“Karikiko Bwa te Kabanea n Tamaroa,” Ibukin Kakorakoraia Kairake, Tebetembwa 2021, 6–7.
Nakomai, Iriirai
Karikiko Bwa te Kabanea n Tamaroa
Nimaua kawai aika ko kona iai ni katea te maiu ae kakukurei ao ni kakimwareirei.
Te kamataata n te tamnei iroun Juliet Percival
Ngke te Uea e tuanga Iotebwa Timiti bwa e na katea te Kirtland Tembora, E aki katikua bwa e na kakaea angan kateana bon irouna. E kaoka te banna are e na kairiia nakon te tokanikai.
“E riai ni kateaki te auti, tiaki n ana kawai te aonaba, ” e taekinna te Uea. “E riai ni kateaki n te banna are I a tia ni kaotia” (Reirei ao Berita aika Tabu 95:13–14). E anganiia te Uea kaetieti n aron katean te tembora (taraa Reirei ao Berita aika Tabu 95:15–17).
Ma te kakaitau, e a tia te Uea ni kaotia nakoira ae raka riki nakon ti katean te tembora. E a tia naba n anganiira kaetieti bwa ana buokiira n riki bwa te kabanea n nakoraoi n aomata. Ngkana ti iriia, ti na katea maiura “tiaki n aron te aro n aomata” ma n te kawai are e a tia te uea ni koroia.
Aikai nimaua kawai aika ko kona iai ni katea te maiu ae kakukurei ao ni kakimwareirei ae boboto iaon Iesu Kristo.
Katea Aan te Kateitei ae Koaua
Taan korotamnei ke taan kateitei a na tuangko aeaan te kateitei ae matoatoa e kakawaki n aeka ni kateitei nako. E reirei Ereman ae te kabanea n tamaroa n ann te kateitei ibukin maiura bon “te bwa are ara Tia Kabonwi, are Kristo, natin te Atua” (Ereman 5:12). Ti kona ni karika Kristo bwa aara man te nako Ina ao n irii Ana reirei. E kanga am namakin n te bwai ae ko karaoia ni karika Kristo bwa aan maium?
Buokiia Tabeman
Te kawai riki teuana ni katea maiura, ni kaineti nakon Beretitenti Dieter F. Uchtdorf, are te Kauoman ni Kauntira ngkoa n te Moan Beretitentii, e roko ngke “ti nakonako ni beku ibukin te Uea ao naake irarikira.”1 Ngkana ko beku ibukiia tabeman, ko karaoa te bwai ae karaoia Iesu ao n reiakina arom n riki n ai Arona. Ao ko na aki tii kakabwai maiuia aomata ake ko beku ibukiia, ma ko na kakabwaiaaki naba.
Karaoa Tain Karaoan te Tataro ao Kamatebwaian Booki aika Tabu
Te kawai teuana ni katea te maiu ae kakukurei bon man katean te reitaki ma Tamara are i Karawa ao Iesu Kristo. Te kawai ae tamaroa ni karaoa anne bon rinanon te tataro ao warekan booki aika tabu.
E taku Beretitenti Uchtdorf: “Ni kakorakora ara reitaki ma te Atua, ti kainnanoa te tai ae onoti ma Ngaia. Ni kabaneakin ara tai n tataro i bon iroura ae onoti ao te kamatebwai ni koroboki aika tabu… bon baika a wanawana ni kawakinaki ibukin ara tai ao ara kekeiaki ni kaniira riki nakon Tamara are i Karawa.”2
Te Tataro bon te tai ni marooro ma Tamara are i Karawa. E kinaira, tangiriira, ao n tangiria n ongora mai iroura! Ngkana ti tataro ma te tangira, anga ara kaitau, ao ni bubuti ibukin bwaai aika ti kainnanoi, E ongora ao e kaekai n tainako n oin Ana kawai ao n ana tai.
Ngkana e roko n tain kamatebwaian koroboki aika a tabu, akea te kawai teuana ae eti ni karaoana. Te bwai ae kakawaki bon karaoana! Beretitenti Russell M. Nelson e a tia n reirei, “Kabanean nanom inanon ana taeka te Atua ni katoa bong a kakawaki ibukin maiura n tamnei.”3 Te wareware man booki aika tabu ni katoabong e na, katuruturua te bwai ae e a tia n taekinaki bwa e eti ke e koaua, e buokiko ni karikirakea te maiu n onimaki ao ni korakora.
Katobibiko ma Naake a Kaungako Bwa ko Na Karaoa ae Raoiroi
Tamara are i Karawa e tangiriira n reitaki ao ni karekea te reitaki ma tabeman—riki utu ao raoraora. Ti kairoroaki n tainako irouia naake ti kabanea ara tai mangaia. Tao kaain te Ekaretia ke tiaki, ko riai ni katobibiiko irouia aomata aika buokiko ni maiuakina te euangkerio, kawakin ana kainibaire te Uea, ao n riki bwa te aomata ae raoiroi riki. Ko kona naba ni buokiia naake a katobibiko ni karaoa ae aron naba anne. Antai mai ibuakoia raoraom ae buokiko ni katea aam iaon te etieti?
Kakaea te Kimwareirei ni Katea Aam
A mwaiti kawai aika ko kona ni katea iai maium bwa e na marurung n tamnei ao n iai te kimwareirei, n raonaki ma te nako n te taromauri ao n taua te toa, karaoan ao kawakinan berita aika tabu, ao n iri aia reirei burabeti aika maiu.
E kakawaki bwa ko na uringnga bwa bwaai ni kabane aikai a kainnanoa te mwakuri ao te tai. Iai n tainako te kateitei ao te reirei ae na karaoaki, ma ko na aki karaoia bon ti ngkoe. E na buokiko te Uea ni katoabong ngkana ko kabanea am kona ni katea te maiu are ngkoe ao Ngaia aika kam kona ni kamoamoa iai ao anne e na uota te kimwareirei nakoim.