Au a sega ni Curu ena Timi ni Danisi

Mai vei Emily Joy Thompson

Mekasini ni Lotu

E sega ni tiko ena lisi na yacaqu. Au a rarawataka sara. Ia a vakavulica vei au na Turaga e dua na ka.

daudanisi ni balei

Droini mai vei Gabriele Cracolici

Au dau taleitaka na danisi niu se qai yabaki tolu. Niu tiko voli ena itabavuli e loma, au sa dau nanamaki tu ni yaco mai na gauna ni nodra vakatovolei o ira me ra lewena na timi ni danisi. Au a sega ni vakatitiqataka ena noqu taledi kei na kila, ena rawarawa noqu curu ena timi.

Ni oti e vica na siga mai na vakatovotovo, sa biu na yacadra na timi ni danisi. E ka ni rarawa niu sega ni raica rawa na yacaqu ena lisi. Au a rarawataka sara. Au a lako i vale ka tagi ena noqu idavodavo. Au a rarawataka na qasenivuli ni danisi ka rarawataka na noqu sega ni curu rawa ena timi. A curuma galugalu yani o tinaqu na noqu rumu ka vakatura meu kerea vua na Tamada Vakalomalagi meu vakaukauwataki meu lakosivita na “tavutu” oqo ena noqu bula. Au a vakadonuya ena lomalomarua ka cavuta e dua na masu lekaleka. Ni oti na masu au a sega ni vakila e dua na vinaka, au sa mani mai tiko wavoki ga ka yaloca voli. Au moce vakaca sara ena bogi oya.

Ena mataka e tarava au a duri mai vakaukauwa mai na noqu idavodavo. E bulabula vinaka tu ena noqu vakasama na vakanananu ni noqu druka, kau vinakata meu curu lesu tale ki na noqu itutuvi. Ia ni se bera niu cakava, au nanuma sara e dua na yalayala sa cakava na noqu bisopi. E kaya o koya kevaka au na wilika na noqu ivolanikalou ena veisiga, kevaka walega me 15 na miniti, au na vakalougatataki. Kevaka meu a gadreva e dua na veivakalougatataki, sa ikoya sara ga oqo.

Niu wilika, au a kunea na tikina oqo ena Vunau kei na Veiyalayalati:

“Au sa kaya vakaidina vei kemudou na wekaqu, dou kakua ni rere, dou yalo vakacegu ga; io, dou reki tiko ga, ka vakavinavinakataka na ka kecega.

“Dou waraka na Turaga ena yalo vosota, ni sa rogo yani na nomudou masu vua na Turaga ni Saboca, ka sa volai ena ivau kei na ivakadinadina oqo—ka sa bubuluitaka ka lewa na Turaga me vakayacori.

“O koya sa solia kina vei kemudou na yalayala oqo, kei na kena veiyalayalati sega ni veisau rawa ni ra na vakayacori taucoko; kei na veika kece dou sa vakararawataki kina era na vakaduavatataki mo dou vinaka kina, ka me vakalagilagi kina na yacaqu, sa kaya na Turaga” (Vunau kei na Veiyalayalati 98:1–3).

Au Kidacala. Au a dabe toka ena noqu isulu ni moce ka qoroya na levu ni noqu gadreva na ivolanikalou oqo. Na yalo kece ni cudru kei na rarawa e savai tani ena tolu na tikina oqori. Au vakila na loloma nei Tamaqu Vakalomalagi ka kila ni kila o Koya na veika au lako curuma tiko. Ena rai vou oqo, au raica ni noqu sega ni digitaki ena timi ni danisi e dua ga na tavutu lailai ena gaunisala ni noqu bula. Au a tekiduru ena vakavinavinaka vua na Tamada Vakalomalagi.

Ena vo ni siga oya, au a maroroya tiko kina na Yalotabu ka raica na noqu veivakatovolei me madigi ni tubu. Au na taura voleka sara na veitikina oqo ki yaloqu. Kau na nanuma na yalayala nei noqu bisopi me baleta na veivakalougatataki ni goleva na ivolanikalou. Au vakavinavinaka niu rawa ni dua na tiki ni Lotu oqo ka kila tu na kosipeli. Au kila ni nona ituvatuva ena vukuda na Tamada Vakalomalagi e ituvatuva dina ni marau.

Ena Vinaka na Ka Kecega.”

D. Todd Christofferson

“Eda kila ni na basika mai na bolebole, rarawa, kei na yaluma kivei keda yadua ena veisala duidui, ia eda sa kila talega ni mai muri, ena vukuna ga na noda Dautataro vakalou, sa rawa ni caka me rawa vakavinaka na veika kece e baleti keda [raica na Vunau kei na Veiyalayalati 90:24; 98:3]. Oqo na vakabauta e vakamatatataka vakarawarawa o Peresitedi Gordon B. Hinckley (1910–2008) ena nona kaya, ‘Ena vinaka na ka kecega.’ Ena gauna eda dau nanuma tikoga kina na iVakabula, sa rawa meda “dau marautaka na veika kece sara eda rawa ni cakava ena noda kaukauwa ga’ [raica na Vunau kei na Veiyalayalati 123:16–17], ka yalodei tiko ni Nona kaukauwa kei na Nona lomani keda eda na taqeya rawa kina na bula oqo.”

Elder D. Todd Christofferson ena Kuoramu ni iApositolo Le Tinikarua, “Me Da Dau Nanumi Koya Tikoga,” Ensign, Epe. 2011, 55.

Tekivuna e dua na iTuvatuva Vakamatanivola veivakauqeti

Ni da vakasaqaqara ena ivolanikalou me veivuke, e vakavuqa ni dau sega ni dede na kena kunei e dua na tikina ka vaka me a volai sara ga me baleti keda. Ena so tale na gauna ena taura toka vakalailai na gauna me da raica e dua na ivolanikalou me vosa vaqori vei keda. Dua na sala mo kunea kina na veivuke o gadreva ena gauna o gadreva kina o ya mo cakava e dua na “ituvatuva vakamatanivola veivakauqeti.”

Ni ko vulica tiko na ivolanikalou, vakaraica toka na veitikina e tiko kina na yalayala se veivakayaloqaqataki ka na rawa ni vukei iko se so tale ena veivakatovolei se dredre ena veisiga ni mataka. Na makataki ni ivolanikalou oqo kei na kena maroroi e dua na kena lisi e rawa ni vakarautaka vei iko na kaukauwa o na gadreva ni o yalolailai. Me ikuri ni veivuke, tuva na ivolanikalou ki na veiwasewase duidui ka yavutaki mai na dredre cava soti era sotava. Ena sala oqori, ena dau tu ga vei iko na yalayala vakaivolanikalou kei na veivakalougatataki ka tu vakarau mo wilika ni o gadrevi ira.