“Digidigi,” Me iSakisaki ni iTabagone, Sepi. 2021, 12–14.

Digidigi

Mai vei Peresitedi Dallin H. Oaks

iMatai ni Daunivakasala ena Mataveiliutaki Taumada

iVakatakilakila

Dallin H. Oaks

iVakatakilakila

Wolifa

iTaba mai na Getty Images

Ena vuqa na yabaki sa oti, a wasea kina e dua na noda Vakaitutu Raraba na italanoa dredre oqo:

E dua na Cherokee vuku, e dua vei ira na yavusa itaukei ni vanua e Amerika, a tukuna vei makubuna tagane e dua na vosa vakatautauvata me baleta na bula. “E lomaqu e dua na ivalu rerevaki vei rau e rua na wolifa,” a kaya o tukana. “E dua na ka ca: sinai ena cudru kei na veivuvutaki, vakalomalomani koya kei na rarawa, kocokoco kei na lasu. Na kena ikarua e vinaka: vakasinaiti ena yalovinaka kei na yalololoma, yalomalumalumu kei na dina, loloma kei na reki. Na veivala oya e sa tiko e lomada yadua. ”

“Na wolifa cava ena qaqa?” a taroga o makubuna tagane.

“O koya o vakania,” a sauma vakayalomatua na tukana.¹

Na italanoa vakaibalebale oqo ni rua na wolifa e vakaraitaka e dua na dina tawamudu. Era sucu na luve ni Kalou me ra digitaka na vinaka kei na ca. Na veibasai e vakatara meda digidigi dodonu ka vakaibalebale. E vakavuvulitaka na dina oqo na iVola i Momani ena vosanikalou: “Ni sa dodonu me vakakina, ni sa tu na veibasai ni ka kecega.”²

Na ituvatuva nei Tamada Vakalomalagi e vakarautaka e rua na isolisoli me veivuke ena veidigidigi oqo: (1) E solia vei keda o Koya na Yalo Tabu me dusimaka na noda digidigi, kei na (2) Sa solia vei keda o Koya e dua na iVakabula ka sa vakavuna na Nona Veisorovaki me vakabau na noda veivutuni ka vagalalataka na revurevu ni digidigi ca—ni ra sa vakania na wolifa ca.

iVakatakilakila

Jisu Karisito

I. Veivutuni kei na Veivakacaucautaki

Niu vosa tiko vei ira na itabagone, e dua vei ira na ulutaga wasoma era dau taroga me baleta na veivutuni. “O na kila vakacava ni sa rauta na nomu veivutuni?” “O na kila vakacava ni ko sa vosoti dina?” Na isau ni veitaro oqo e lako mai vua na Yalo Tabu, na Lewetolu Vakalou ka dau kauta mai na itukutuku mai lomalagi.

Na isolisoli ni veivutuni sa vakatokai me “itukutuku vinaka ni kosipeli.”³ E vakatara vei keda me da bokoca na revurevu ni digidigi ca ka dau vakania na wolifa ca ka vakamalumalumutaka na noda rawata me rogoca na veivakauqeti ni Yalo Tabu. Na veivutuni e oka kina na kena kilai ni da sa caka cala, biuta laivi na cala o ya, ka da saga meda vagolea na yaloda vua na Kalou kei na maroroi ni Nona ivakaro. Ni da sa veivutuni, eda sa kaciva na kaukauwa ni Veisorovaki i Jisu Karisito, ka vakalevutaka noda vakavinavinaka kei na noda lomani Koya me vaka ni noda iVakabula.

Na gadrevi ni veivutuni e sega ni yalani ki na ivalavala ca bibi e gadrevi me vakatusai vei bisopi. Na veivutuni e dua na ka e yaga me caka e veisiga. E vuqa na veivutuni e okati kina na noda kila vakataki keda ni da sa caka cala, ka lewa me da veisau, ka saga me vakadodonutaki vei ira eda caka cala kina. Me vaka na vosa vakatautauvata ni rua na wolifa, na veivutuni sa koto kina na muduki ni nodra vakani na wolifa dau caka ca ena veikakana lalai sara mada ga, vaka na gauna eda digitaka kina meda cudru se vuvu. Eda gadreva talega me da veivutuni (veisau) ni da digitaka me da vakaotia na noda gauna va-Kalou ena so na veitaviqaravi ka sega ni rawa ni vakavinakataki keda cake.

II. Kila e Dua na Duidui Bibi

E dua na vua totoka ni veivutuni sai koya me tauyavutaki tale noda bula kilikili me da ciqoma na veivakauqeti ni Yalo Tabu, ka na vukei keda me da digidigi vakayalomatua ka vakasinaiti keda ena reki. E vuqa na itabagone era vakataroga talega: “Au na kila vakacava ni veivakauqeti se isaunitaro au ciqoma e vu dina mai vua na Turaga ka sega ni ka ga au vinakata?”

Me kilai ni veivakauqeti e dua na itukutuku mai vua na Yalo Tabu se dua ga na gagadre vakatamata yadua, e gadrevi meda bulataka e tolu na dina.

Ena cakacaka vakalotu ni sakaramede, na yalayala ni na “tiko ga kei keda na nona Yalotabu” e muria mai na noda yalayala ni da na taura na Yacana, ka dau nanumi Koya tikoga, ka muria na Nona ivunau.⁴ Ni da sega ni maroroya na yalayala eso oqo, eda na rawai rawarawa ni da vakaseva na ivurevure ni veivakauqeti eda vakila.
Na veivakauqeti ni Turaga e dau ciqomi ena veigauna vakadigagalu se ena loma ni sokalou, vuli ivolanikalou, se masu se ena gauna ni veiqaravi ena noda veikacivi, sega ena sasaga kocokoco se ni ra vakavolivoliti tu ena itaviqaravi vakavuravura.
Kena itinitini, eda gadreva me da dau kidava na veidusimaki me veisautaki e dua na sala eda sa sasagataka tiko. E dua na veivakauqeti me veisau na mua e rawa ni vakabau vakalevu cake mai na dua na veivakauqeti me da tosoya e dua na ka eda via cakava.

III. Na Dodonu e se Dodonu Tikoga

Kemuni na noqu itokani gone lomani, o ni sa matua cake tiko mai ena dua na vuravura duatani sara mai na kena era a sotava na nomuni itubutubu kei ira na tubumuni. Oqori e bibi kina vei iko mo nanuma tiko ni se kaukauwa tikoga na yavunilewa kei na ivunau makawa. Eda sa luve ni Kalou, ka sa rui bibi na Nona ivakaro, se da lako voli ena qiqidreti ena ose se waqa ni maliwalala, se da veitaratara ena vosa se vakau itukutuku ena talevoni veikauyaki.

Se dina tikoga na dina, ka cala tikoga na cala, se cava ga era na tukuna se cakava na dau vakaraitaki ena iyaloyalo, daukakaburaki ena TV, se tamata dauqito rogo levu. Na ivakatagedegede ena ivolanikalou, nodra ivakavuvuli na parofita bula, kei na veika talei ena ivolalailai Me iSakisaki ni iTabagone era se nomu idusidusi vinaka duadua tikoga ni nomu digidigi ena bula savasava vakaveiyacovi, bulabula vakayago, dina, isulusulu kei na irairai, kei na kena veiulutaga tale eso. Muri ira ena yalodina, ko na vakalougatataki. “Na ivolalailai Me iSakisaki ni iTabagone e dodonu me nomu ivakarau tudei,” e vakavulica vei keda o Peresitedi Russell M. Nelson. . “Sai koya na itagede sa namaka tiko na Turaga mera tutaka na Nona itabagone.”⁵

Ena nona lotu qaqa ni itabagone e vuravura raraba, a yalataka kina na noda parofita:

“Kevaka mo na cakava ena yalodina kei na gugumatua na cakacaka vakayalo e gadrevi mo vakatorocaketaka kina na maqosa bibi vakayalo ni kena vulici na iwalewale me rogoci na vakasolokakana ni Yalo Tabu, sa na tu kina vei iko na idusidusi kece sara o na gadreva ena nomu bula. Ena soli mai vei iko na isau ni nomu vakatataro ena sala ni Turaga kei na Nona gauna.”⁶

Au vakaduavatataka na noqu yalayala kei na nona, niu vakadinadinataka na noda iVakabula o Jisu Karisito, na nona ivakavuvuli kei na Veisorovaki e rawa ni vakatara na ka kece oqori, ena yaca i Jisu Karisito, emeni.