“Fausiaina o Lou Tagata Sili,” Mo le Malosi o le Autalavou, Set. 2021, 6–7.
Sau, Mulimuli Mai ia te A’u
Fausiaina o Lou Tagata Sili
Auala e lima e fausia ai se olaga fiafia ma olioli.
Ata na tusia e Juliet Percival
Ina ua poloaiina e le Alii ia Iosefa Samita e fau le malumalu o Katelani, Na te lei tuua o ia e fuafua pe faapefea ona faia uma na o ia lava. Sa Ia faaalia mai se fuafuaga o le a taitai atu ai i le manuia.
“Ia fausia le fale, e lē tusa ma le ala a le lalolagi,” na fetalai mai ai le Alii. “Ia fausia e tusa ma le ala lea o le a Ou faaali atu” (Mataupu Faavae ma Feagaiga 95:13–14). Ona tuuina mai lea e le Alii o faatonuga i le auala e fausia ai le malumalu (tagai i le Mataupu Faavae ma Feagaiga 95:15–17).
O le mea e faafetai ai, ua faaali mai e le Alii ia i tatou e sili atu nai lo le na o le ala e fausia ai malumalu. Ua Ia tuuina mai foi ia i tatou ni faatonuga e fesoasoani ia i tatou ia avea ma tagata sili ona lelei e mafai ona avea ai i tatou. Ao tatou mulimuli ai, o le a tatou fausia o tatou olaga “e le tusa ai ma le ala a le lalolagi” ae i le ala ua mamanuina e le Alii.
O auala nei e lima e fausia ai se olaga fiafia ma olioli e totonugalemu ia Iesu Keriso.
Fausia se Faavae Mautinoa
Soo se tusiata po o se faufale o le a tau atu ia te oe o se faavae mausali e taua i soo se fale. Na aoao mai Helamana o le faavae sili ona lelei mo o tatou olaga o “le papa o lo tatou Togiola, o le Keriso lea, le Alo o le Atua” (Helamana 5:12). E mafai ona tatou faia Keriso o lo tatou faavae e ala i le o mai ia te Ia ma mulimuli i Ana aoaoga. O le a sou lagona i le avea ai o Keriso ma faavae o lou olaga?
Auauna Atu i Isi
O le isi auala sili e fausia ai o tatou olaga, e tusa ai ma le saunoaga a Peresitene Dieter F. Uchtdorf, a o avea ma Fesoasoani Lua i le Au Peresitene Sili, e oo mai pe a “tatou i ai i o tatou vae o loo auauna atu i le Alii ma auauna atu ia i latou o siomia i tatou.”1 Pe a e auauna atu i isi, o loo e faia le mea na faia e Iesu ma le aoaoina ina ia avea atili e faapei o Ia. Ma o le a le gata ina e faamanuiaina ai olaga o tagata e te auauna atu i ai, ae o le a faamanuiaina ai foi oe .
Fatu se Taimi Masani o le Tatalo ma le Suesueina o Tusitusiga Paia
O le isi auala e fausia ai se olaga fiafia o le fausia lea o se sootaga ma le Tama Faalelagi ma Iesu Keriso. O se auala sili e faia ai lena mea e ala i le tatalo ma le suesueina o tusitusiga paia.
Na saunoa mai Peresitene Uchtdorf: “Ina ia faamalosia lo tatou sootaga ma le Atua, tatou te manaomia nai taimi anoa e na o i tatou ma Ia. Taulai atu ma le filemu i le tatalo patino ma le suesueina o tusitusiga paia i aso taitasi… o le a avea ma se teugaoa atamai o o tatou taimi ma taumafaiga e faalatalata atili atu ai i lo tatou Tama Faalelagi.”2
O le tatalo o se avanoa e fesootai ai ma lo tatou Tama o i le Lagi. Na te silafia i tatou, e alofa ia i tatou, ma e finagalo e faalogo mai ia i tatou! Pe a tatou tatalo ma le faamaoni, ofo atu a tatou faafetai, ma fesili mo mea tatou te manaomia, Na te faafofoga ma tali mai i taimi uma i Lana lava ala ma le taimi.
Pe a oo mai i le suesueina o tusitusiga paia, e leai se tasi o auala sao e fai ai. O le mea taua o lou faia o lena mea! Na aoao mai Peresitene Russell M. Nelson, “O le faatofuina i aso taitasi i le afioga a le Atua e taua tele mo le ola ai faaleagaga.”3 O le faaaluina o le taimi i aso taitasi i tusitusiga paia, e aunoa ma se masalosalo, e fesoasoani ia te oe e fausia ai se olaga o le faatuatua ma le malosi.
Ia Siosiomia Oe Lava ia i Latou o e Uunaia Oe e Fai Mea Lelei
E finagalo le Tama Faalelagi ia i tatou e fesootai ma fausia ni sootaga ma isi—aemaise lava aiga ma uo. E tele ina mamanuina i tatou e i latou tatou te faaaluina le taimi e faatasi ai. Pe o i latou o ni tagata o le Ekalesia pe leai, e tatau ona e siomia oe lava i tagata o e fesoasoani ia te oe ia e ola i le talalelei, tausia tulaga faatonuina a le Alii, ma avea ma se tagata e sili atu ona lelei. E mafai foi ona e fesoasoani ia i latou o siomia oe e faia lea lava mea e tasi. O fea o au uo o loo fesoasoani ia te oe e fausia lou faavae i luga o le amiotonu?
Ia Maua le Olioli i le Fausiaina o Lou Faavae
E tele isi auala e mafai ona e fausia ai lou olaga ina ia malosi faaleagaga ma maua le olioli, e aofia ai le alu i le lotu ma le tagofia o le faamanatuga, osia ma le tausia o feagaiga, ma mulimuli i fautuaga a perofeta soifua.
E taua le manatua o nei mea uma e faaaoga ai le galue ma le taimi. O loo i ai pea le atiina ae ma le aoaoina ia faia, ae e le tatau ona e faia na o oe. O le a fesoasoani le Alii ia te oe i aso taitasi a o e taumafai i le mea sili e fausia se olaga e mafai ona lua mitamita ai ma Ia ma o le a aumaia ia te oe le olioli.