“I Aki Rineaki bwa Kaain te Tiim ni Mwaie,” Ibukin Kakorakoraia Kairake, Tebetembwa. 2021, 10–11.
I Aki Rineaki bwa Kaain te Tiim ni Mwaie
Akea arau iaon te beeba. E a rangi n uruaki nanou. Ma e reireinai te bwai teuana te Uea.
Kamataata n te tamnei iroun Gabriele Cracolici
I a kaman tangira te mwaie ngke teniua au ririki. Ngaia are ngke I a roko n te kauarinan n reirei, e ingainga nanou ngke e a boo te tutuo n te mwaie ibukin te karinrin. Ake raraomau bwa n au tarena ao au taneiai, e na bebete rekeu bwa kaain te tiim.
Tabeua te bong imwiin te tutuo, e a katekeaki araia taan mwaie n te tiim. Ma te nano ae rawawata, I aki kona ni kunea arau ibuakon aara. E a rangi n uruaki nanou. I okira mweengau ma n tang iaon au kainiwene. I rang n un iroun te tia reirei n te mwaie ao n aki kukurei ngkai I a tia n aki tau nakon te tiim ni mwaie. E karaurau tinau n rinako nakon au ruu ao e tuangai bwa N na tuanga Tamara are i Karawa ibukin te korakora bwa e aonga ni kakorakorai rinanon te “tai ni kangaanga” inanon maiu. I waeremwe ni kariaia ao I a karaoa te tataro ae uarereke. Imwiin te tataro I aki namakina te nakoraoi, ngaia ae I reitinako n nanokawaki ao n aki kukurei. I matu ma te aki rau n te tairiki anne.
N te bong are imwiina I a bon keiaki n teirake mai iaon au kainiwene. Uringakin kabwakau e teimatoa n au iango, ao I ti tangiria n oki rikaaki ni matu n au kainiwene iaan ana burangketi. Ma imwain ae I karaoia, I uringa te berita are e a tia ni karaoia te bitiobi. E taekinna bwa ngkana I wareware ni booki aika tabu ni katoa bong, e ngae ngke ti 15 te miniti, N na bon kakabwaiaaki. Ngkana I kainanoa te kakabwaian, aio bon te tai anne.
Ngke I wareware, I kunea te kibu aei n Reirei ao Berita aika Tabu:
“I tuangkami raou, tai maaku, e na kabebeteaki nanomi; eng, kimwareirei n aki toki, ao ni bwaai ni kabane anga ami kakaitau;
“Ngkai kam tataninga te Uea ma te taotaonaki n nano, bwa ami tataro a tia n rin n taningan ami Uea ae Tabaota, ao a tauaki mwiia ma te kanikina aei ao kakoauaana—te Uea e a tia ni tuea ao n tua bwa a na kakoroaki bukiia.
Ngaia are, e anga te berita aei nakoimi, ma te berita ae tabu ae aki bibitaki bwa a na kakoroaki bukiia; ao bwaai ni kabane ake kam a tia ni karawawataaki iai a na mwakuri ni kabane ibukin ae raoiroi ibukimi, ao nakon mimitongin arau, e taku te Uea” (Reirei ao Berita aika Tabu 98:1–3.).
I rangin n tounako. I tekateka ma au kunnikai ni matu ma irau ae mangaongao ao ni mimi n aron kainnanoan booki aika tabu aikai. A bane ni bua nako namakin n un ao n nanokawaki inanon kiibu aikana teniua aikanne. I namakina ana tangira Tamau are i Karawa ao E ata te bwai ae I rinanona. Ma te taratara ae boou aei, I kona n noria bwa aki rineakiu ibukin te tiim ni mwaie bon te kangaanga ae uarereke inanon maiu. I katorobubua iaon bubuan waeu ao I kaitaua Tamau are i Karawa.
Ibukin nikiran te bong, I a kona ni kateimatoa te Tamnei ma ngai ao n tarai katakiu bwa taai ibukin te rikirake. N na aki toki n tauii kiibu aikai ni kaan ma nanou. Ao N na uring ana berita au bitiobi iaon kakabwaia ngkana ko rairaki nakon booki aika tabu. I rangi ni kakaitau ngkai I kona n riki bwa kaain te Ekaretia aei ao ni karekea ataakin te euangkerio. I ataia bwa a na baire Tamara are i Karawa ibukira bon te babaire ni kakukurei.