“Ena Vala na Kalou ena Nomu iValu—ena Nona Sala,” Me iSakisaki ni iTabagone, Sepi. 2021, 15–17.
Lako Mai, Mo Muri Au
Ena Vala na Kalou ena Nomu iValu—ena Nona Sala
Era vulica na Yalododonu taumada e dua na ka se rua me baleta na sala ni Kalou.
Keba kei Saioni mai vei Judith Mehr
Ni ra yalayala tu e 300 na ilawalawa dauvakacaca cudrucudru me ra vakarusai ira ena mataka, era a nuitaka ka masulaka tiko na ilawalawa Yalododonu era lewena na Keba kei Saioni me yaco e dua na cakamana.
Ena ruku ni veiliutaki nei Josefa Simici, sa tayabe tiko kina na Keba kei Saioni me vica na macawa mai Oaio ki Misuri. Era a nuitaka na lewe ni Lotu oqo me ra vukei ira na Yalododonu era a vakasavi tani mai na yasayasa vaka-Jekesoni e Misuri, Amerika me ra rawata tale na nodra qele. Ia era a sotava na veivakarerei kei na veisaqasaqa ena loma ni nodra ilakolako taucoko. Ia oqo, era sa veivakarerei tiko vei ira e dua tale na ilawalawa.
Na cakamana era masulaka na Yalododonu ni Keba kei Saioni sa voleka ni yaco mai. E yaco mai ena kena sa soqoni tiko mai vakayawa na o loaloa. A lidi e dua na yaseyase warumisa ena veiyasana kecega ka qeqera mai na uca cevata lelevu. A tarovi ira na ilawalawa dauvakacaca oqo na cava oqo.
“E vaka me sa tasereki mai vua na Kalou ni ivalu na ivakaro ni veisausaumi me taqomaki ira na nona italai mai na nodra veivakarusai na kedra meca,” e vakamacalataka na itukutuku makawa kei Josefa Simici. “Sa lutuki ira na uca cevata, ka sega vei keimami, ka sega na leqa keimami sotava, vakavo ga na vakabalei ni neimami valelaca ka suasua eso vei keimami, eso na keimami meca e qaqara na nodra isala ka ra sotava na veivakacacani, ka ra voroka sara mada ga na nodra sea ni nodra dakai ka ra dro na nodra ose.”1
Na qeqera ni uca cevata e dua ga na tiki ni cava. A tau bi na uca ka sa tubu kina na Uciwai na Fishing, na uciwai ka tawasei rau na ilawalawa e rua, me viavia yacova yani na 40 na fiti (12 na mita) na kena titobu. A yaco toka ga i qurulasawa ena mataka lailai.
A yalataka na Turaga vei ira na lewe ni Keba kei Saioni, “Au na vala ena nomudou ivalu” (Vunau kei na Veiyalayalati 105:14). Ni yaco oqori, ena sega ni vakatitiqataki na yasana ena qaqa kina.
Cakamana ni Gauna Oqo
Ena so na gauna ni o wilika na itukutuku vakaoqo, o na vakataroga beka se cava na vuna e sega ni dau yaco kina vei iko ena nomu sasaga bula na mataqali cakamana lelevu vakaoqo.
A wasea o Elder Jeffrey R. Holland ena Kuoramu ni iApositolo Le Tinikarua eso na veivakararamataki e rawa ni veivuke. E kaya o Koya: “Yalovinaka ka kila ni o Koya ka sega vakadua ni moce se sosovu e kauwaitaka vakalevu nodra marau kei na bula vakacereceri na Luvena mai na veika kece tale e vakalou. O Koya na dau loloma dina, lagilagi vakaikoya, kei Tamada Dauloloma ena Yacana.
“‘Ke sa vaka oya,’ ko na kaya beka, ‘e sega beka ni dodonu me tawasea rua na noda dui wasa damudamu na Nona loloma kei na loloma cecere ka vakatara vei keda me da lako curuma na noda veidredre ena qele mamaca?’”
Ena dua tale na kena itukutukuni, kevaka e sa vala oti na Kalou ena ivalu vakaoqori me baleti ira na Luvena e liu, na cava ena sega ni cakava vakakina ena gauna oqo? Cava na vuna e sega ni tavoya laivi kina na mate kecega? Cava na vuna e sega ni muduka kina na ivalu kei na via kana kei na rarawa e vuravura taucoko?
Se cava na vuna me kakua kina ni tarovi koya na dauveivakasaurarataki ka dau vakasagai iko voli ga? Se vukea na nomu matavuvale me ra veimaliwai vinaka cake?
E vakavuvulitaka tale o Elder Holland: “Na isau ni taro eso vaka oqori na ‘Io, na Kalou e rawa ni vakarautaka na cakamana ena gauna vata ga oya, ia eda na qai vulica totolo sara se emuri ni veigauna kei na itabagauna ni noda ilakolako vakayago e Nona ka Nona duadua ga me dusimaka.’ E dau vakatulewataka o Koya na ivolanivula oya kivei keda vakayadudua kece sara.”2
Ni ko muria na ivakaro ni Kalou, sa nomu na veivuke ni Kalou. Ia e sega ni dua vei keda e rawa ni digitaka na ivakarau se na gauna e yaco mai kina na veivuke oya.
Veivakalougatataki Sega ni Namaki
Meda lesu tale mada vakalailai ki na Keba kei Saioni. Na cakamana ena Uciwai na Fishing sa dua dina na ka vakasakiti. Ia e sega walega ni cakamana era a raica na lewe ni Keba kei Saioni ena nodra ilakolako. Ia me vaka o na wilika ena Lako Mai, Mo Muri Au ka vulica ena semineri ena vula oqo, a sega ni yaco me vaka na nodra tuvaka na Yalododonu na veika a yaco.
Era nanuma ni inaki taucoko ni Keba kei Saioni oya me vukea na kena rawati na veivanua mai na yasayasa vaka-Jekesoni era a butakoca mai vei ira na Yalododonu na dauvakacaca cudrucudru.
Era a taura lesu tale beka na Yalododonu na nodra qele? E sega.
Era a vakararawataki beka na Yalododonu ena ilakolako 900 na maile (1,448-kilomita) ki Misuri? Vinaka, io. Ena so na gauna vakalevu sara. Ena kena ca duadua, e dua na kacabote ni kolera a curuma na keba ka vakamatea e 13.
E delana, e vaka me sa druka na sasaga taucoko. Ia e sega ni o koya oqori na ka era raica e vuqa era a lako tiko ena keba. E tukuna o Brigham Young ena veika a sotava, “Au sa saumi vakavinaka—saumi ka vakatuburi vakalevu—io … a vuabale na noqu ivakarau ena kilaka au ciqoma ena noqu lako vata voli kei na Parofita [Josefa Simici].”2
E vuqa tale na lewe ni Keba kei Saioni era a veivosakitaka talega na lesoni e vulici kei na yaga ni maji. E kaya na Parofita o Josefa Simici “Kemuni na taciqu, eso vei kemuni sa cudruvi au, baleta ni ko ni sega ni laki vala e Misuri; ia meu kaya mada vei kemuni, a sega ni vinakata na Kalou mo ni vala. Sa sega ni tauyavutaka rawa na nona matanitu … vakavo kevaka sa kauti [ira na nona iliuliu] mai na dua na isoqosoqo ni tamata ka ra a vakacabora na nodra bula, ia ko ira sa solibula vakalevu me vakataki Eparaama.”4
Keba kei Saioni mai vei C.C.A. Christensen
A sega beka ni vua ni nodra yalodina na kena vakalesui mai na nodra qele. Ia era sa vakalougatataki vakalevu sara ena so tale na sala. Oqori e dua na ivakarau o na raica rawa talega ena nomu bula. Kei na ka e vukei keda kina na Kalou meda yacova mai na noda vakatovolei sa vakavuqa ni dua na cakamana levu cake mai na Nona sereki keda mai na noda vakatovolei.
Qaqa Dina ni Kalou
Ni o vulica na nodra bula na Yalododonu taumada, sa rawa ni o kila na gauna ni veivakayarayarataki ni Kalou kei na veigauna tale eso. O na wilika me baleta na veivakalougatataki bibi. O na kunea talega na gauna ni dredre titobu. Ia vei ira era nuitaka na Kalou me yacova na ivakataotioti, sa dei na nodra icocovi tawamudu.
Ni ko muria na Kalou ka vakararavi Vua, ena vala o Koya ena nomu ivalu ka vakarautaka na cakamana o gadreva! Na cakamana oqo ena lako mai ena Nona sala kei na gauna, ia na kena icavacava ena dei. Na veivakatovolei kece ena yaco me wali—ena bula oqo se na kena e tarava. E tautauvata na kena bibi, ni o muri Koya, o na sega vakadua ni taubale duadua. “O koya, mo dou yalodina tiko ga; raica ka rogoca, au na tiko ga vata kei kemudou me yacova na ivakataotioti” (Vunau kei na Veiyalayalati 105:41).