“Ol Joes,” Blong Ol Yut Oli Kam Strong, Septemba 2021, 12–14.
Ol Joes
Foto i kam long Getty Images
Plante yia i pas, wan long ol Jeneral Atoriti blong mifala i serem had stori ia:
Wan waes manples blong Not Amerika, wan long ol stret traeb long Yunaeted Stet, i talem wan parabol abaot laef long smol apuboe blong hem. “Insaed long mi, i gat wan rabis faet bitwin tu waeldog,” bubuman ia i talem. “Wan i rabis: hem i fulap long kros mo jalus, i stap sore long hemwan mo harem nogud, i selfis mo giaman. Narawan i gud: hem i fulap long kaen fasin mo sore, hem i putum tingting blong hem i stap daon mo i tru, i gat lav mo glad. Faet ia i stap gohed insaed long wanwan long yumi.”
“?Wij waeldog bae i win?” smol apuboe i askem.
“Hemia we yu stap fidim,” bubuman ia i ansa wetem waes.1
Parabol blong tufala waeldog ia i stap soem wan trutok we i no save finis. Ol pikinini blong God oli bon i kam long wol ia blong mekem ol joes bitwin gud mo nogud. Fasin blong agens i letem yumi blong mekem ol joes we oli gat mining mo oli stret mo gud. Buk blong Momon i tijim trutok ia long lanwis blong skripja: “From i mas nid i stap, se i mas gat wan fasin blong go agens long evri samting.”2
Plan blong Papa blong yumi long Heven i givim tu presen we i help blong mekem ol joes ia: (1) Hem i givim Tabu Spirit blong i gaedem ol joes blong yumi, mo (2) Hem i givim yumi wan Sevya we Atonmen blong Hem i mekem i posibol blong yumi sakem sin blong save karemaot paoa blong ol nogud joes—taem oli fidim rabis waeldog ia.
I. Fasin blong Sakem Sin mo Luksave Rong
Taem mi bin toktok long yut, wan long ol topik we oli stap askem abaot fulap taem, hem i fasin blong sakem sin. “?Olsem wanem nao bae yu save se yu sakem sin inaf?” “?Olsem wanem nao yu save se oli fogivim yu tru?” Ol ansa blong ol kwestin ia oli kam tru long Tabu Spirit, memba blong Godhed we i karem ol mesej i kam long heven.
Oli bin singaotem fasin blong sakem sin “gud nius blong gospel.”3 Hemia i letem yumi blong karemaot paoa blong ol nogud joes we i bin fidim rabis waeldog ia mo i mekem paoa blong yumi blong harem ol kwaet toktok blong Tabu Spirit, i nomo strong. Fasin blong sakem sin i tekem tu, fasin blong luksave taem yumi bin mekem wan samting we i no stret, lego nogud fasin ia fogud, mo stretem yumi taem yumi tanem hat blong yumi i go long God mo kipim ol komanmen blong Hem. Taem yumi sakem sin, yumi singaotem paoa blong Atonmen blong Jisas Kraes, we i mekem fasin blong yumi blong talem tangkyu mo lav blong yumi long God i kam moa bigwan, semmak long Sevya blong yumi.
Nid ia blong sakem sin i no stap nomo blong ol series sin we yumi nid blong konfesem long bisop. Fasin blong sakem sin i wan samting i nid blong mekem evri dei. Fulap taem taem yumi sakem sin, yumi nidim blong luksave yumiwan, wanem yumi bin mekem i rong, tingting strong blong jenis, mo traem blong stretem ol samting wetem olgeta we yumi mekem nogud long olgeta. Long ol toktok blong parabol blong tufala waeldog ia, fasin blong sakem sin i minim blong stop fidim rabis waeldog ia, iven ol smosmol kaekae olsem taem yumi jusum blong kros o jalus. Yumi nid tu, blong sakem sin (jenis) taem yumi bin jusum blong westem taem ia we God i givim long yumi, long sam long ol fulap aktiviti we i stap, we i no gat paoa blong mekem yumi kam moa gud.
II. Stap Luksave Ol Impoten Samting we Oli Defren
Wan naesfala risal blong sakem sin, hem i blong stap klin inaf bakegen blong kasem ol kwaet toktok long Tabu Spirit, we i helpem yumi blong mekem ol waes joes mo fulumap yumi wetem glad. Plante yut oli stap tingting tu se: “?Olsem wanem nao bae mi save se kwaet toktok o ansa ia we mi kasem i kam tru long Lod be i no wanem we mi nomo mi wantem?”
Yumi nid blong yusum ol tri trutok ia, blong luksave sapos wan kwaet toktok i wan mesej we i kam long Tabu Spirit o wan tingting blong hat blong yumiwan nomo.
-
Long odinens blong sakramen, promes ia we bae yumi “oltaem gat Spirit i stap wetem [yumi]” i folem promes blong yumi we, bae yumi tekem nem blong Hem long yumi, mo oltaem tingbaot Hem, mo kipim ol komanmen blong Hem.4 Taem yumi sot blong kipim ol promes ia, hem i isi blong yumi konfius abaot weaples nao ol filing we yumi stap filim i kam long hem.
-
Ol kwaet toktok we i kam long Lod, fulap taem oli stap kam long kwaet taem o long medel blong wosip. skripja stadi, o prea o long taem we yumi stap givim seves long ol koling blong yumi, be i no taem yumi stap mekem ol samting we yumi tingbaot yumiwan nomo o taem ol aktiviti blong wol i raonem yumi.
-
Laswan, yumi nidim blong tingting mo lukluk kolosap speseli, long daereksen blong jenisim wei we yumi stap mekem wan samting, we yumi stap folem finis. Yumi save dipen moa long wan filing o tingting blong jenisim wei we yumi stap mekem samting, bitim wan filing o tingting blong gohed mekem wan samting we yu bin wantem finis blong mekem.
III. Raet Hem I Stil Raet
Ol dia yang fren blong mi, yufala i stap kam bigwan long wan wol we i moa defren bitim wol we ol papa mo mama mo apu man mo apu woman oli bin eksperiensem. Hemia i mekem i speseli impoten long yu blong yu tingbaot se ol valiu mo komanmen blong bifo, oli strong moa yet. Yumi ol pikinini blong God, mo ol komanmen blong Hem oli impoten semmak nomo i stap yet, nomata we yumi travel long wagun o spes sip, o yumi toktok tru long voes o teks.
Raet hem i stil raet, mo rong hem i stil rong, nomata long wanem ol muvi aedol, fasin blong ol man long TV, o ol sta long spot oli talem o mekem. Ol standet insaed long ol skripja, ol tijing blong ol profet we oli laef, mo ol valiu insaed long buk blong Blong Ol Yut Oli Kam Strong oli ol bes samting yet blong gaedem ol joes blong yuwan long fasin blong stap klin long saed blong seks, helt blong bodi, onesti, fasin blong dresap mo mekem yu, mo evri nara topik blong hem. Stap fetful blong stap folem olgeta, mo bae yu kasem ol blesing. “Buk ia we nem blong hem Blong Ol Yut Oli Kam Strong i mas standet blong yu ,” Presiden Russell M. Nelson tijim long yumi. “Hem i standet ia we Lod i wantem evri yut blong Hem blong folem.”5
Long yut divosen blong hem raon long wol, profet blong yumi i promesem se:
“Sapos yu gohed wetem tru hat, blong mekem wok long saed blong spirit we i nid, blong developem impoten mo spirituol skil ia blong lanem olsem wanem blong harem ol kwaet toktok blong Tabu Spirit, bae yu gat evri daereksen we bae yu eva nidim long laef blong yu. Bae oli givim ol ansa long ol kwestin blong yu long wei blong Lod mo long taem blong Hemwan.”6
Mi joenem promes blong mi wetem blong Hem, taem mi testifae abaot Sevya blong yumi Jisas Kraes, we ol tijing mo Atonmen blong Hem i mekem evri samting i posibol, long nem blong Jisas Kraes, amen.