E lei Maua Sou Avanoa i le Au Siva

Saunia e Emily Joy Thompson

Mekasini a le Ekalesia

E lei i ai lou igoa i le lisi. Sa ou faavauvau. Ae sa aoao mai e le Alii ia te au se mea.

Ata na tusia e Gabriele Cracolici

Sa ou fiafia lava e siva talu mai le tolu o ou tausaga. O lea la, a o ou i ai i le aoga tulagalua, sa ou fiafia lava ina ua oo mai le taimi e fai ai filifiliga mo le au siva. Ou te lei masalosalo lava i lau taleni ma aafiaga, o le a faigofie ona ou maua le avanoa i le au.

I ni nai aso talu ona uma le faataitaiga, na tuu ai i luga igoa o le au siva. I lou faanoanoa, sa le mafai ona ou maua lou igoa i soo se mea i luga o le lisi. Sa ou faavauvau. Sa ou alu i le fale ma tagi i lou moega. Sa ou ita i le faiaoga o le siva ma sa le fiafia ona sa lei lava lou lelei e maua ai se avanoa i le au. Sa savali filemu mai lou tina i totonu o lou potu ma fautua mai ou te ole atu i le Tama Faalelagi mo le malosi e feagai ai ma lenei “patupatu” i lou olaga. Sa ou ioeina ma le musua ma faia se tatalo puupuu. Ina ua uma le tatalo, ou te lei lagonaina lava se suiga lelei, o lea sa faaauau ai ona ou tomumu ma le faanoanoa. Sa le mafai ona ou moe i lena po.

O le taeao na sosoo ai, sa ou alu ese mai lou moega. O le manatuaina o lou toilalo sa fou i lou mafaufau, ma sa ou manao ia tau lava o le toe oso i lalo o ieafu. Ae ou te lei faia, sa ou manatuaina se folafolaga na faia e lou epikopo. Fai mai a ia, afai ou te faitau i au tusitusiga paia i aso uma, e tusa lava pe na o le 15 minute o le a faamanuiaina ai au. Afai e i ai se taimi na ou manaomia ai se faamanuiaga, o le taimi lenei.

A o ou faitau, sa ou iloa ai le fuaiupu lenei i le Mataupu Faavae ma Feagaiga:

“Ou te fai atu ia te outou aʼu uo, aua le matatau, ia faamafanafanaina o outou loto; ioe, ia saga olioli pea, ma ia avatu le faafetai i mea uma;

“Ma faatalitali ma le onosai i le Alii, ona ua ulu atu a outou tatalo i fofoga-faafofoga o le Alii o Sapaota, ma ua tusifaamaumau ma le faamaufaailoga lenei ma le molimau—ua tauto le Alii ma folafola o le a talia i latou.

“O lea, ua tuuina mai e ia le folafolaga lenei ia te outou, ma se feagaiga e lē masuia o le a faataunuuina i latou; ma o mea uma sa outou puapuagatia ai o le a galulue faatasi mo lo outou lelei, ma le mamalu o loʼu igoa, ua fetalai mai ai le Alii” (Mataupu Faavae ma Feagaiga 98:1–3).

Sa ou te’i. Sa ou nofo i lou ofumoe faatasi ai ma lou lauulu veuveua ma sa ou maofa i lou manaomia tele o nei tusitusiga paia. O lagona uma o le ita ma le faanoanoa na tafiesea i na fuaiupu e tolu. Sa ou lagonaina le alofa o lou Tama Faalelagi ma iloa ai sa Ia silafia le mea sa ou oo i ai. Faatasi ai ma lenei vaaiga fou, sa mafai ona ou iloa ai o le le filifilia mo le au siva sa na o se tamai patupatu i le auala o lou olaga. Sa ou faapau ifo i ou tulivae i le lotofaafetai ma faafetai atu i le Tama Faalelagi.

Mo le vaega o totoe o le aso, sa mafai ai ona ou faatumauina le Agaga ia te au ma vaai atu i ou tofotofoga o ni avanoa mo le tuputupu ae. O le a ou faapelepele pea lava nei fuaiupu e latalata i lou loto. Ma o le a ou manatua le folafolaga a lou epikopo e uiga i faamanuiaga o le liliu atu i tusitusiga paia. Ou te faafetai ona e mafai ona avea au ma se vaega o lenei Ekalesia ma maua se malamalama o le talalelei. Ou te iloa o le fuafuaga a le Tama Faalelagi o se fuafuaga moni lava o le fiafia.

O Le a Lelei Mea Uma

“Ua tatou iloa o luitau, faanoanoaga, ma le faavauvau o le a oo mai ia i tatou taitoatasi i ni auala eseese, ae ua tatou iloa foi i le iuga, ona o lo tatou Fautua paia, e mafai ai ona galulue faatasi mea uma mo lo tatou lelei [tagai Mataupu Faavae ma Feagaiga 90:24; 98:3]. O le faatuatua lea na faigofie lava ona faamatalaina e Peresitene Gordon B. Hinckley (1910–2008) ina ua ia faapea mai, ‘O le a lelei mea uma.‘ A tatou manatua pea le Faaola, e mafai ona tatou “faia ma le fiafia mea uma e mafai ona tatou faia,” [tagai Mataupu Faavae ma Feagaiga 123:16–17], ma talitonu o Lona mana ma Lona alofa ia i tatou o le a mafai ai.”

Elder D. Todd Christofferson o le Korama a Aposetolo e Toasefululua, “Ia Manatua Pea o Ia,” Liahona, Ape. 2011, 55.

Amata se Faasinoupu o Musumusuga

Pe a tatou suesue i tusitusiga paia mo se fesoasoani, e tele lava ina le umi se taimi e maua ai se fuaiupu e foliga mai na tusia mo na o i tatou lava. O isi taimi e ono umi teisi atu se taimi e sue ai se mau e talanoa mai ia i tatou faapena. O se tasi auala e maua ai le fesoasoani e te manaomia pe a e manaomia o le faia o se “faasinoupu o musumusuga.”

A o e suesue i tusitusiga paia, ia taulai atu mo fuaiupu o loo i ai folafolaga po o le faamalosiauga e ono fesoasoani ia te oe po o isi o feagai ma tofotofoga po o faigata i le lumanai. O le makaina o nei mau ma le tausia o se lisi o mea e mafai ona tuuina atu ia te oe le malosi o le a e manaomia pe a e lagonaina le faanoanoa. Mo se fesoasoani faaopoopo, faavasega ia mau i ni vaega eseese e fua i faigata latou te talanoaina. O lena auala, o le a e maua ai folafolaga faatusi paia ma faamanuiaga ua saunia e faitau pe a e manaomiaina.