“Stap Bildim Wan Yu we I Moa Gud,” Blong Ol Yut Oli Kam Strong Septemba 2021, 6–7.
Kam Folem Mi
Stap Bildim Wan Yu we I Moa Gud
Faef wei blong bildim wan laef we i hapi mo fulap long glad.
Ol pikja droing oli kam long Juliet Percival
Taem Lod i bin givim oda long Josef Smit blong bildim Ketlan Tempol, Hem i no lego Josef Smit blong faenemaot hemwan olsem wanem blong i mekem evri samting hemwan. Hem i soem wan plan we bae i gat sakses long hem.
“Oli mas bildim haos ia, i no folem fasin blong wol,” Lod i talem. “Oli mas bildim haos ia folem fasin we bambae mi soemaot” (Doktrin mo Ol Kavenan 95:13–14). Afta, Lod i givim instraksen abaot olsem wanem blong bildim tempol (luk long Doktrin mo Ol Kavenan 95:15–17).
Tangkyu nomo we Lod i bin soem moa long yumi bitim blong save olsem wanem blong bildim ol tempol nomo. Hem i givim tu ol instraksen blong helpem yumi blong kam ol moa gud man o woman we yumi save kam olsem. Taem yumi folem olgeta, bae yumi bildim laef blong yumi, “i no folem fasin blong wol ia” be i folem wei ia we Lod i bin mekem.
Hemia hem i olgeta faef wei blong bildim wan laef we i hapi mo fulap long glad we Kraes i stap long medel blong hem.
Bildimap Wan Strong Fandesen
Eni man we i stap disaenem o bildim haos bae i talem long yu se wan strong fandesen i impoten long eni bilding. Hileman i tijim se bes fandesen blong laef blong yumi hem i long “strong ston blong Ridima blong yumi, we i Kraes, Pikinini blong God” (Hileman 5:12). Yumi save mekem Kraes i fandesen blong yumi taem yumi kam long Hem mo stap folem ol tijing blong Hem. ?Yu filim olsem wanem abaot wanem yu stap mekem blong stap mekem Kraes i olsem fandesen blong laef blong yu?
Givim Seves long Ol Nara Man
Folem toktok blong Presiden Dieter F. Uchtdorf, we i bin seken Kaonsela long Fas Presidensi, wan nara gudfala wei blong bildim laef blong yumi, i kam taem “yumi stanap long ol leg blong yumi mo stap givim seves long olgeta we oli stap raon long yumi.”1 Taem yu givim seves long ol narawan, yu stap mekem wanem Jisas i bin mekem mo stap lan blong kam moa olsem Hem. Mo bae yu no blesem laef blong ol pipol we yu stap givim seves long olgeta nomo, be bae yu kasem blesing tu.
Krietem Wan Evri Dei Taemtebol blong Prea mo Skripja Stadi
Wan nara wei blong bildim wan hapi laef hem i blong bildim wan rilesensip wetem Papa long Heven mo Jisas Kraes. Wan gudfala wei blong mekem hemia hem i tru long prea mo skripja stadi.
Presiden Uchtdorf i talem: “Blong mekem rilesensip blong yu wetem God i kam moa strong, yumi nid blong gat ol taem we i gat mining, wanwan wetem Hem. Bae hem i sam waes invesmen blong taem blong yumi mo hadwok blong yumi blong kam moa kolosap long Papa blong yumi long Heven… taem yumi stap lukluk moa blong prea mo mekem skripja stadi blong yumiwan evri dei.”2
Prea hem i wan janis blong toktok wetem Papa blong yumi long Heven. !Hem i save yumi, i lavem yumi, mo wantem blong harem yumi! Taem yumi prea wetem tru hat, givim tangkyu blong yumi, mo askem ol samting we yumi nidim, Hem i lisin mo oltaem ansarem ol prea blong yumi long wei mo taem blong Hemwan.
Taem i kam long skripja stadi, i no gat wan raet wei ia nomo blong mekem. !Impoten samting i we, !yu mekem! Presiden Russell M. Nelson i bin tijim se, “Blong draon evri dei long toktok blong God, i impoten, blong mekem se yumi save laef long saed blong spirit.”3 Hem i sua se blong stap spendem taem wetem ol skripja evri dei, bae i helpem yu blong bildim wan laef blong fet mo paoa.
Stap Raon long Ol Man we Oli Leftemap Tingting blong Yu blong Mekem Gud
Papa long Heven i wantem yumi blong joen mo bildim ol rilesensip wetem ol narawan—speseli ol famli mo fren. Fulap taem, olgeta we yumi stap spendem taem wetem olgeta, oli gat paoa blong jenisim yumi. Nomata we oli ol memba blong Jos o no, yu mas stap raon long ol pipol we oli helpem yu blong laef folem gospel, kipim ol standet blong Lod, mo kam wan moa gud man o woman. Yu save helpem olgeta we oli stap raon long yu tu blong mekem semmak. ?Wijwan long ol fren blong yu i stap helpem yu blong bildim fandesen blong yu long stret mo gud fasin?
Stap Faenem Glad Taem Yu Stap Bildimap Fandesen blong Yu
I gat fulap nara wei we yu save bildim laef blong yu blong i strong long saed blong spirit mo stap glad, we i tekem tu blong stap go long jos mo tekpat long sakramen, stap mekem mo holemtaet ol kavenan, mo stap folem kaonsel blong ol profet we oli laef.
Hem i impoten blong tingbaot se evri samting ia i nidim wok mo taem. Oltaem i nid blong stap bildim mo lanem samting, be no nid blong mekem hemia yuwan. Lod bae i helpem yu evri dei, taem yu stap traem bes blong yu blong bildim wan laef we yu mo Hem i save glad long hem, mo bae i karem glad i kam long yu.