“Tarai Cake mo Yacova na Nomu iTuvaki Vinaka Duadua,” Me iSakisaki ni iTabagone, Sepi. 2021, 6–7.
Lako Mai, Mo Muri Au
Tarai Cake na Nomu iTuvaki Vinaka Duadua
E lima na sala me tarai cake kina e dua na bula marau ka rekitaki.
Droini mai vei Juliet Percival
Ena gauna sa vakaroti Josefa Simici kina na Turaga me tara na Valetabu e Kirtland, a sega ni laivi koya me vakasamataka ga vakataki koya na kena icakacaka. A vakatakila o koya e dua na ituvatuva ena veimuataki ki na qaqa.
“Me tara e dua na vale, ia ena sega ni vaka na kena itaratara e kila ko vuravura,” a kaya na Turaga. “Me tara kina ena kena ivalavala au na vakaraitaka” (Vunau kei na Veiyalayalati 95:13–14). A qai solia na Turaga na idusidusi ena ivakarau me tara kina na valetabu (raica na Vunau kei na Veiyalayalati 95:15–17).
Eda vakavinavinaka, ni sa vakaraitaka vei keda na Turaga e levu cake mai na itaratara walega ni valetabu. Sa solia talega vei keda o Koya na idusidusi me vukea me da yacova na ituvaki uasivi duadua eda rawa ni yacova. Ni da muria, eda na tara cake na noda bula “sega ena ivalavala vakavuravura” ia ena sala sa lewa na Turaga.
Oqo e lima na sala me tarai cake kina e dua na bula marau ka rekitaki e kena itakele o Jisu Karisito.
Tara E Dua na Yavu Dei
Na daudroini se dautaravale cava ga ena tukuna vei iko ni dua na yavu tudei e sa ka bibi ki na vale kecega. E vakavuvulitaka o Ilamani ni yavu vinaka duadua ni noda bula sai koya “na uluvatu ni noda Dauveivueti, o koya na Karisito, na Luve ni Kalou” (Ilamani 5:12). E rawa ni da cakava me noda yavu o Karisito ena noda lako mai Vua ka muria na Nona ivakavuvuli. Na cava o vakila ni o sa kitaka tiko ena nomu cakava me yavu ni nomu bula na Karisito?
Qaravi Ira na Tani
E dua tale na sala cecere me tarai cake kina na noda bula, me vaka a kaya o Peresitedi Dieter F. Uchtdorf, na iKarua ni Daunivakasala ena Mataveiliutaki Taumada ena gauna oya, e yaco mai ena gauna “eda sa tu e yavada ka qaravi ira era tu wavoliti keda.”1 Ni o qaravi ira na tani, o sa kitaka tiko na veika a cakava ko Jisu ka vulica tiko mo vakataki Koya vakalevu cake. Ia o na sega walega ni vakalougatataka na nodra bula na tamata o qarava, ia o na vakalougatataki talega o iko .
Cakava e Dua na iVakarau Tudei ni Masu kei na Vuli iVolanikalou
E dua tale na sala me tarai cake kina e dua na bula marau o ya me tarai cake e dua na veiwekani kei na Tamada Vakalomalagi kei Jisu Karisito. E dua na sala cecere me vakayacori kina sai koya ena masu kei na vulici ni ivolanikalou.
E kaya o Peresitedi Uchtdorf: “Me vaqaqacotaki na noda veimaliwai kei na Kalou, e gadrevi kina e dua na noda gauna vakatabakidua vata kei Koya. Vakanamata vakamalua ena masumasu yadua kei na vuli ivolanikalou ena veisiga… ena so na vakayagataki vakavuku ni noda gauna kei na sasaga meda toro voleka yani vua na Tamada Vakalomalagi.”2
Na masu e dua na madigi me da veitaratara kina kei na Tamada Vakalomalagi. E kilai keda o Koya, lomani keda, ka sa tuva tu e dua na ituvatuva baleti keda. Ni da masu ena yalodina, cabora noda vakavinavinaka, ka kerea na veika eda gadreva, ena vakarorogo o Koya ka dau sauma mai ena Nona sala ga kei na gauna.
Ni sa yaco mai na vuli ivolanikalou, e sega ni dua ga na sala dodonu me caka kina. Na ka bibi o ya mo cakava! E vakatavulica o Peresitedi Russell M. Nelson, “Na tabadromuci e veisiga ena vosa ni Kalou sa ka bibi sara ki na noda vakabulai tiko vakayalo.”3 Na vakayagataki ni gauna e veisiga ena ivolanikalou ena, sega ni vakatitiqataki, ni na vukei iko mo tara cake e dua na bula ni vakabauta kei na kaukauwa.
Mo Vakavolivoliti Iko Mai Vei Ira Era na Vakayaloqaqataki Iko mo Caka Vinaka
E vinakata na Tamada Vakalomalagi meda sema ka tara cake na veimaliwai kei ira na tamata—vakabibi na matavuvale kei na itokani. Eda dau vakayarayarataki vakawasoma mai vei ira eda dau veimaliwai vata. Se ra lewe ni Lotu se sega, e dodonu mo vakavolivoliti iko mai vei ira na tamata era vukei iko mo bulataka na kosipeli, maroroya na ivakatagedegede ni Turaga, ka yaco mo tamata vinaka cake. E rawa talega ni o vukei ira era tu wavoliti iko me ra vakayacora vakakina. O cei vei ira na nomu itokani e vukei iko tiko mo tara cake na nomu yavu ni buladodonu?
Kune Reki ena Tarai Cake ni Nomu Yavu
E vuqa tale tu na sala o rawa ni tara cake kina na nomu bula me kaukauwa vakayalo ka rawata na reki, oka kina na lako ki lotu ka vakaivotavota ena sakaramede, cakava ka maroroya na veiyalayalati, ka vakamuria na nodra ivakasala na parofita bula.
Sa ka bibi me da nanuma tiko ni veika kece oqo ena taura na cakacaka kei na gauna. Ena dau tu ga na tarabula kei na vuli me caka e veigauna, ia e sega ni dodonu mo cakava duadua. Ena vukei iko na Turaga ena veisiga ni ko tovolea na nomu vinaka duadua mo tara cake e dua na bula ka rawa vei iko kei Koya mo drau marautaka ka na kauta mai na reki.