“Oli No Jusum Mi blong Tekpat long Tim blong Danis,” Blong Ol Yut Oli Kam Strong, Septemba 2021, 10–11.
Oli No Jusum Mi blong Tekpat long Tim blong Danis
Nem blong mi i no stap long lis. Mi filim nogud bigwan. Be Lod i bin tijim wan samting long mi.
Ol pikja droing oli kam long Gabriele Cracolici
Mi laekem blong danis finis, stat long taem we mi gat tri yia. Mekem se taem mi stap long praemeri, mi bin glad tumas blong tekpat long ol tes blong save joenem tim blong danis taem oli mekem ol tes ia. Mi no gat tu tingting nating se, wetem talen mo eksperiens blong mi, bae i isi nomo blong joenem tim.
Afta long sam dei we mifala i bin mekem tes blong danis, oli putumap ol nem blong olgeta we oli pas mo joenem tim blong danis. Mi harem nogud taem mi no bin save faenem nem blong mi long lis ia. Mi filim nogud bigwan. Mi gobak long haos mo krae long bed blong mi. Mi kros long tija blong danis mo harem nogud se mi no bin gud inaf blong save joenem tim. Mama blong mi i wokbaot sloslo i kam insaed long rum blong mi mo givim tingting ia blong askem Papa long Heven blong i givim mi paoa blong save gotru long “hadtaem” ia long laef blong mi. Mi no bin wantem tumas be mi agri mo talem wan sot prea. Afta long prea ia, mi no bin filim gud yet, mekem se mi gohed blong pulpulum harem nogud blong mi. Mi no silip gud nating long naet ia.
Long nekis moning, mi fosem miwan blong kamaot long bed. Mi stil save tingbaot harem nogud blong mi long maen blong mi, mo mi wantem blong gobak haed andanit long ol blangket nomo. Be bifo we mi wantem mekem hemia, mi tingbaot wan promes we bisop blong mi i bin mekem. Hem i talem se, sapos mi ridim ol skripja blong mi evri dei, nomata sapos hem i blong 15 minit nomo, bae mi kasem blesing. Sapos mi eva nidim wan blesing, bae hem i naoia ia nao.
Taem mi stap rid, mi bin faenem ves ia insaed long Doktrin mo Ol Kavenan:
“Mi talem long yufala ol fren blong mi, no fraet, bae mi mas leftemap tingting blong hat blong yufala; yes, stap glad oltaem naoia i go, mo long evri samting, talem tangkyu;
“Wet long Lod wetem fasin blong save wet longtaem, from we ol prea blong yufala oli go insaed long sora blong Lod blong Sabaot, mo oli rekodem i stap wetem sil ia mo testeman ia—Lod i bin mekem tabu promes mo i bin talem wetem atoriti se bae hem i mekem folem wanem yufala i bin askem.
“From hemia, hem i givim promes ia long yufala, wetem wan kavenan we i no save jenis nating, se bae hem i mekem folem ol prea ia; mo long saed blong evri samting we yufala i bin gat hadtaem wetem, bae oli wok tugeta blong gud blong yufala, mo blong glori blong nem blong mi, Lod i talem” (Doktrin mo Ol Kavenan 98:1–3).
Mi sek wantaem. Mi sidaon wetem ol klos blong silip blong mi mo hea blong mi we i olbaot mo sapraes tumas long hamas mi bin nidim ol skripja ia. Ol tri ves ia i bin wasemaot evri filing blong kros mo harem nogud. Mi bin filim lav blong Papa blong mi long Heven mo save se Hem i save wanem we mi stap gotru long hem. Wetem niufala lukluk ia, mi save luk se, blong oli no jusum mi blong joenem tim blong danis ia, i wan smol hadtaem nomo long rod blong laef blong mi. Mi tangkyu mo foldaon long ol ni blong mi mo talem tangkyu long Papa long Heven.
Long ful dei ia, mi bin save kipim Tabu Spirit wetem mi mo lukluk ol hadtaem blong mi olsem ol janis blong save gro. Bae mi oltaem holemtaet ol ves ia kolosap long hat blong mi. Mo bae mi tingbaot promes blong bisop blong mi abaot ol blesing blong stap tanem miwan i go long ol skripja. Mi tangkyu tumas we mi save pat blong Jos ia mo gat wan save abaot gospel ia. Mi save se plan we Papa long Heven i gat blong yumi, i tru i wan plan blong hapines.