“Filifiliga,” Mo le Malosi o le Autalavou, Set. 2021, 12–14.

O Filifiliga

Saunia e Peresitene Dallin H. Oaks

Fesoasoani Muamua i le Au Peresitene Sili

I le tele o tausaga ua mavae, sa faasoa mai ai e se tasi o o tatou pulega aoao lenei tala faigata:

O se Cherokee atamai, o se tasi o ituaiga o tagatanuu i le Iunaite Setete, sa ia tau atu i le atalii o le la tama, se faataoto e uiga i le olaga. “I totonu ia te au o loo i ai se taua matautia i le va o ni luko se lua,” o le tala lea a le tamamatua. “O le tasi e leaga: tumu i le ita ma le lotoleaga, alofa ma le faanoanoa o le tagata ia te ia lava, faaloloto ma pepelo. O le isi e lelei: e tumu i le agalelei ma le agaalofa, lotomaualalo ma le upumoni, alofa ma le olioli. O loo tupu lena taua i totonu o i tatou taitoatasi.”

“O le fea luko o le a manumalo?” Sa fesili atu ai le atalii laitiiti o le Tama.

“O le tasi e te fafagaina,” na tali mai ai le tama matua ma le atamai.¹

O lenei faataoto e uiga i luko e lua ua faailoa mai ai se upumoni e faavavau. E fananau mai fanau a le Atua e faia filifiliga i le va o le lelei ma le leaga. O le faafeagai e mafai ai ona tatou faia ni filifiliga anoa ma amiotonu. O le Tusi a Mamona o loo aoao mai ai lenei upumoni i le gagana faatusi paia: “aua e ao lava ina i ai se faafeagai o mea uma.”²

Ua saunia e le fuafuaga a lo tatou Tama Faalelagi ia le itiiti ifo ma le lua ni meaalofa e fesoasoani ai i nei filifiliga: (1) Na te tuuina mai ia i tatou le Agaga Paia e taialaina a tatou filifiliga, ma le (2) Na te tuuina mai ia i tatou se Faaola o Lana Togiola ua mafai ai ona tatou salamo ina ia aveesea ai le aafiaga o filifiliga leaga—pe afai na latou fafagaina le luko amioleaga.

I. Salamo ma le Aloaiaina

E pei ona ou talanoa atu i le autalavou, o se tasi o mataupu e sili ona latou fesiligia soo o le salamo. “E faapefea ona e iloa ua lava lo latou salamo?” “E faapefea ona e iloa ua faamagaloina moni lava oe? O le tali i nei fesili e oo mai e ala mai i le Agaga Paia, o le sui o le aiga Atua o loo aumaia savali mai le lagi.

O le meaalofa o le salamo ua taua “o le tala fiafia o le talalelei.”³ E mafai ai ona tatou aveesea le aafiaga o filifiliga leaga ia na fafagaina ai le luko amioleaga ma faavaivaia ai lo tatou tomai e faalogo i uunaiga a le Agaga Paia. O le salamo e aofia ai le iloaina na tatou faia le mea sese, lafoai ese lena mea sese, ma fai se faaiuga e liliu atu o tatou loto i le Atua ma le tausia o Ana poloaiga. A tatou salamo, tatou te valaau atu i le mana o le Togiola a Iesu Keriso, lea e faateleina ai lo tatou talisapaia ma le alofa mo Ia o lo tatou Faaola.

O le manaomia o le salamo e le faatapulaaina i agasala matuia lea e manaomia ona ta’uta’u atu i le epikopo. O le salamo o se tulaga e tatau ai i aso uma. O le tele o le salamo e aofia ai le iloaina patino na tatou faia se mea sese, fuafua e suia, ma taumafai e faalelei ma i latou ua tatou sese ai. E tusa ai ma le faataoto i luko e lua, o le salamo e aofia ai le taofia o le fafagaina o le luko amioleaga e oo lava i ni taumafataga laiti, e pei o le taimi tatou te filifili ai e ita pe lotoleaga. E manaomia foi ona tatou salamo (sui) pe a tatou filifili e faamaumau lo tatou taimi na tuuina mai e le Atua i nisi o gaoioiga e tele o loo maua e leai se gafatia e faaleleia atili ai i tatou.

II. Iloaina o se Eseesega Taua

O se taunuuga matagofie o le salamo o le toe fausia lea o lo tatou agavaa e maua ai uunaiga mai le Agaga Paia, lea e fesoasoani ia i tatou e faia ni filifiliga poto ma faatumulia ai i tatou i le olioli. E toatele le autalavou o loo mafaufau foi: “E faapefea ona ou iloa pe o le uunaiga po o le tali ou te maua e moni lava e mai le Alii ae le na o le mea ou te manao ai?”

Ina ia iloa pe o se uunaiga o se savali mai le Agaga Paia pe na o se manaoga patino, e tatau ona tatou faaaogaina ni upumoni se tolu.

I le sauniga o le faamanatuga, o le folafolaga o le a tatou “maua pea lona Agaga e faatasi ma i [tatou]” e mulimuli mai i la tatou folafolaga o le a tatou tauave i o tatou luga Lona suafa, ma manatua pea o Ia, ma tausi Ana poloaiga.⁴ A tatou le tausia nei folafolaga, ua lamatia i tatou i le faanenefuina o le faapogai o musumusuga tatou te lagonaina.
O uunaiga mai le Alii e masani ona maua i taimi filemu po o le totonugalemu o tapuaiga, suesueina o tusitusiga paia, po o le tatalo po o le taimi o le auaunaga i o tatou valaauga, ae le o le sailia ma le manatu faapito po o le taimi e siosiomia ai e gaoioiga faalelalolagi.
Ma le mea mulimuli, e tatau ona tatou nofouta faapitoa i le taitaiga ina ia suia ai se ala o loo tatou tuliloaina. O se uunaiga ia suia le kosi e mafai ona sili atu ona faatuatuaina nai lo se uunaiga e tulimatai atu i se mea ua uma ona tatou mananao e fai.

III. O le Sao O Loo Sao Pea

Au uo talavou pele, ua outou o mai i se tulaga faatagata matua i se lalolagi e matuai ese lava nai lo o mea na oo i ai ou matua ma matua matutua. O lena mea e faapitoa lava le taua ai ia te oe ona manatua o tulaga faatauaina ma poloaiga anamua o loo faamalosia pea. O i tatou o fanau a le Atua, ma e tumau pea le taua o Ana poloaiga, pe tatou te malaga i le taavale solofanua po o se vaa i le vateatea, ma pe tatou te fesootai i le leo po o feautusitusia.

O loo sa’o pea le sa’o, ma o le sese o loo sese pea, e tusa lava po o le a le mea e tau mai pe na faia e tagata o ata tifaga, uiga faaalia i TV, po o tagata taualoa o taaloga. O tulaga faatonuina o loo i tusitusiga paia, o aoaoga a perofeta soifua, ma tulaga faatauaina i le tamaitusi Mo le Malosi o le Autalavou o loo avea pea ma au taiala sili mo filifiliga faaletagata lava ia i le mama i feusuaiga, soifua maloloina faaletino, faamaoni, laei ma foliga vaaia, ma isi mataupu uma. Mulimuli i ai ma le faamaoni, ma o le a faamanuiaina ai oe. “O le tamaitusi ua faaautuina Mo le Malosi o le Autalavou e tatau ona avea ma ou tulaga faatonuina,” na aoao mai ai i tatou e Peresitene Russell M. Nelson. “O le tagavai lea ua faamoemoe le Alii ia uumauina e Lana autalavou uma.”⁵

I lana faigalotu mamana a le autalavou i le lalolagi atoa, na folafola mai ai e lo tatou perofeta:

“Afai o le a e faia ma le loto faamaoni ma tumau ai pea lava i le galuega faaleagaga e manaomia e atina’e ai le tomai taua, faaleagaga o le aoao pe faapefea ona faalogo i musumusuga a le Agaga Paia, o le a e maua taitaiga uma o le taitaiga o le a e manaomia i lou olaga. O le a tuuina atu ia te oe tali o au fesili i le ala lava a le Alii ma Lana lava taimi.”⁶

Ou te faaopoopo atu lau folafolaga i Lana folafolaga, ao ou molimau atu i lo tatou Faaola o Iesu Keriso, e ana aoaoga ma le Togiola ua mafai ai mea uma, i le suafa o Iesu Keriso, amene.