“Mga Batan-ong Babaye ug ang Pagkapari,” Alang sa Kalig-on sa mga Kabatan-onan, Ago. 2021, 14–15.
Dali, Sunod Kanako
Mga Batan-ong Babaye ug ang Pagkapari
Litrato gikan sa Getty Images
Ang pagkapari sa Dios kahibulongan. Kon ikaw usa ka batan-ong babaye, tingali lisod ang pagsabot kon unsay kalambigitan niini nganha kanimo. Mao nga asa man ikaw magsugod?
Ania ang pipila ka komon nga mga pangutana nga tingali imong ipangutana, ug pipila ka tubag:
Una sa tanan, unsa ang pagkapari?
“Ang pagkapari mao ang balaanong gahom ug awtoridad nga temporaryong gitugyan nga gamiton diha sa buhat sa Dios alang sa kaayohan sa tanan Niyang mga anak.”1
Ang pagkapari usa ka gasa gikan sa Langitnong Amahan sa pagpanalangin sa tanan Niyang mga anak, mga babaye ug lalaki.
Unsa ang awtoridad sa pagkapari?
“Ang pagtugot nga makarepresentar sa Dios ug paglihok diha sa Iyang ngalan.”2 Gigamit kini ubos sa direksyon niadtong adunay mga yawe sa pagkapari. Ang takos nga mga lalaki makadawat sa awtoridad sa pagkapari pinaagi sa pagtugyan sa pagkapari ug ordinasyon. Kini nga awtoridad nagtugot usab sa tanang miyembro sa paglihok sa mga calling ug mga buluhaton pinaagi sa, sama pananglit, pagdumala sa mga miting, pagpanudlo, ug pagdawat og pagpadayag alang niana nga mga calling ug mga buluhaton.
Unsa ang mga yawe sa pagkapari?
“Ang mga yawe sa pagkapari mao ang awtoridad sa paggiya sa paggamit sa pagkapari alang sa mga anak sa Dios. Ang paggamit sa tanang awtoridad sa pagkapari diha sa Simbahan giyahan niadtong naghupot sa mga yawe sa pagkapari (tan-awa sa Doktrina ug mga Pakigsaad 65:2).”3
Unsa ang kalainan tali sa awtoridad sa pagkapari ug sa gahom sa pagkapari?
Ang gahom sa pagkapari diha sa imong personal nga kinabuhi makahatag og:
-
Giya gikan sa Espiritu Santo.
-
Pagpadayag alang sa imong kaugalingon.
-
Kahupayan.
Ang awtoridad sa pagkapari magtugot nga ikaw:
-
Makalihok sa imong mga calling.
-
Makadumala sa mga miting.
-
Makadawat og pagpadayag diha sa mga calling.
Ang mga batan-ong babaye makadawat ba og gahom sa pagkapari?
Oo. “Ang gahom sa pagkapari mao ang gahom diin ang Dios mopanalangin sa Iyang mga anak. Ang gahom sa pagkapari sa Dios modagayday ngadto sa tanang miyembro sa Simbahan—babaye ug lalaki—samtang sila motuman sa mga pakigsaad nga ilang gihimo uban Kaniya. Ang mga miyembro mohimo niini nga mga pakigsaad samtang sila modawat sa mga ordinansa sa pagkapari. (Tan-awa sa Doktrina ug mga Pakigsaad 84:19–20.)”4
Ang mga batan-ong babaye makagamit ba sa awtoridad sa pagkapari?
Sa piho nga mga kahimtang, oo. Si Presidente Russel M. Nelson miingon sa mga batan-ong babaye sa Simbahan: “Sa dihang kamo gi-set apart aron moserbisyo og calling ubos sa direksyon sa naghupot sa mga yawe sa pagkapari—sama sa inyong bishop o presidente sa stake—kamo gihatagan og awtoridad sa pagkapari sa paglihok niana nga calling.”5
Ang mga batan-ong babaye maghupot ba og mga yawe sa pagkapari?
Dili. Si Jesukristo ang naghupot sa tanang yawe sa pagkapari. Ubos sa Iyang direksyon, ihatag lamang kini ngadto sa mga lalaki nga adunay piho nga mga calling. Alang sa mga batan-on, ang mga presidente sa korum sa mga deacon ug ang mga teacher naghupot og mga yawe.
Ang mga batan-ong babaye maka-access sa pagkapari.
Bisan kon kamo tingali wala maghupot og mga yawe sa pagkapari, kamo adunay awtoridad sa paglihok diha sa inyong mga calling tungod kay kamo gi-set apart ubos sa direksyon sa usa ka tawo nga adunay mga yawe sa pagkapari. Gipanalanginan kamo og gahom sa Dios samtang magserbisyo kamo sa uban ug makadawat og espirituhanong giya. Kamo usab adunay oportunidad nga makadawat sa tanang panalangin sa pagkapari nga gihatag sa Langitnong Amahan kanato.
Kon kamo wala pa makasabot sa tanan mahitungod sa pagkapari, ayaw kabalaka. Samtang kamo magsiksik sa mga kasulatan ug magtuon sa mga pulong sa mga lider sa Simbahan sa atong panahon karon, ang Ginoo motabang kaninyo nga makat-on og dugang mahitungod sa inyong pag-access sa gahom sa pagkapari, sa awtoridad sa pagkapari ug sa mga panalangin sa pagkapari.