“Katean Tion rinanon te Katiteuanaaki,” Ibukin Kakorakoraia Kairake, Tebetembwa 2021, 20.
Kabanea n Taeka
Katean Tion rinanon te Katiteuanaaki
E boboto iaon taetae n te maungatabu ni kabuta n Okitobwa 2008.
Tion bon te tabo ao te botanaomata. Tion bon te ara are e anganaki ana kaawa ngkoa Enoka. E arania ana aomata te Uea bwa Tion, “ibukina bwa ti teuana nanoia ao ti teuana aia iango, ao ni maeka inanon te raoiroi, ao bon akea ae e kainnano i buakoia” (Mote 7:18). E taekinna n taabo riki tabeua, “Bwa aio Tion—ake a itiaki nanoia” (Reirei ao Berita aika Tabu 97:21).
Ni katean Tion inanon mweengara, ara uoote, ao ara titeiki, ti kainnanoa (1) ni katiteuanaaki n te nano ae titeuana ao te iango ae titeuana; (2) n riki bwa aomata aika tabu; ao (3) n tabe ibukiia raarikin ao kainnano. Ti aki kona n tataninga ni karokoa e roko Tion ibukin bwaai aikai bwa a na riki—e na roko Tion ti ngkana a riki.
Ti na nano teuana ao n iango teuana ngkana ngaira n tatabemaniira nako ti katuka te Tia Kamaiu inanon maiura, irakiiia naake E a tia ni mwiokoia bwa e na kairiira, ao ni katiteuanaaki n te tangira ao te tabeaianga bon imarenaia. Te katiteuanaki aei ao te tangira ibukiia n tatabemaniia, e kamwaitaki tengaa te tai ni kawai aika kakokoro, e na “manga kaoka Tion Iehova” (Itaia 52:8).
Te kamattaata n te tamnei iroun Albert Pinilla