoj erreeo.
E enaaj jipan̄ eok lo peran im kajoor n̄an mour juon mour elem̧ōņōņō.