“Rinerine,” Ibukin Kakorakoraia Kairake, Tebetembwa. 2021, 12–14.
Rinerine
Tamnei iroun Getty Images
N ririki aika mwaiti n nako, temanna mai irouia taan Kairiiri n te Maungabu e tibwaua te karaki aei ae e anga te kakaewenako:
Te Cherokee ae wanawana, temanna kaain te baronga i Amerika n te United States, e tuanga tibuna te mwaane te taeka ni kaikonaki ibukin te maiu. “Inanou ao iai te un ae korakora imarenaia kameanti aika uoman,” e taku tibuna te mwaane. “Temana e buakaka, n onrake n te un ao te kairiribai, te kakai un ao te nanokawaki, babakanikawai ao te kewe. Are temanna e raoiroi: e onrake n te akoi ao te nanoanga, taotaonaki n nano ao te koaua, te tangira ao te kukurei. Te un anne e reitinako inanora.”
“Te kameanti raa ae na tokanikai?” e titiraki te tibu te mwaane.
“Temanna are ko kamwarakea,” te tibu te mnwaane e kaeka ma te wanawana.1
Te taeka ni kaikonaki iaoia kameanti aika uoman e kabwarabwara te koaua ae akea tokina. Natin te Atua a bungiaki bwa a na karaoi rinerine imarenan te raoiroi ao te buakaka. E kariaia te kakaitara bwa ti na karaoi rinerine aika iai uaaia, ao a raraoi. Ana Boki Moomon e reirei te koaua aei n taetae man booki aika tabu: “Bwa e riai ae a na iai kaitaraan bwaai ni kabane.”2
Ana babaire Tamara are i Karawa e katauraoi uoua bwaintituaraoi bwa ana ibuobuoki n taian rinerine aikai: (1) E anganiira te Tamnei ae Raoiroi ni kairi ara rinerine, ao (2) E anganiira te Tia Kamaiu are Ana Mwakuri ni Kamaiu e karaoira bwa ti na kona n rairi nanora ao ni kanakoi mwiin rinerine aika buakaka—ngkana te tia bure e a tia ni kamwarakea te kameanti ae buakaka.
I. Te Rairannano ao te Kinaaki
Ngke I tia n taetae ma kairake, teuana te titiraki ae moan te okioki te titiraki iaon te rairannano. “Ko na kanga n ataia ngkana ko a tia n raira raoi nanom?” “Ko na kanga n ataia ngkana a bon kabwaraaki raoi am bure?” Kaeka nakon titiraki aikai a roko rinanon te Tamnei ae Raoiroi, kaain te Atu n Atua are e uoti rongorongo mai i karawa.
Ana bwai n tituaraoi te tamnei ae raoiroi e aranaki bwa “rongorongon te euangkerio aika raoiroi.”3 E kariaira bwa ti na kamaunai mwiin rinerine aika buakaka ake a tia ni kamwarakea te kameanti ae buakaka ao ni kamemerea ara konabwai ni kona n ongo ana wirikiriki te Tamnei ae Raoiroi. E irianaki te rairannano ma kinakina ae ti a tia ni karaoa te bwai ae bure, n aki manga karaoia, ao ni motikia inanora nakon te Atua bwa tina kawakin Ana tua. Ngkana ti raira nanora, ti wetea mwakan Ana Mwakuri ni Kamaiu Iesu Kristo, are e kakorakora ara kakaitau ao ara tangira Ibukina bwa ara Tia Kamaiu.
Kainnanoan te rairannano e aki tianaki nakon buure aika kakaiaki are e kainnanoa kaotakina nakon te bitiobi. Te rairannano bon te bwai ae ti riai ni kakaraoia ni katoabong. Angiin te rairannano e irekereke ma atakina n ae raba ae ti a tia ni karaoa te bwai ae bure, n ingainga ni bitaki, ao ni kataia ni kaetia ma aomata ake ti a tia ni bure nakoia. N taekan te taeka ni kaikonaki ibukiia kameanti ake uoman, te rairannano iai inanona bwa ti riai n aki rineia ni karaoi buure aika uareeke, n aron ae ngkana ti rineia bwa ti na un ke ni bakantang. Ti riai naba n raira nanora (bitaki) ngke ti a tia n rineia ni bakataea ara tai are e anganiira Atuara iaon tabeua waaki ni kakukurei aika tauraoi aika mwaiti aika akea mwiia ae na kanakoraoira riki.
II. Kinakin te Bitaki ae Kakawaki
Mwiin te rairannano ae tamaroa bon manga kanakoraoan kororaoira ni karekei namakin mairoun te Tamnei ae Raoiroi, are e buokiira ni karaoi rinerine aika wanawana ao ni kaoniira ma te kimwareirei. A mwaiti naba kairake aika a titiraki: “N na kanga n ataia ngkana te wirikiriki ke te kaeka are I karekea bon mairoun raoi te Uea ao tiaki te bwai ae I tangiria?”
Ni kina bwa te wirikiriki bon te rongorongo mairoun te Tamnei ae Raoiroi ke bon te bwai ae ko tangiria, ti kainnanoia ni kabonganai koaua aika teniua.
-
N te otenanti n te toa, te berita are e na “memena Tamneina n tainako [iroura]” e ira ara berita are ti na katoka Arana iaora, ao n ururingnga n tainako, ao ni kawakin Ana tua nako.4 Ngkana ti kabwaka ni kawakin berita aikai, ti na kona ni kamangaoa a na wirikiriki te tamnei aika ti namakin.
-
Wirikiriki mairoun te Uea a karekeaki n tainako n te tai ae akea te karongoa iai ke i nukan te nebonebo, kamatebwai ni booki aika tabu, ke te tataro ke n ara tai n ibuobuoki n ara wewete, tiaki n te babakanikawai ke ngkana ti katobibiaki ni bwain te aonaaba.
-
Kabaneana, ti riai n rangi ni kai karekea te namakin nakon kairi mai ieta ae ti kainnanoia ni bita te kawai ae ti a kaman kakaraoia. Te namakin ni bita te kawai e kona n onimakinaki riki nakon te namakin ni karaoa te bwai teuana ae ti a kaman tangiria ni karaoia.
III. Te Eti e Teimatoa n Eti
Raoraou kairake aika kam tangiraki, kam a roko n te roro n ikawai n te aonaaba ae rangi ni kaokoro nakoia aia taneiai ami karo ke tibumi. Anne ae karikia bwa te bwai ae onoti aron kakawakina ibukim bwa ko na ururingnga ae bwaai ngkoa aika kakawaki ao tuua a bon bwainaki ao ni kainnanoaki bwa a na iraki n taai aikai naba. Ngaira bon natin te Atua, ao Ana tua a teimatoa ni bwainaki, tao ti mwananga n te waekon ke te spaceship, ao bwa ti reitaki n te taetae ke n te tekiti.
Te eti e teimatoa n eti, ao te kairua e teimatoa ni kairua, n aki tabe ma te bwai ae taekinaki ke ni karaoaki irouia taan karao tamnei, aomatan te TV, ke titaa n te takakaro. Kainibaire inanon booki aika tabu, aia reirei burabeti aika maiu, ao bwaai aika kakawaki inanon Ibukin Kakorakoraia Kairake te boki ae uarereke a teimatoa n riki bwa kairam n oin am rinerine ni waaki ni bootaki imarenan te mwaane ao te aine ae itiaki, marurungin rabwatam, te kokoaua, kunnikai ma tarakim, ao atuun maroro riki ake tabeua. Irii ma te kakaonimaki. ao ko na kakabwaiaaki. “Te boki ae atunaki Ibukin Kakorakoraia Kairake e riai n riki bwa am kainibaire,” Beretitenti Russell M. Nelson e reireiniira. “Bon te kainibare ae e kantaningaia te Uea bwa Ana kairake ni kabane a na boutokaia.”5
N ana taeka n te botaki n taromauri ibukiia kairake n te aonaaba ae moan te korakora, e berita ara burabeti bwa:
“Ngkana ko karaoa te mwakuri n tamnei ma te tangira ae kainnanoaki ni karikirakea te rabakau n tamnei n reirei aron te ongo nakon ana wirikiriki te Tamnei ae Raoiroi, ko na karekei ni kabane kaetieti ae ko na kainnanoi ni maium. Ko na anganaki kaeka nakon am titiraki n oin ana kawai te Uea ao n oin Ana tai.”6
I raona au berita nakon are irouna, ngkai I kakoaua ara Tia Kamaiu Iesu Kristo, are a na reirei ao a na Mwakuri ni Kamaiu a kakoroi nanon aikai ni kabane, n aran Iesu Kristo, amen.