“Ukoukoran Tion ao ana Kakabwaia te Uea,” Ibukin Kakorakoraia Kairake, Tebetembwa 2021, 2–5.
Nakomai, Iriirai
Ukoukoran Tion ao ana Kakabwaia te Uea
Reirei ao Berita aika Tabu 97:21
Katean Tion bon te tabe ae korakora, ma e uoti naba kaniwanga aika korakora.
Te moan koaua ae korakora mai karawa bwa te Atua e tangiriira ma Nanona, iango, kantaninga, ao korakorana ni kabane. E tangira ae te kabanea n tamaroa ibukira—E teimatoa inanon anne, ao E na teimatoa n tainako. E tangiriira bwa ti na kukurei, tiaki te kukurei ae aki teimaan ke ae karaoaki ma te kukurei ngkai ao n akea tokina n ai Arona. E tangiriira bwa ti na rikirake ao n riki bwa natin te Atua mwaane ao aine aika akea tokiia.
I ataia bwa e aki bebete n tainako te bwai aei. A mwaiti mai ibuakomi aika a kaitara ma karawawataaki ao bon kataakim are n tabetai e a bon rangi ni kanganga aroia. Ko a tia n iangoa raoi oin am kangaanga, tabeua kangaanga n am utu, ke kangaanga imareia aaba ni kabuta te aonaaba, ao n iangoia, “N na kanga ni kona n rinanon kakaewenako aika a taraa n rangi ni kangaanga aikai?” Ara kaeka a kona ni kamimiiko: Ukoukoria ni katea Tion.
Enga Tion?
Ko Tangirai Riki Nakoia Uakai?, iroun David Lindsley
Rinanon rongorongon te aonaaba e a tia te Atua ni weteia Ana aomata bwa a na katea Tion. Anne n tainako te tabo are a kona iai ana aomata te Atua ni kainaomataaki man ana kairoro te aonaaba ao ni maiu ma te kukurei imarenaia. Ma ni koron boong aika korakora aikai, Tion e aki tianaki nakon te tabo teuana iaon te aba. N ara tai, Tion e kona ni kuneaki n taabo ae a mena iai membwa aika kakaonimaki n Ana Ekaretia Iesu Kristo ibukiia Aika Itiaki ni Boong aika Kaitira. Te Uea e kabwarabwaraia aomatan Tion aikai bwa “ti teuana nanoia ao teuana aia iango” (Mote 7:18) ao a “itiaki nanoia” (Reirei ao Berita aika Tabu 97:21). Ni uarerekena, ti aki manga iangoa Tion bwa te tabo are ti na nako ni maeka iai ma e kanga arona ni maeka.
A mwaiti kakabwaia aika tamaroa aika a tauraoi ibukim ngkana ko karaoa am kabanea ni kona ni katea Tion, n riki n aron are e kainnanoia te Uea bwa ko na karaoia, ao n ibuobuoki ni katauraoa te kawai ibukin Okina nakon te aonaaba. Te aeka ni kekeiaki anne e kainnanoa te mwakuri ao te onimaki ae korakora, ma e na uota naba te kukurei ao te kimwareirei ae akea tokina. Au kantaninga bwa ko nora aei bwa e anai nano ao ni kakukurei n ai arou! N aron are e a tia Beretitenti Russell M. Nelson n reireia, akea—bon akea—ae e na rangi ni kakawaki riki.1 Ao ti riki n ira buakona! Bon ngaira taan buaka aika mai moan te rain ni kamanoa te koaua. Ti aki uoti kanoan taian katii, ti uoti taian kunikai ibukin te ikuaki! Ti weteaki ni buokia ni kamaiua te aonaaba ao ni katauraoiia aomata n taabo n taromauri ni kabutaa te aonaaba are e kona iai n roko te tia Kamaiu.
Tangira te Atua ao Kaain Rarikim
Ti kona ni karekea te aeka n utu aei ke kainrarikira ke te aba man kawakinan tua n tatangira. Ao ngkana ti tangira riki te Atua, e na reke riki tangiraia kainrarikira ao n noori kawai aika ti kona ni kakabwaiaia iai. Iai kaain rarikira aika a kainnanoa buokaia, ao aika a kainnano aika ti na buokiia, ao iai mwakuri aika raraoi aika ti ria ni karaoi n taabo ni kabane.
E kabwarabwara n te taina te Uea te tabe aei ao te kakabwaia n aron aei:
“Mangaia aei, bwaina te kakaonimaki; … buokiia ake a mamaara, tabekirake baai ake a tine, ao ni kakorakorai bubuaniwae aika aki konamaki.
“Ao ngkana ko kakaonimaki ni karokoa te toki ko na baunaki n te aki maamate, ao te maiu ae akea tokina ni nne ni maeka are I a tia ni katauraoia ni mwengan Tamau” (Reirei ao Berita aika Tabu 81:5–6).
Kamanoa te Koaua
Ngkana e weteira te Atua bwa ti na katea Tion, E weteira bwa ti na kamanoi Ana reirei ao n tiku ni matoatoa n ara onimaki. E na aki beebete ke ni kamwengaraoi karaoan aei n tainako, ma ti riai ni karaoia—ma te nanoanga, taotaonaki n nano, te atatai, ao te tangira ae aki kona ni bwaka ibukiia ake tabeman. N ara kekeiaki ni katea Tion, ti na kaitibo ma koraki ake aroaroia ke kunikaia ke anuan maiuia a aki botau ma arora. Ngkana ti kaitibo ma aeka n aomata aikanne, ti riai ni karaurau ni kaeka n ae raoiroi, tiaki n taraira bwa ti raoiroi riki. N aekan kangaanga aikanne te kabanea n raoiroi ni bwai ae ti kona ni karaoia bon karaoan te katei ae riai ao ni kaota te “tangira ae aki kewe” ibukiia (taraa Reirei ao Berita aika Tabu 121:41).
I tangiriia tabeman bwa a na kakukureia n taian kakabwaia ae iai irou, ma n tabetai I aki ataia bwa N na kanga n tibwauai n te kawai ae e na aki ekanako temanna ke n aki ota iai. E a tia te kibu aei ni buokai rinanon nako weteakiu ni kabane n te Ekaretia ao n tabeu ae a na tia reirei Kristo:
“Ngaia are, e koaua ae I tuangkami, tabekarake bwanaami nakoia aomata aikai; taekini iango ake N na kaaki i nanomi, ao kam na aki kamangaoaki i mataia aomata;
“Bwa e na kaotaki nakoimi n te tai naba arei, eng, n te tai raoi anne, te bwai are kam na taekinna.
“Ma te tua ae I anganingkami, bwa kam na taekini bwaai nako are kam na taekini n arau, n te nano ae aki manikangare, n te tamnei ae nimamannei, ni bwaai ni kabane.
“Ao I anganingkami te berita aei, bwa ngkana kam teimatoa ni karaoa aei te Tamnei ae Raoiroi e na nako ni kaota koauan bwaai ni kabane are kam na taekinna.” (Reirei ao Berita aika Tabu 100:5–8).
E Waaki Nako te Kakabwaia
Raoraou kairake aika kam tangiraki, e na iai kakaewenako ni boong aika imwaimi, ma maium e na rangi n nakoraoi ngkana ko tangira te Atua ao ko karaoa Nanona, tangira te Uea Iesu Kristo, ao karaoa am kabanea ni kona ni maiuakina te euangkerio. Ngkana ko kakaonimaki, e na mena Tion iroum n taabo ake ko mena iai. I kakabwaiako bwa ko na taua ma te kimwareirei. Iai ana bwai ae mwaiti te Uea aika e kawakin ibukim!