Fesili ma Tali

“E lagona le faigata o le tausia o tulaga faatonuina pe a faia e tagata uma ou te iloa se sootaga matuia ma se tasi. O le a se mea e tatau ona ou faia?”

“Pe e te manao i le agavaa, saogalemu, ma le malupuipuia i le … alofa faamemelo …? Ia avea o se soo moni o Iesu. Ia avea o se Au Paia o Aso e Gata Ai faamaoni, tuuto, i upu ma faatinoga. Ia talitonu o lou faatuatua e matuai aafia ai lava le lua sootaga, aua e moni.”

Elder Jeffrey R. Holland o le Korama a Aposetolo e Toasefululua. “How Do I Love Thee?” New Era Oke. 2003, 8).

Faaleleia o le tagata lava ia

“Taumafai ia maua se vaaiga e faavavau ma faaalu se taimi e atiina ae ai ni sootaga loloto ma lou aiga ma uo. O nei mamanu maloloina o le a aumaia ai isi ia te oe aua o le a latou vaai ia oe i le tulaga sili—o oe moni lava!”

Ellie S., 17, Kalefonia, ISA

Saili le Taitaiga

“Afai o loo e tauivi ma se lagona o le tuulafoaia, ole atu i le Tama Faalelagi mo se faamafanafanaga. O le a taialaina oe e le Agaga Paia ma i ai iina mo oe. E le gata i lea, e mafai lava ona e fesili i taimi uma i ou matua ma taitai mo se fautuaga, aua sa latou i ai i le mea ua e i ai! ”

Jaime G., 17, Nuevo Casas Grandes, Mekisiko

Fai Ni Uo Fou

“Ou te faamanatu ia te au lava ia e alofa le Atua ia te au. Ona ou faaaogaina lea o le avanoa e fesootai ai ma uo ua leva, ma ou te fatuina ni gaoioiga e fai ai ni uo fou. E mafai ona e faaaogaina le taimi lenei e fausia ai lou mautinoa, taleni, ma le molimau, ma o le a lelei mea uma.”

Julia S., 12, Alberta, Kanata

Fautuaga a Perofeta

“E faigata ona mafaufau i le faavavau pe a foliga mai ‘o le taimi nei‘ e sili atu ona taua. Manatua o perofeta ma isi taitai o le Ekalesia ua matua fautuaina malosi e tetee atu i le i ai i ni sootaga i lou talavou, e oo lava i le mavae ai o le 16 o tausaga. O sootaga loloto pe a e laitiiti e mafai ona taitai atu ai i le loto nutimomoia ma le ola le mama. E mafai foi ona e fesili atu i le Tama Faalelagi po o le a le mea e sili ona lelei mo oe e fai.”

Julia C., 17, Iuta, ISA

Ia Faaaofia

“O se auala lelei e lagona ai le faaaofia o le auai lea i isi mea. Faataitai se taaloga fou, taumafai tala faatino a le aoga, po o le auai i se kalapu komepiuta. Afai o loo e faia se mea e te fiafia i ai, o le a e feiloai i tagata e te fiafia i ai.”

Mayah S., 16, Beijing, Saina

O Lau Filifiliga

“Afai ua atoa lou 16, e mafai ona e filifili pe e te manao e tafafao taitoalua. Ae a faia lena filifiliga, aua e te mafaufau e uiga i manatu o isi e uiga ia te oe. Afai e te lagona ua e saunia, ona e faia lea. Afai e leai, aua e te faia.”

Felipe M., 14, Rio de Janero, Pasila

Isi Sootaga Taua

“E ui lava atonu e te le o i ai i se sootaga ma se ‘isi e faapitoa,’ o loo ia te oe pea ni sootaga lelei ma uo ma aiga o loo siomia ai oe. Ia lotofaafetai mo na sootaga. Ina ia mafai ona faamalolosia i latou, ia avea e faapei o Keriso ma se faataitaiga lelei.”

Taylee L., 17, Iuta, ISA

Faatali e Fai ni Sootaga Loloto

“Ou te fiafia ou te le o i ai i se sootaga i le taimi nei. O nisi o au uo e le tafafao faatasi ma au ona o loo faaalu o latou taimi uma i a latou uo tama. Ou te lagona e pei ua ou saoloto e feiloai atu i tagata e aunoa ma le vave faia oni faaiuga taua.”

Gina C., 16, Nuevo Casas Karanite, Mekisiko

Aua E te Faapopoleina Oe Lava

“Sa ou lagonaina le lagona lava lea e tasi, ae o le tatalo i le Alii, faitauina o au tusitusiga paia, ma le talanoa ma ou matua ua fesoasoani ia te au. E le manaomia ona tatou lagonaina le faapopoleina, aua o le a fesoasoani mai le Alii ia i tatou ia iloa pe a oo i le taimi sao. Fiafia i lou olaga, ma faaalu le taimi ma uo ma aiga a o e talavou! O lenei vaitau o lo tatou olaga e na o le tasi lava le taimi e tupu ai, o le mea lea, aua e te lagonaina le popole ina ia faatopetopeina. ”

Victoria G., 16, Nuevo Casas Karanite, Mekisiko

O tali a le au faitau ua faamoemoe e mo se fesoasoani ma ni manatu ae e le o se faalauiloaina aloaia o aoaoga faavae a le Ekalesia.

O Le A Sou Manatu?

O le faia o le faamanatuga i le fale sa manaia tele. Aisea e finagalo ai le Alii tatou te toe foi i le lotu?

Auina mai lau tali ma le ata ae lei oo i le aso 15 o Oketopa, 2021.

Alu i le ftsoy.ChurchofJesusChrist.org, ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “For the Strength of Youth” i lalo o le “Choose Magazine.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ia i matou lau faila. Pe imeli mai ia i matou i le [e-mail].

E ono faapupuuina ia tali mo le uumi po o le manino.