“E dau dredre me da maroroya na ivakatagedegede ni tamata kece au kila e tiko ena dua na veimaliwai bibi kei na dua. Na cava meu cakava?” Me iSakisaki ni iTabagone Sepi. 2021, 9.
Taro kei na Kena iSau
“E dau dredre me da maroroya na ivakatagedegede ni tamata kece au kila e tiko ena dua na veimaliwai bibi kei na dua. Na cava meu cakava?”
Veivakavinakataki-Yadua
“Tovolea mo rai tawamudu ka vakayagataka na gauna mo vakatorocaketaka kina na veimaliwai titobu kei na nomu matavuvale kei na itokani. Na ivakarau bulabula oqo ena kauti ira mai eso vei iko baleta ni ra na raici iko ena kena vinaka duadua—o iko dina!”
Ellie S., 17, California, Amerika
Vakasaqara na Veidusimaki
“Kevaka o sotava tiko na dredre ena nomu vakila ni o sa guilecavi, kerea vua na Tamada Vakalomalagi me vakacegui iko. Ena tuberi iko na Yalo Tabu ka na tiko vata kei iko. Vakakina, e rawa talega ni o taro ivakasala vei rau na nomu itubutubu kei ira na iliuliu, baleta ni ra sa lakova oti na sala oqori!”
Jaime G., 17, Nuevo Casas Grandes, Mexico
Buli iTokani Vou
“Au na vakananumi au ni lomani au na Kalou. Oti au na qai taura na madigi meu veitaratara kei ira na itokani makawa, kau na tauyavutaka eso na itaviqaravi meu vakaitokani vou. E rawa ni o vakayagataka na gauna oqo mo tara cake kina na nomu yalodei, taledi, kei na ivakadinadina, ka na vinaka taucoko mai kina.”
Julia S., 12, Alberta, Canada
Nodra iVakasala na Parofita
“E rawa ni dredre na vakasamataki ni tawamudu ni bibi cake na ‘gauna sara ga oqo.’ Nanuma tiko ni o ira na parofita kei na iliuliu tale eso ni Lotu era sa veivakasalataki vakaukauwa baleta na vakaitau ena gauna ni yabaki tinivakacaca, ni sa oti sara mada ga na yabaki 16. Ni tauri vakabibi na vakaitau ni da se gone ena rawa ni vakavuna na kavoro ni uto kei na voroki ni bula savasava. E rawa talega ni o kerea vua na Tamada Vakalomalagi se cava na ka vinaka duadua mo cakava.”
Julia C., 17, Utah, Amerika
Vakaitavi kina
“E dua na sala vinaka me da okati kina o ya me da vakaitavi ena veika tale eso. Tovolea e dua na qito vou, vakatovolei ena vakatasuasua ni koronivuli, se lewena e dua na kalavo ni robot. Kevaka o cakava tiko e dua na ka o dau taleitaka, o na sotavi ira na tamata o taleitaka na tiko vata kei ira.”
Mayah S., 16, Beijing, Jaina
E Nomu na Digidigi
“Kevaka o sa yabaki 16, e rawa ni o digitaka kevaka o vinakata mo lako yarua. Ia ni vakayacori na digidigi oqori, kakua ni vakasamataka na veika era na nanuma na tani me baleti iko. Kevaka o nanuma ni o sa vakarau, cakava sara. Kevaka e sega, kua.”
Felipe M., 14, Rio de Janero, Brazil
Eso Tale na Ka Bibi me Nanumi Tiko
“E dina ga ni o sega beka ni veitau vakatabakidua tiko ‘kei na dua tale,’ se tiko ga na nomu veimaliwai vinaka kei ira na itokani kei na matavuvale era tu wavoliti iko. Vakavinavinakataka na isema oqori. Me rawa ni vaqaqacotaki ira, mo va-Karisito ka ivakaraitaki vinaka.”
Taylee L., 17, Utah, Amerika
Waraka mo Vakatubura na Veiwekani Bibi
“Au taleitaka niu sega ni se vakaitau tiko. Eso na noqu itokani era na sega ni gade vata kei au baleta ni ra sa dau tiko voli ga kei ira na nodra itokani tagane. Au vakila niu galala meu sotavi ira na tamata ka sega ni dau vakatauca vakatotolo na lewa ena veika e bibi. ”
Gina C., 16, Nuevo Casas Grandes, Mexico
Kakua ni Vakasaurarataki Iko
“Au sa vakila talega na veika vata oqori, ia na masu vua na Turaga, wilika na noqu ivolanikalou, kei na veitalanoa vata kei rau na noqu itubutubu sa vukei au. E sega ni gadrevi meda vakasaurarataki, baleta ni na vukei keda na Turaga me da kila na gauna e donu kina. Marautaka na nomu bula, ka tiko vata kei ira na itokani kei na matavuvale ni ko se gone! Na gauna oqo ni noda bula e dau yaco ga mai vakadua, kakua ni vakatotolotaka.”
Victoria G., 16, Nuevo Casas Grandes, Mexico