“Mi harem se i had blong mi holemtaet ol standet taem evri man we mi save oli stap long wan series rilesensip wetem wan. ?Bae mi mekem wanem?” Blong Ol Yut Oli Kam Strong, Septemba 2021, 9.
Ol Kwestin mo Ol Ansa
“Mi harem se i had blong mi holemtaet ol standet taem evri man we mi save oli stap long wan series rilesensip wetem wan. ?Bae mi mekem wanem?”
Kam Antap Yuwan
“Traem blong gat wan lukluk i go long taem we i no save finis mo spendem taem blong developem ol rilesensip we i moa dip wetem ol famli mo fren blong yu. Ol helti fasin ia bae i mekem ol narawan oli kam moa kolosap long yu, from bae oli luk yu ia we i moa gud—!we hem i stret yu!”
Ellie S., 17, Kalifonia, YSA
Lukaotem Help
“Sapos yu stap gotru hadtaem ia blong filim se yu yu no pat, askem kamfot long Papa long Heven. Tabu Spirit bae i gaedem yu mo bae Hem i stap blong helpem yu. Mo tu, yu save oltaem askem advaes long papa mo mama mo ol lida blong yu, !from se olgeta oli bin stap long ples we yu stap long hem!”
Jaime G., 17, Nuevo Kasas Grandes, Meksiko
Mekem Ol Niu Fren
“Bae mi stap rimaenem miwan se God i lavem mi. Afta bae mi tekem janis ia blong toktok long sam fren blong long taem, mo bae mi mekem ol aktiviti blong mekem ol niu fren. Yu save yusum taem blong bildim tras blong yu long yuwan, bildim ol talen, mo testemoni, mo bae evri samting i go gud.”
Julia S., 12, Albeta, Kanada
Kaonsel blong Ol Profet
“Hem i had blong tingbaot taem we i no save finis taem i luk olsem taem ‘naoia’ i moa impoten. Tingbaot se ol profet mo ol nara lida blong Jos oli givim strong kaonsel blong no stap long ol series rilesensip long ol yangfala yia blong yu, iven afta long 16 yia. Taem yu stap long ol series rilesensip taem yu yang, i save brekem hat blong yu mo gat ol fasin we i no klin. Yu save askem tu, long Papa long Heven abaot wanem nao i bes samting blong yu yu mekem.”
Julia C., 17, Yuta, YSA
Stap Insaed mo Tekpat
“Wan gudfala wei blong filim se yu yu pat hem i blong stap insaed mo tekpat long ol nara samting. Traem wan niu spot, mekem tes blong tekpat long wan pleiplei blong skul, o joenem wan klab blong mekem ol robot. Sapos yu stap mekem wan samting we yu lavem, bae yu mitim ol pipol we yu laekem blong spendem taem wetem olgeta.”
Mayah S., 16, Bejing, Jaena
Hem I Joes blong Yu
“Sapos yu gat 16 yia finis, yu save jus sapos yu wantem go aot wetem deit blong yu we yutufala nomo. Be taem yu stap mekem joes ia, no tingbaot wanem bae ol narawan oli tingting long yu. Sapos yu filim se yu rere, yu mekem. Sapos yu no rere, no mekem.”
Felipe M., 14, Rio de Janero, Brasil
Ol Nara Impoten Rilesensip
“Nomata we yu no stap long wan rilesensip wetem ‘wan patna,’ yu stil gat ol gud rilesensip wetem ol fren mo famli raon long yu. Stap talem tangkyu from ol rilesensip ia. Blong save mekem ol rilesensip ia i kam strong, stap mekem samting olsem Kraes mo stap olsem wan gudfala eksampol.”
Taylee L., 17, Yuta, YSA
Wet blong Save Mekem Ol Series Rilesensip
“Mi laekem blong no stap long wan rilesensip yet. Sam long ol fren blong mi oli no stap spendem taem wetem mi from oli stap spendem evri taem blong olgeta wetem ol boefren blong olgeta. Mi filim se mi mi fri blong mitim ol pipol taem mi no mekem ol impoten desisen hariap tumas.”
Gina C., 16, Nuevo Kasas Grandes, Meksiko
No Mekem Yu Wari Tumas
“Mi bin filim semmak filing ia, be blong stap prea long Lod, ridim ol skripja blong mi, mo toktok wetem papa mo mama blong mi i bin helpem mi. Yumi no nid blong wari tumas, from se Lod bae i helpem yumi blong save taem taem i stret. !Stap glad long laef blong yu, mo spendem taem wetem ol fren mo famli taem yu yang! Smol taem ia blong laef blong yu i hapen wan taem nomo, so no wari blong mekem i go pas hariap.”
Victoria G., 16, Nuevo Kasas Grandes, Meksiko