“God Bae I Faet long Ol Faet blong Yu—long Wei blong Hem,” Blong Ol Yut Oli Kam Strong, Septemba 2021, 15–17.
Kam Folem Mi
God Bae I Faet long Ol Faet blong Yu—long Wei blong Hem
Ol Sent bifo oli bin lanem wan o tu samting abaot ol wei blong God.
Saeon Kamp i kam long Judith Mehr
Grup blong Ol Sent we oli statem Saeon Kamp ia oli stap hop mo prea from wan merikel taem wan grup blong bitim 300 rabis man, oli kam blong kilim Ol Sent ia long wan moning.
Folem lidasip blong Josef Smit, Saeon Kamp i bin stap maj blong sam wik, stat long Ohaeo kasem Misuri. Ol Jos memba ia oli stap hop blong helpem Ol Sent blong karembak ol graon blong olgeta we oli bin ronemaot olgeta long hem long Jakson Kaonti, Misuri, YSA. Be oli wantem tekemaot laef blong olgeta mo agensem olgeta truaot long maj blong olgeta. Mo naoia, wan nara grup blong rabis man oli wantem blong karemaot laef blong olgeta.
Merikel we Ol Sent blong Saeon Kamp i stap prea from, bae i kam no longtaem. Hem i kam long wan saen blong ol blak klaod we i stap hip tugeta longwe i kam. Wan strong hariken wetem tanda i faerap evri ples mo i sakem ol bigbigfala drop blong ren we i aes. Hariken ia i stopem grup blong ol rabis man ia.
Histri blong Josef Smit i eksplenem se, “I luk olsem we God blong ol faet i givim oda blong panisim ol rabis man ia, blong protektem ol wokman blong Hem long ol enemi blong olgeta.” “Ol drop blong aes ren ia i foldaon long olgeta be i no long mifala, mo mifala i no bin kasem eni kil be sam tenet blong mifala nomo i bin foldaon mo sam oli wetwet, be ol hat blong ol enemi blong mifala i gat ol hol mo sam oli kasem kil, iven ol masket blong olgeta i brok mo ol hos blong olgeta i ronwe.”1
Ol drop blong aes ren we i spolem ol samting i wan pat nomo blong hariken ia. Ren i ren strong tumas i mekem se Fising Reva; reva ia we i seperetem tufala grup ia; i dip kasem kolosap 12 mita). Wota i kasem joen blong leg nomo long moning.
Lod i promesem ol memba blong Saeon Kamp: “Bae mi faet long ol faet blong yufala” (Doktrin mo Ol Kavenan 105:14). Taem hemia i hapen, i no gat tu tingting se wij saed bae i win.
Ol Merikel blong Ol Dei blong Yumi Tedei
Samtaem taem yumi ridim ol kaen stori olsem hemia, bae yu tingting se from wanem ol kaen merikel olsem we i pulum ae i no stap hapen long yu long ol hadtaem blong yu .
Elda Jeffrey R. Holland blong Kworom blong Olgeta Twelef Aposol i bin serem sam tingting we i save help, i no longtaem i pas. Hem i talem: “Plis andastanem se Hem we i neva slip o foldaon long slip, i kea long hapines mo fasin we ol pikinini blong Hem oli kam wan god, mo hemia i bitim eni nara samting we bae man long heven i gat blong mekem. Hem, Hem i lav we i klin gud, i Man ia we i gat glori, mo nem blong hem i Papa we I Gat Sore.
Bae yu talem: “‘Spos i olsem, ?from wanem lav mo sore blong Hem i no openem Ol Red Si blong mifalawan, mo i no letem mifala i wokbaot tru long ol trabol blong mifala long drae graon?’”
Long ol nara toktok, sapos God i bin faet long ol kaen faet olsem blong ol pikinini blong Hem bifo, ?from wanem Hem i no mekem naoia? ?From wanem Hem i no karemaot evri sik? ?From wanem Hem i no stopem ol wo mo hanggri mo ol safaring truaot long wol?
?O, from wanem Hem i no stopem buli ia nomo we i no wantem lego yu yu stap kwaet? ?O helpem famli blong yu blong mekem samting moa gud tugeta?
Elda Holland i tijim i go moa se: “Ansa long ol kwestin ia, hem i ‘Yes, God i save mekem merikel naoia nomo, be naoia o afta, bae yumi lanem se ol taem blong wokbaot blong yumi long wol ia, bae Hem, mo Hemwan nomo bae i lidim.’ Hem i lukaotem kalenda blong wanwan long yumi evriwan.”2
Taem yu folem komanmen blong God, yu gat raet ia long help blong Hem. Be i no gat wan long yumi i save jusum olsem wanem o wetaem bae help ia i kam.
Ol Blesing We Yumi No Ting Se Bae I Kam
Bae yumi gobak long Saeon Kamp smol moa. I tru se merikel long Fising Reva i wan we i pulum ae. Mo hem i no merikel ia nomo we ol memba blong Saeon Kamp oli bin luk long taem blong maj blong olgeta. Be taem bae yu rid insaed long Kam Folem Mi mo lan long seminari long manis ia, bae yu faenem se ol samting i no hapen long wei we Ol Sent oli bin plan long hem.
Oli bin ting se stamba tingting blong Saeon Kamp hem i blong help blong karembak ol graon long Jakson Kaonti we ol grup blong ol rabis man oli bin stilim aot long Ol Sent.
?Ol Sent oli bin karembak ol graon blong olgeta? No.
?Ol Sent oli bin safa long wan maj blong kolosap 900-mael (1,448-kilo mita) i go long Misuri? Yes. Samtaem oli safa plante. Pat we i nogud moa hem i taem sik kolera i bin go raon long kamp mo i kilim 13 man.
Taem yu luk antap nomo, i luk olsem ful hadwok blong olgeta i blong nating. Be fulap we oli bin maj long kamp ia oli no bin lukluk olsem ia. Brigham Yang i bin tokbaot eksperiens ia se, “Oli stap pem gud mi—we oli pem wetem hevi intres—yes, mekem se mak blong mi i fulap tumas wetem save we mi bin kasem taem mi bin stap travel wetem Profet [Josef Smit].”3
Fulap nara memba blong Saeon Kamp oli bin tokbaot tu, ol lesen we oli bin lanem mo hamas maj ia i bin impoten. Profet Josef Smit, hemwan i talem: “Ol brata. Sam long yufala i kros long mi, from se yufala i no bin faet long Misuri; be bae mi talem long yufala, God i no bin wantem blong yufala i faet. Hem i no bin save oganaesem kingdom blong hem … be sapos nomo we hem i tekem [ol lida blong hem] aot long wan grup blong ol man we oli givim laef blong olgeta, mo oli bin mekem wan bigfala sakrifaes semmak olsem we Ebraham i bin mekem.”4
Saeon Kamp i kam long C.C.A. Christensen
Maet oli bin karembak ol graon blong olgeta olsem risal blong fet blong olgeta. Be oli bin kasem fulap blesing tumas long ol nara wei. Hemia wan fasin we maet bae yu stap luksave tu, long laef blong yu. Mo wanem we God i helpem yumi blong kam olsem tru long ol hadtaem blong yumi, fulap taem, hem i wan merikel we i bigwan moa bitim we Hem i karemaot yumi long ol hadtaem blong yumi.
Tru Win blong God
Taem yu stap stadi long ol laef blong Ol Sent bifo, yu save luksave paoa blong God plante taem. Yu rid abaot ol bigbigfala blesing. Yu faenem tu, ol bigbigfala hadtaem. Be olgeta we oli trastem God go kasem en, riwod blong olgeta we i no save finis i stap strong i stap.
Taem yu folem God mo trastem Hem, !bae Hem i faet long ol faet blong yu mo givim ol merikel we yu nidim! Ol merikel ia bae oli kam long wei mo taem blong Hem, be risal blong hem i tru. Bae oli stretem fulwan, eni hadtaem—long laef ia o nekis laef. Hem i impoten semmak, taem yu folem Hem, bae yu neva wokbaot yuwan. “From hemia, yufala i mas fetful; mo luk, mo luk gud, mi mi stap wetem yufala kasem en” (Doktrin mo Ol Kavenan 105:41).