“Stap Lukaotem Saeon mo Ol Blesing blong Lod,” Blong Ol Yut Oli Kam Strong, Septemba 2021, 2–5.
Kam Folem Mi
Stap Lukaotem Saeon mo Ol Blesing blong Lod
Blong stap bildim Saeon i wan bigfala responsabiliti, be i karem ol bigfala riwod tu oli kam.
Fasfala bigfala trutok blong heven i we, God i lavem yumi wetem evri hat, strong tingting, maen mo paoa blong Hem. Hem i wantem wanem we i moa gud blong yumi—oltaem Hem i wantem hemia, mo oltaem bae Hem i wantem hemia. Hem i wantem yumi blong stap hapi; i no blong naoia nomo o i luk olsem yu hapi, be yumi no hapi fulwan mo blong oltaem olsem we Hem i hapi. Hem i wantem blong yumi gro mo kasem tabu paoa ia we yumi save kasem olsem wan boe o gel blong God.
Mi save hemia i no isi oltaem. Plante long yufala i gotru ol hadtaem mo ol hadtaem blong yufalawan we samtaem i tumas nomo. Maet yu bin lukluk long ol situesen blong yuwan, long sam situesen blong famli blong yu, o ol problem long medel blong ol kantri raon long wol, mo tingting se: “?Olsem wanem bae mi save gotru ol defdefren kaen jalenj ia?” Wan ansa i save sapraesem yu: Lukaotem blong bildim Saeon.
?Wehem Saeon?
?Yu Lavem Mi Moa Bitim Ol Samting Ia?, i kam long David Lindsley
Longtaem tru long histri, fulap taem God i bin stap singaotem ol pipol blong Hem blong stanemap Saeon. Fulap taem, Saeon hem i wan ples we ol pipol blong God oli save stap longwe long ol rabis paoa blong wol mo laef long pis wetem ol narawan. Be long las dispensesen ia, Saeon i no stop nomo long wan spesel ples long wol. Long dei blong yumi, Saeon i save stap weaples we yu faenem ol fetful memba blong Jos Ia blong Jisas Kraes blong Ol Lata-dei Sent. Lod i tokbaot ol pipol blong Saeon ia, se, oli stap olsem “wan hat mo wan maen” (Moses 7:18) mo “hat blong olgeta i klin” (Doktrin mo Ol Kavenan 97:21). Blong talem i sot, yumi nomo tingting long Saeon olsem weaples bae yumi go laef long hem, be olsem wanem bae yumi laef.
Plante naesfala blesing oli stap blong yu kasem, taem yu mekem bes blong yu blong bildim Saeon, blong stap olsem man o woman ia we Sevya i nidim yu blong stap olsem, mo blong help rere long rod blong Hem i kambak bakegen long wol. Wan hadwok olsem i nidim wok mo bigfala fet, be bae i karem hapines mo glad we bae i stap blong oltaem tu. !Mi hop se yu faenem se hemia i bin tajem hat blong yu mo mekem yu glad tumas olsem we mi mi filim! Olsem we Presiden Russell M. Nelson i bin tijim, i no gat samting—i tru se i no gat samting nating—i save impoten moa.1 !Mo yumi gat janis ia blong tekpat! Yumi nao ol soldia ia we yumi stap long fored blong serem mo faet from trutok. Yumi no karem ol bolet blong mekem nogud long ol man; !be yumi karem ol plasta blong helpem olgeta! Oli singaotem yumi blong help blong hilim wol mo givim wan wol kongregesen blong ol pipol we bae Sevya i save kam luk olgeta.
Lavem God mo Neba
Yumi save winim kaen famli o ol neba o kantri olsem, taem yumi stap kipim komanmen ia blong lavem man. Mo moa we yumi lavem God, moa bae yumi lavem ol neba blong yumi, mo luk ol wei we yumi save blesem olgeta. I gat ol neba blong helpem olgeta, ol puaman blong leftemap olgeta, mo gud samting blong mekem long evri ples.
Wan taem Lod i bin tokbaot responsabiliti mo blesing ia long wei ia:
“Taswe, stap fetful; … helpem olgeta we oli no strong, blong leftemap ol han we oli hang, mo blong mekem ol ni we oli no strong oli kam strong moa.
“Mo sapos yu fetful kasem en, bambae yu gat wan hat blong king blong fasin blong nomo save ded, mo laef we i no save finis long ol ples we mi bin mekem i rere insaed long haos blong Papa blong mi” (Doktrin mo Ol Kavenan 81:5–6).
Stanap From Trutok
Taem God i singaotem yumi blong bildim Saeon, Hem i stap singaotem yumi blong stanap from ol tijing blong Hem mo blong stanap strong long fet blong yumi. Hemia bae i no oltaem isi o bae yumi no filim gud blong mekem, be yumi mas mekem—wetem lav mo sore, tingting we i stap daon, andastaning, mo jariti we i no save sot long ol narawan. Long wokbaot long yumi blong stanemap Saeon, i tru bae yumi luk olgeta we maet oli no luk o dresap long stret wei o no gat ol gud fasin. Taem yumi mitim ol kaen pipol olsem, yumi mas lukaot gud blong ansa long stret mo gud fasin, be i no blong ting hae long yumiwan se yumi stret mo gud. Long ol situesen olsem, bes samting we yumi save mekem hem i blong yumiwan yumi mekem samting long stret fasin mo soem “tru lav” long olgeta (luk long Doktrin mo Ol Kavenan 121:41).
Mi wantem ol narawan blong stap glad long ol blesing we mi gat, be samtaem, mi tingting long miwan, olsem wanem bae mi serem long olgeta long wan wei we bae i no mekem olgeta i harem nogud o mekem oli andastanem rong. Skripja i bin helpem mi long evri koling blong mi long Jos mo ol responsabiliti blong miwan olsem wan disaepol blong Kraes.
“From hemia, i tru, mi talem long yutufala, leftemap voes blong yutufala i go long ol pipol ia; talemaot ol tingting we bae mi putum long hat blong yutufala, mo bae yutufala i no lusum fes long fored blong ol man;
“From we bae mi givim yutufala long stret aoa, yes long stret taem, wanem we bae yutufala i talem.
“Be mi givim wan komanmen long yutufala, se wanem samting we bae yutufala i talem long nem blong mi, yutufala i mas talemaot wetem wan tabu fasin long hat, wetem spirit blong no stap flas, long saed blong evri samting.
“Mo mi givim promes ia long yutufala, se hamas we yutufala i mekem hemia, bae mi sendem Tabu Spirit i kam blong testifae long saed blong evri samting we bambae yutufala i talemaot” (Doktrin mo Ol Kavenan 100:5–8).
Wan Blesing blong Naoia mo I Stap Gohed Yet
Ol yangfala fren we mi lavem tumas, bae i gat ol dei we i fulap long jalenj we i stap kam, be ful laef blong yu bae i naes tumas taem yu givim hat blong yu long God, lavem Lod Jisas Kraes, mo mekem bes blong yu blong laef folem gospel. Sapos yu fetful, Saeon bae i stap wetem yu weaples yu stap long hem. Mi blesem yu blong yu stap glad fulwan long hem. !Lod i putum fulap samting tumas i stap blong yu kasem!