“Vakasaqarai Saioni kei na Veivakalougatataki ni Turaga,” Me iSakisaki ni iTabagone Sepi. 2021, 2–5.
Lako Mai, Mo Muri Au
Vakasaqarai Saioni kei na Veivakalougatataki ni Turaga
Vunau kei na Veiyalayalati 97:21
Na tarai cake kei Saioni e dua na itavi cecere, ia e kauta talega mai na kena isau cecere.
Na imatai ni dina cecere vakalomalagi sai koya na Kalou e lomani keda e Yalona taucoko, kaukauwa, vakasama, kei na igu kecega E vinakata o Koya na ka vinaka duadua me baleti keda—sa dau vaka tu kina o Koya, ka na vaka tu ga kina o Koya. E vinakata o Koya meda bula marau; sega ni marau ena dua walega na gauna se marau vakamatanataki ga ia na marau qaqa ka tawamudu me vakataki Koya. E vinakata o Koya meda tubu ka yacova na noda inaki vakalou ni da sa luvena tagane se yalewa na Kalou.
Au kila ni sega ni dau rawarawa oqo. E vuqa vei kemuni o ni sotava na dredre kei na veivakatovolei yadua ka rawa ni veiuabaleti ena so na gauna. O ni sa raica beka na nomuni ituvaki, ena so na ituvaki ena nomuni matavuvale, se na leqa ena kedra maliwa na veimatanitu e vuravura raraba, ka vakataroga, “E rawa vakacava meu rawata ena kaukauwa ni bolebole oqo?” O ni na kurabui beka ena dua na kena isau: Vakasaqara mo tarai Saioni cake.
Evei o Saioni?
Lovest Thou Me More Than These?, mai vei David Lindsley
Ena itukutuku makawa sa dau kacivi ira wasoma na Nona tamata na Kalou me ra tauyavutaki Saioni. Oqori e dau dua na vanua era rawa ni galala kina na tamata ni Kalou mai na veivakayarayarataki ni vuravura oqo ka bula veilomani vakataki ira. Ia ena iotioti ni itabagauna cecere oqo, e sega ni yalani o Saioni ki na dua ga na vanua. Ena noda gauna, e rawa ni yaco me Saioni na vanua cava ga e kune kina e dua na lewenilotu yalodina ni Lotu i Jisu Karisito ni Yalododonu Edaidai. Na Turaga e vakamacalataki ira na tamata oqo e Saioni me “yalovata ka duavata” (Mosese 7:18) ka “savasava na lomadra” (Vunau kei na Veiyalayalati 97:21). Me vakalekalekataki ga, eda sa sega tale ni vakasamataki Saioni me vanua eda na laki bula kina ia na ivakarau me da na bula kina.
Sa vakarautaki tu vei iko e vuqa na veivakalougatataki vakasakiti ni ko cakava na nomu vinaka duadua mo tarai Saioni, mo vaka na tamata e gadreva vei iko na iVakabula, ka veivuke ena vakarautaki ni sala ni Nona lesu mai ki vuravura. Na sasaga oqori e ka ni cakacaka kei na vakabauta vakaitamera, ia ena kauta talega mai na marau tawayalani kei na reki. Au nuitaka ni ko ni na kunea oqo me veilauti ka taleitaki me vakataki au! Me vaka e vakatavulica o Peresitedi Russell M. Nelson, e sega ni dua na ka—esega sara ga ni dua na ka—e rawa ni bibi cake.1 Eda sa vakaitavi kina! Eda sa sotia ena sala e liu ni dina. Eda sega ni kauta tiko na gasau ni dakai; eda kauta voli na ivadreti! Eda sa kacivi meda veivuke ena kena vakabulai na vuravura ka vakarautaka e dua na ivavakoso ni tamata e vuravura raraba me na lako mai vei ira na iVakabula.
Lomana na Kalou kei ira Era Tiko Tikivi Keda.
E rawa ni da rawata na mataqali matavuvale se itikotiko se matanitu ena noda muria na ivakaro ni loloma. Kei na levu ga ni noda lomana na Kalou, na levu ni noda lomani ira na wekada ka raica na sala eda rawa ni vakalougatataki ira kina. Era tu na wekada me ra vukei, na dravudravua me ra laveti cake, kei na vinaka me caka e veivanua kecega.
Na Turaga a vakamacalata ena dua na gauna na itavi kei na veivakalougatataki oqo vakaoqo:
“O koya mo yalodina tikoga; … vukei ira sa malumalumu, vakaukauwataka na liga sa wadamele, kei na duru sa malumalumu.”
“Ia kevaka ko sa yalodina tiko me yacova na ivakataotioti, ko na rawata na isala ni bula ni tawa mate rawa, kei na bula tawamudu ena veitikina au sa vakarautaka tu ena vale i Tamaqu” (Vunau kei na Veiyalayalati 81:5–6).
Tutaka na Dina
Ni kacivi keda na Kalou meda tarai Saioni cake, sa kacivi keda o Koya meda tutaka na Nona ivakavuvuli ka tudei tiko ena noda vakabauta. Oqo ena sega ni dau rawarawa se logaloga vinaka me da cakava, ia e dodonu me da cakava—ena yalololoma, yalomalumalumu, veiciqomi, kei na loloma cecere sega ni mudu vei ira na tani. Ena noda sasaga me da tauyavutaki Saioni, eda sotavi ira era sega ni rairai se vakaisulu se itovo veiganiti. Ni da sotavi ira na tamata vakaoqori, e dodonu me da veitata ena buladodonu sega ni vakadonui iko. Ena veigauna vakaoya na ka vinaka duadua eda rawa ni cakava sai koya me da vakaitovotaki keda vakavinaka ka vakaraitaka na “loloma e sega ni veivakaisini” vei ira (raica na Vunau kei na Veiyalayalati 121:41).
Au vinakata mera marautaka talega eso tale na veivakalougatataki e tu vei au, ia ena so na gauna au dau vakataroga meu wasea beka vakacava e dua na ivakarau ka na sega ni veivakacudrui se sega ni ciqomi. Sa vukei au na ivolanikalou oqo ena noqu veikacivi kece vaka-Lotu kei na noqu itavi vakatisaipeli i Karisito:
“O koya, au sa kaya kina vakaidina vei kemudrau, drau tabalaka cake na domomudrau vei ira na tamata oqo; drau tukuna yani na ka au sa vakatakila ki lomamudrau, ia drau na sega ni vakamaduataki e matadra na tamata;
“Raica ena soli vei kemudrau ena auwa ko ya, io ena gauna sara ga ko ya, na veika mo drau tukuna.
“Ia au sa solia vei kemudrau e dua na ivakaro, mo drau tukuna na veika kecega drau na tukuna ena yacaqu, ena yalo e dina, ena yalomalua, ena veika kecega.
“Kau na solia kina na yalayala oqo, ni kevaka drau na vakayacora vakakina, ena cakacaka yaco na Yalo Tabu me vakadinadinataka na veika kece drau sa vosataka” (Vunau kei na Veiyalayalati 100:5–8).
E Dua na Veivakalougatataki ni da Toso ki Liu
Kemuni na noqu itokani itabagone lomani, ena yaco na veisiga veibolei ni mataka, ia na nomuni bula ena yaco me cecere ni ko ni solia na yalomuni vua na Kalou, lomana na Turaga o Jisu Karisito, ka solia na nomuni vinaka taucoko mo ni bulataka na kosipeli. Kevaka o yalodina tiko, o Saioni ena tiko ena vanua cava ga o tiko kina. Au vakalougatataki kemuni mo ni ciqoma ena reki. Sa vakarautaka tu na Turaga e vuqa sara na ka me baleti iko!