“An Kosei lan̄lōn̄,” N̄an Kōkajoorļo̧k Jodikdik ro, Juļae 2021, 2–15.
An Kosei lan̄lōn̄
Likao in jān Japan em̧m̧an ippān kwaļo̧k kōn gospel in.
Pija ko jān Getty
Ej kōjan̄jan̄ piano. Ej ettōr. Ej kelak aetok! Ak ejjab men ko de kein rem̧m̧an kōn Kosie H., juon likao 17 iiō dettan jān Nagasaki, Japan.
“Ej juon iaan mijenede eo em̧m̧an dettan iaar jeļā kajjein,” Sister Mckenna Frasure eaar ba, juon mijenede eo ej kab ro̧o̧l eo ekar jerbal ilo Japan ijo Kosei ej jokwe ie. “Kosei eban likjab in bōk iien em̧m̧an n̄an etal ippān mijenede ro ak kam̧ool kōn Kraist ilo m̧akūtkūt ko an Kabun̄ in im ilo social media,” eaar ba.
Kosei eaar kile bwe mijenede ro rej ro m̧ōttan repaaktata. Im ejjab juon men ekāāl ke ej en̄jake rōt in ilo am kile ewi jon̄an an m̧ōņōņō n̄an kwaļo̧k kōn gospel in.
“Jerbal in mijenede ej aō lan̄lōn̄,” Kosei eaar ba. “Nipai ekar katakin kōj bwe leen eo an wōjke in mour ‘e in elukkun ļap kōttōpare jān men ko otemjej’(1 Nipai 11:22). Jet armej remaron̄ kaarmejete leen in. Ijoke, āinwōt an ro jet jeļā kōn tōn̄al eo an leen in, ikōnaan kwaļo̧k gospel in n̄an ro ipeļakū.
Kwaļo̧k kōjeraam̧m̧an ko an gospel in emaron̄ in juon iaan taļōn ko an Kosei reļļap.
Pija in Alooj ko maron̄ Jeeri ilo Social Media
Ālkin bōk juon kūlaaj in kōppopo n̄an jerbal in mijenede, Kosei eaar en̄jake ke ikdeleel eo eļap n̄an bōkļo̧k lan̄lōn̄ in gospel eo n̄an ro m̧ōttan. Ekar jino kōjerbal online. Juon iaan kein jerbal eo ej kōjerbali n̄an kwaļo̧k naan in gospel in im ilo social media.
Jet iaan ro m̧ōttan raar uwaak ilo aer jeje ilo social media. Juon m̧ōttan eaar jibadōktok Kosei im ba, “ewōr aō itoklimo ilo kabun̄ eo am̧.”
Ļaddik in ekar bajjōk m̧ōttā ilo jinoin, ak jem̧jerā eo aer eaar m̧ōkaj in pen. “Eaar jino kajjitōk ippa oktak ko ikōtaan tōmak eo an im n̄a,” Kosei eaar kōmeļeļeiki. “Men̄e ekar jab emakijkij aō kar kōnono ippān, kom̧ro ekar lukkuun m̧ōttā ālkin aō kwaļo̧k gospel in ilo social media.”
Ikkure ko, itok limo ko, im Jem̧jerā Indeeo
Social Media ekar jab jekjek eo wōt Kosei ekar kwaļo̧k tōmak eo an ie. Keememej, e eboub im eobrak kōn m̧akūtkūt ko. Ewōr an iien n̄an bwebwenato ippān armej ro n̄an kōm̧m̧an jem̧jerā. Im ej kōjerbal iien kein raorōk n̄an kwaļo̧k lan̄lōn̄ eo kōn gospel in.
“Juon iien kar kūrļo̧k eō n̄an juon sport club ippān ro m̧ōtta ilo kūlaaj in In̄lij eo me mijenede ro rej katakin ilo m̧ōnjar eo,” Kosei eaar ba. “E im mijenede ro rekar jino m̧ōttāik doon ke ekar ekkatak kajin pālle.”
Ijoke, bwebwenato eo ekar jab bōjrak ilo aer kar ekkatak kajin In̄lij.
“Ro m̧ōtta raar jino ļōmņak kōn mijenede rein, ro me raar dettaer wōt er, kar balōntier n̄an jerbal āinwōt mijenede ro ilo Japan. Kajjitōk eo an tok juon ekar kajjitōk ta eo ekōm̧m̧an bwe mijenede ro ren jerbal. Kiiō ej ron̄jake katak ko an mijenede im ej ekkatak wōt ippān mijenede ro ilo video chat.”
N̄e ej bōklōn̄tak kōn gospel ippān ro m̧ōttan, Kosei ej kajjieon̄ in keidi ta eo ekar kwaļo̧ke kōn itok limo eo aer. “N̄an waanjon̄ak, ij jino kōnono kōn ta eo ej waļo̧k ālkin mej, ta jibadbad eo an mour in, ak ewōr ke Anij,” eaar ba. “Innām imaron̄ kakkobaba, pedped ioon itok limo eo aer.”
Aaet, e ejeļā bwe ejjab aolepār renaaj itok limoier. Ekar wōr an apan̄, āinwōt ro jet. Juon raan, ālkin an jet iaan ro m̧ōttan kajjitikin e kōn Kabun̄ in, Kosei eaar kajjieon̄ in kwaļo̧k juon peba an Kabun̄ in ippān juon iaer. “Ijoke, ļaddik in eaar diwōjļo̧k jen kūlaaj ruum̧ eo im kar ļap an ettōn̄ tok jān hallway eo.
“Ekōm̧m̧an bwe in būrom̧ōj,” Kosei eaar ba.
Ak ekar jab kōtļo̧k an jab errā. E ejeļā bwe ta eo ekar kwaļo̧ke enaaj kōjeraam̧m̧an mour ko aer indeeo n̄e rej ron̄jake.
Lan̄lōn̄ eo Me Ejelet E
“Ij en̄jake lan̄lōn̄ ilo katak ko an Kraist,” Kosei eaar ba. “N̄e in kar jab jeļā katak kein, in kar jab bōk juon mour ejjeļo̧k lan̄lōn̄.”
Ilo an pād ilo elōn̄ m̧akūtkūt ko an im itok limo ko, Kosei ejeļā kilen karōki iien ko. “Gospel eo an Jisōs Kraist ej bōktok kōjatdikdik n̄an mour ko ad im letok aolep men ko jej aikuj kōm̧m̧ani,” eaar ba. “Men̄e jej en̄jake ebweer ak ioon iien ko reppen, jar enaaj bōktok aenōm̧m̧an im jipan̄ kōj bōk juon m̧wiļ em̧m̧an.”
En̄in unin an lukkuun kālet n̄an kwaļo̧k gospel in aolep iien n̄e ewōr iien. E ej kōņaan bwe ro jet ren en̄jake ta eo ej lan̄lōn̄e kajjojo raan! “Ij kōjatdikdik jān tum̧wilaļ in būruwō ke elōn̄ armej emaron̄ wōr aer iien em̧m̧an n̄an en̄jake lan̄lōn̄ in em̧ool,” eaar ba.
Men eo Eaorōktata
Ilo m̧ool, kwaļo̧k gospel in ekar jab kōm̧akūt aolep ilo tōre eo an. Jerbal eo an Kosei ekabwilōn̄lōn̄ ilo jibadbad ko an jet ilo mour in. Kajjojo raan ej lukkuun kaminene ilo ettōr im kōkajoorļo̧k an kaminene. N̄e ej aikuj jidik iien kakkije, ej kōjan̄jan̄ piano. Ej barāinwōt em̧m̧an ippān loļo̧k jikin ko jet im joļo̧k iien ippān baam̧le eo an. “Pād ippān ro jeiū im jatū—Iban meļo̧kļo̧k raan eo kom̧ kar en̄ōd ek im kan̄i!” eaar ba.
Aolep, ak, Kosei eaar kōm̧m̧an iien bwe men eo eaorōktata.
Im ewōr jidik an naan in rōjan̄ n̄an jabdewōt ro rekōņaan kōm̧m̧an āinwōt: “Jej bōk tōl n̄e jej kōjparok kien ko. Ilo ad kōm̧m̧an āindein, Irooj emaron̄ kōkajoorļo̧k kōj. Mijak im m̧ōk rej bōk jikin kōjatdikdik im leke. N̄e jej kōpeļļo̧k lon̄iid kōn ejjeļo̧k mijak kōn gospel in, armej ro renaaj itok n̄an jeļā iakwe āinwōt Kraist im naaj obrak kōn lan̄lōn̄.”