“Ang Imong Panginahanglan sa Inadlaw nga Pagtigom og Espirituhanong Kusog,” Alang sa Kalig-on sa mga Kabatan-onan, Ago. 2021, 26–27.
Home Evening nga Leksyon nga Maggamit og Butang
Ang Imong Panginahanglan sa Inadlaw nga Pagtigom og Espirituhanong Kusog
Ang gagmay ug yanong mga butang makahimo og dagko, makausab sa kinabuhi nga mga sangputanan!
Mibati ka ba nga ikaw padayong naghimo sa inadlaw nga buluhaton sa ebanghelyo apan walay nahimong kalainan? Tanan kita giawhag sa paggahin og panahon matag adlaw diha sa mga kasulatan ug sa kanunay nga pag-ampo. Apan usahay lisod ang pagmatikod sa mga benepisyo niining ginagmay, inadlaw nga mga naandang buhat.
Bisan og ang yanong mga naandang buhat sama sa personal nga pag-ampo ug inadlaw nga pagtuon sa kasulatan ingon og gamay nga butang, kini adunay gahom sa pag-impluwensya sa direksyon sa imong adlaw—ug sa imong kinabuhi.
Pangita og plastik nga sudlay, usa ka gripo, ug usa ka boluntaryo nga uga ang buhok—panahon kini alang sa leksyon nga mogamit og mga butang!
Unsay Buhaton
-
Ablihi ang gripo aron moagas kini og gamay kaayo. Niini nga punto, ang grabidad [gravity] lamang maoy nagdala sa direksyon sa tubig. Ipasabot sa imong pamilya nga ang grabidad [gravity] sama sa atong inadlaw-adlaw nga buluhaton. Apan ang inadlaw nga pagtigom og espirituhanong kusog makahimo og maanindot nga epekto diha sa direksyon sa atong kinabuhi, sama nga ang napundohan og estatik nga elektrisidad nga sudlay makaapekto sa gamay kaayo nga agas.
-
Isudlay ang plastik nga sudlay sa imong buhok (o sa buhok sa sakop sa imong pamilya) sa 10 ka higayon. Karon ipaduol ang sudlay ngadto sa gamay nga agas sa tubig (nga dili gayod mohikap niini). Tan-awa samtang mahitabo ang magic. Kon maayo ang pagkahimo, ang agas sa tubig kinahanglan moliko padulong sa sudlay!
OK, sa tinuod lang usa kini ka siyensya, dili magic. Kon imong balikbalikon sa pagsudlay ang imong buhok, ang estatik nga elektrisidad motigom diha sa sudlay sa porma nga gagmay, pino kaayong mga elektron. Kon imong ipaduol ang sudlay diha sa tubig, ang pagkatigom sa gagmay nga mga elektron mobira sa tubig, sa tinuoray mopaliko ngadto niini!
-
Sulayi na usab ang eksperimento, niining higayona isudlay lang og kausa o kaduha sa imong buhok. Dili kini makatigom og igong mga elektron aron makapalihok sa tubig. Apan kon himoon kini sulod sa 10 ka higayon, o 20 o 30, makatingala kaayo ang matigom nga estatik!
Pangutan-a ang imong pamilya kon unsay kalainan tali sa duha ka eksperimento, ug kon sa unsang paagi nga kana ikapahisama sa atong kaugalingong espirituhanon nga mga kinaiya sa tibuok nga adlaw (o sa semana, o sa tibuok nga kinabuhi). Dayon buhata ang eksperimento sa eksaktong paagi sa makausa pa ka higayon tungod kay, makalingaw kini!
Ang Gahom sa Inadlaw nga Pagtigom og Kusog
Si Elder David A. Bednar sa Korum sa Napulog Duha ka mga Apostoles mitudlo:, “Ang espirituhanong sumbanan sa gagmay ug yanong mga butang nga makahatag og dagkong mga butang makahimo og kalig-on ug pagkamakanunayon, nagkalig-on nga debosyon, ug mas kompleto nga pagkakabig ngadto ni Ginoong Jesukristo ug sa Iyang ebanghelyo.”1
Sama sa pino kaayong mga elektron nga matigom diha sa sudlay, adunay ginagmay, inadlaw nga espirituhanong mga kalihokan nga atong mahimo aron magtigom og kalig-on sa atong mga pagpamatuod. Kining mga pagtigom og espirituhanong kusog pwedeng daghan nga mga butang: pagtuon sa kasulatan, personal nga pag-ampo, pag-ambit sa sakramento, pagtambong sa seminary. Ipasabot nga ang inadlaw nga mga butang ingon og gagmay, apan kanang inadlaw-adlaw nga mga pagtigom og espirituhanong kusog makahimo og dakong kalainan, bisan kon sa pagpaliko lang og gamay sa imong kinabuhi ngadto sa eksaktong direksyon (tan-awa sa Doktrina ug mga Pakigsaad 64:33).
Hangyoa ang imong pamilya sa paglista og mga paagi nga kamo makatigom og ginagmay nga espirituhanong kusog sa tibuok adlaw ug semana. Ang kanunay, espirituhanong mga impluwensya sa imong kinabuhi mahimong usa ka dako kaayong gahom sa paghimong posible sa usa ka butang!